قازاقستاندىق وليگارحتاردىڭ اشەكەيلەرى اۋكتسيونعا شىعارىلدى

قايتارىلعان اكتيۆتەردى باسقارۋ كومپانياسىنىڭ (قابك) مالىمەتىنشە, 30 جەلتوقساندا اكتيۆتەردى قايتارۋ اياسىندا قازاقستاندىق وليگارحتاردان تاركىلەنگەن اشەكەيلەردى ساتۋ بويىنشا قايتا اۋكتسيون وتەدى. بۇل – العاشقى ساۋدادا وتپەي قالعان م ۇلىك.

– اۋكتسيونعا كادەسىي مونەتالار, زەرگەرلىك بۇيىمدار مەن قولساعاتتار قويىلادى. بارلىعى 39 لوت. جالپى باستاپقى باعاسى – 631 ملن 839 مىڭ 861 تەڭگە, – دەلىنگەن رەسمي حابارلامادا.

قابك جاڭا جىل قارساڭىندا ساتۋعا ۇسىناتىن بارلىق اشەكەيلەردى ەلەكتروندى ساۋدا پورتالى ارقىلى كورۋگە بولادى. ەڭ ارزان لوت – ۇلتتىق ويۋ-ورنەكپەن بەزەندىرىلگەن, كۇمىس قاپتاماسى بار بىلعارى بەلدىك. ونىڭ باعاسى – 262,5 مىڭ تەڭگە.

سونداي-اق سالىستىرمالى تۇردە ارزان سانالاتىن بۇيىمداردىڭ ءبىرى – گاۋھار تاستارمەن اشەكەيلەنگەن اق التىننان جاسالعان كوبەلەك بەينەلى القا. ول 280,5 مىڭ تەڭگەگە باعالانعان. قالعان لوتتاردىڭ باعاسى ايتارلىقتاي جوعارى (جانە نەگە ءالى كۇنگە دەيىن ساتىپ الۋشى تابىلماعانى دا تۇسىنىكتى). ءارتۇرلى القالار, سىرعالار, جۇزىكتەر مەن باسقا دا اشەكەيلەر جۇزدەگەن مىڭ تەڭگەدەن باستالىپ (مىسالى, لاعىل تاسى بار جۇزىك – 627,3 مىڭ تەڭگە), كوبىنە ميلليونداعان تەڭگەگە دەيىن جەتەدى.

ەڭ قىمبات ەكى زەرگەرلىك بۇيىم – Van Cleef & Arpels تىزبەگى (46,7 ملن تەڭگەدەن اسادى) جانە De Beers سىرعالارى (شامامەن 134,4 ملن تەڭگە). بۇل لوتتار بىرنەشە رەت اۋكتسيونعا قويىلعانىمەن, ءتىپتى تومەندەتىلگەن باعامەن دە ساتىپ الۋشى تابىلماعان.

الماسپەن اشەكەيلەنگەن التىن جانە پلاتينادان جاسالعان سىرعالار, كۋلون مەن جۇزىكتەر جيىنتىق رەتىندە ساتىلىمعا شىعارىلعان. ولاردى ساتىپ الۋ ءۇشىن 72 ملن 692 مىڭ تەڭگە تولەۋ قاجەت.

قىمبات لوتتاردىڭ قاتارىندا بىرنەشە قولساعات بار. ماسەلەن, اسىل تاستارمەن كومكەرىلگەن تسيفەربلاتى بار Frank Muller Geneve ساعاتى – 24,8 ملن تەڭگە. سونداي-اق Ulysse Nardin Archive Freak Cruiser قولساعاتى 24,7 ملن تەڭگەگە باعالانعان (كورپۋسىنداعى سىزاتتار بولماسا, باعاسى ودان دا جوعارى بولۋى مۇمكىن ەدى).

ال بۇل ساناتتاعى ەڭ قىمبات لوت – شەكتەۋلى, بار بولعانى 30 دانا بولىپ شىعارىلعان Ulysse Nardin Classic 789-80 حرونومەترى. پلاتينا كورپۋسىمەن, اۆانتيۋرين تسيفەربلاتىمەن جانە قولمەن ويىلىپ جاسالعان التىننان قۇيىلعان شايقاسىپ جاتقان جاۋىنگەرلەر بەينەسىمەن ەرەكشەلەنەتىن بۇل ساعاتتىڭ باعاسى – 182,2 ملن تەڭگە.