بۇگىن Shymbulak تاۋ كۋرورتىنىڭ قىسقى ماۋسىمى اشىلۋىنا وراي ءباسپاسوز تۋرى ءوتتى. جۋرناليستەرگە كۋرورتتىڭ سەرۆيسى مەن ينفراقۇرىلىمىنىڭ جاڭعىرتىلۋى تانىستىرىلدى, دەپ جازادى Egemen.kz.
وتكەن ماۋسىمدا Shymbulak 1,5 ميلليوننان استام قوناقتى قابىلدادى. بۇل – رەكوردتىق كورسەتكىش. وسىلايشا, كۋرورت 2030 جىلعا قاراي كوزدەلگەن مەجەگە مەرزىمىنەن بۇرىن قول جەتكىزدى. تۋريستەر سانىنىڭ ءوسۋى ينجەنەرلىك جۇيەلەردى, سەرۆيستى ۇنەمى جاڭعىرتۋدى جانە قاۋىپسىزدىك ستاندارتتارىن ارتتىرۋدى تالاپ ەتەتىنى انىق.قايتا جاڭعىرتۋدان كەيىن سىرعاناۋ جابدىقتارىن جالعا بەرۋ مەن ساقتاۋدىڭ نەگىزگى ايماعى دا جاڭارتىلدى. جالعا بەرۋ قىزمەتىنىڭ سۋپەرۆايزەرى ءمۇسلىم جۇماەۆ قىزمەت كورسەتۋ ء«بىر تەرەزە» قاعيداتىمەن ىسكە اساتىنىن, ال لوكەرلەر سانى ەكى ەسەگە ارتقانىن اتاپ ءوتتى.
«قوناقتاردىڭ قاتارى جىل سايىن ارتىپ كەلەدى, سوندىقتان باستى مىندەتىمىز – سىرعاناۋعا دەيىنگى ۇيىمداستىرۋ راسىمدەرىنە كەتەتىن ۋاقىتتى قىسقارتۋ. نەگىزگى جالعا بەرۋ ايماعى قازىر “مەدەۋ” ستانتسياسىندا ورنالاسقان, ال “شىمبۇلاق” ستانتسياسىندا كاسىبي رايدەرلەرگە ارنالعان لوكەرلەر مەن جالعا بەرۋ نۇكتەسى جۇمىس ىستەيدى. بۇل قاربالاس ۋاقىتتا قىزمەت كورسەتۋدى جەدەلدەتۋگە مۇمكىندىك بەرەدى. تاعى ءبىر جاقسى جاڭالىق – وسى ماۋسىمدا تاۋ شاڭعىسى جابدىقتارى تولىق جاڭارتىلدى», دەدى ءمۇسلىم جۇماەۆ.
2025–2026 جىلعى سىرعاناۋ ماۋسىمىندا كۋرورتتا سەرۆيستى تسيفرلىق باقىلاۋ جۇيەسى ەنگىزىلدى. قوناقتار ينفوورتالىقتاردا, تاۋ شاڭعىسى مەن سنوۋبورد مەكتەبىندە, سونداي-اق كۋرورتتىڭ سايتىندا ورنالاسقان QR-كودتار ارقىلى وتىنىشتەر مەن ۇسىنىستارىن جولداي الادى.
«قوناقتاردىڭ پىكىرىن جيناۋ مەن تالداۋدى اۆتوماتتاندىردىق. بۇل كۋرورت قىزمەتىن وبەكتيۆتى باعالاۋعا, جەتىلدىرۋدى قاجەت ەتەتىن تۇستارىمىزدى جەدەل انىقتاۋعا جانە قىزمەت ساپاسىن جۇيەلى تۇردە كۇشەيتۋگە مۇمكىندىك بەرەدى», دەدى كليەنتتىك سەرۆيس جانە ساپانى باقىلاۋ دەپارتامەنتىنىڭ باسشىسى ولگا بەلياەۆا.
جاڭا ماۋسىمدا سانيتارلىق ينفراقۇرىلىمدى دامىتۋعا دا ەرەكشە كوڭىل بولىنگەن. كۋرورتتىڭ نەگىزگى ايماقتارىندا, سونىڭ ىشىندە 3200 مەتر بيىكتەگى جانە ادام كوپ شوعىرلاناتىن ستانتسيالاردا دارەتحانالار جاڭارتىلدى.
ءباسپاسوز تۋرى بارىسىندا جاڭارتىلعان راتراك پاركى, جاساندى قار جاساۋ جۇيەلەرى جانە اسپالى جولداردىڭ جۇمىسىن كورسەتىلدى. وسى ماۋسىمدا Shymbulak ەۋروپا, ازيا جانە لاتىن امەريكاسىنداعى كۋرورتتاردى باسقاراتىن حالىقارالىق PGI Management كومپانياسىمەن ىنتىماقتاستىقتى جۇزەگە اسىرماق.
سونداي-اق كۋرورت «ىلە-الاتاۋ» مەملەكەتتىك ۇلتتىق تابيعي پاركىمەن بىرلەسىپ, كىشى الماتى شاتقالىنداعى تيان-شان شىرشالارىن قالپىنا كەلتىرۋ ماقساتىندا Shyrshaly اۋماعىندا جوباسىن قولعا الدى. بيىل كۋرورت اۋماعىندا 500 كوشەت وتىرعىزىلدى.
دەرەكتەرگە سايكەس, 2025 جىلدىڭ قاڭتار-قاراشا ايلارى ارالىعىندا شەتەلدىك تۋريستەر اراسىندا ەڭ تانىمال مەكەن رەتىندە Shymbulak اتالعان. تۋريستەردىڭ 30,62%-ى كۋرورتقا بارۋدى ىقىلاس تانىتقان. قورىتا ايتقاندا الماتىعا كەلگەن ءاربىر ءۇشىنشى شەتەلدىك قوناق Shymbulak كۋرورتىنا بارعان.