شەكاراعا جاقىن جاتقان ايگىلى لەپسى اۋىلىندا جاڭا كوپسالالى سپورت كەشەنى مەن جاتاقحانا پايدالانۋعا بەرىلدى. بۇل اۋىل جاستارىنىڭ عانا ەمەس, شالعاي ەلدى مەكەندەردە تۇراتىن مىڭداعان حالىقتىڭ تىلەگى ەدى. بۇعان دەيىن الىستاعى اعايىندى ابىگەرگە تۇسىرگەن اۋىزسۋ مەن جول ماسەلەسى دە شەشىلدى.
جەتىسۋ وبلىسى قۇرىلعالى وسىمەن ونداعان اۋىلدا وسىنداي زاماناۋي سپورت نىسانى اشىلىپ وتىر. قازاقتىڭ قارادومالاق بالالارى سپورتتىق ۇيىرمەگە قاتىسامىز دەپ الاكول اۋدانىنىڭ ورتالىعى ءۇشارال قالاسى مەن تالدىقورعانعا سابىلاتىن. وندا دا شاماسى جەتكەندەر عانا بالاسىن سپورت مەكەمەلەرىنە اپاراتىن. جۇزدەگەن شاقىرىم جەر ءجۇرۋ وڭاي ەمەس. ەندى, مىنە, ىرگەدە حالىقارالىق ستاندارتقا ساي, بارلىق جاعداي جاسالعان جاڭا عيمارات بوي تۇزەدى. بۇل نىساننىڭ يگىلىگىن لەپسى سپورت مەكتەبىنىڭ بالالارى پايدالاناتىن بولادى.
جاڭا كەشەننىڭ اشىلۋىنا وبلىس اكىمىنىڭ ورىنباسارى دياس ەسداۋلەتوۆ, «ZHERSU» ينۆەستيتسيالىق-ونەركاسىپتىك كورپوراتسياسى باقىلاۋ كەڭەسىنىڭ توراعاسى, كاسىپكەر, مەتسەنات باۋىرجان وسپانوۆ, ءماجىلىس دەپۋتاتى دانيار قاسقاراۋوۆ, وليمپيادا چەمپيوندارى مەن جۇلدەگەرلەرى ەرماحان ىبرايىموۆ, يۋري مەلنيچەنكو, نۇرباقىت تەڭىزباەۆ, نۇربەك ورالباي, دەمەۋ جادىراەۆ, نازىم قىزايباي, نۇرماحان تىناليەۆ, باسقا دا بەلگىلى سپورتشىلار, اۋىل تۇرعىندارى قاتىستى.
سالتاناتتى شارادا د.ەسداۋلەتوۆ وبلىس اكىمىنىڭ قۇتتىقتاۋىن جەتكىزىپ, وڭىردەگى سپورت سالاسىن دامىتۋ باعىتىندا جاسالىپ جاتقان جۇمىستارعا قىسقاشا توقتالدى.
«مەملەكەت باسشىسىنىڭ بۇقارالىق سپورتتى دامىتۋ جونىندەگى تاپسىرماسىنا سايكەس وبلىس قۇرىلعاننان بەرى 32 جاڭا سپورت نىسانى سالىندى, 3 نىسان كۇردەلى جوندەۋدەن ءوتتى. جىل سوڭىنا دەيىن تاعى 3 سپورت نىسانىن ىسكە قوسۋ جوسپارلانىپ وتىر. لەپسى اۋىلىندا اشىلعان بۇل كەشەن – وقۋ-جاتتىعۋ بازاسى مەن جاتاقحاناسى ءبىر اۋماقتا ورنالاسقان تولىققاندى سپورتتىق ينفراقۇرىلىم. ول اۋىل جاستارىنا زور مۇمكىندىك تۋدىرىپ, بولاشاق چەمپيونداردىڭ ءوسىپ شىعۋىنا جول اشادى دەپ سەنەمىز», دەدى ول.
بيۋدجەت قارجىسىنا سالىنعان نىسان 160 ورىندىق, جاتاقحاناسى 244 ورىنعا ارنالعان. كوپفۋنكتسيونالدى سپورت كەشەنى ءتورت نەگىزگى بلوكتان تۇرادى. كەشەن قۇرامىندا تاتامي توسەلگەن كۇرەس زالى, جەكپە-جەككە ارنالعان مامانداندىرىلعان زال, ۆولەيبول مەن باسكەتبولعا ارنالعان ويىن زالدارى, ترەناجەر زالى, جۋىنۋ, كيىم اۋىستىرۋ بولمەلەرى, دارىگەر كابينەتى, ماسساج بولمەسى, پسيحولوگ كابينەتى, ءماجىلىس زالى, باسقا دا اكىمشىلىك, قىزمەتتىك بولمەلەر قاراستىرىلعان. سونداي-اق «ZHERSU» يوك جوبا اياسىندا قاراستىرىلماعان قوسىمشا قۇرال-جابدىقتاردى ساتىپ الۋعا دەمەۋشىلىك كومەك كورسەتتى.
قازىر سپورت مەكتەبىندە سپورتتىڭ بەس تۇرىنەن – گرەك-ريم كۇرەسى, بوكس, ەركىن كۇرەس, دزيۋدو, شاڭعىمەن سىرعاناۋدان 150 تالاپتى ءجاسوسپىرىمدى 10 جاتتىقتىرۋشى جاتتىقتىرادى. الداعى ۋاقىتتا سپورتتىڭ فۋتبول, باسكەتبول, ۆولەيبول تۇرلەرىنەن جاتتىقتىرۋشىلار تارتۋ جوسپارلانىپ وتىر.
وسىعان دەيىن قاراتال اۋدانىنا قاراستى بايشەگىر اۋىلدىق وكرۋگىندە وسىنداي ىرگەلى سپورت كەشەنى سالىنعان ەدى. وبلىس ورتالىعىنان الىستا ورنالاسقان اۋىلدا جۇزدەگەن بالا سپورتپەن ەركىن اينالىسىپ جاتىر.
ايتا كەتەلىك, وبلىستاعى سپورت مەكتەپتەرىندە 23 مىڭنان استام تاربيەلەنۋشى سپورتتىڭ 61 تۇرىمەن شۇعىلدانادى. وڭىردە دەنەشىنىقتىرۋ, سپورتپەن اينالىساتىن ادامدار وبلىس حالقىنىڭ 42%-ىن قۇرايدى.
جەتىسۋ وبلىسى