تاحاۋي احتانوۆ اتىنداعى اقتوبە وبلىستىق دراما تەاترىنىڭ ارتىستەرى فرانتسياعا گاسترولدىك ساپارمەن بارىپ, پاريجدە «قوبىلاندى باتىر» قويىلىمىن ساحنالادى. حورەوگرافيالىق ەلەمەنتتەرمەن, ەرەكشە كوز تارتارلىق كوستيۋمدەرمەن, دومبىرا مەن قوبىزدىڭ داۋىسىمەن كوركەمدەلگەن قويىلىم كورەرمەندەرگە ەرەكشە كوڭىل-كۇي سىيلادى. يۋنەسكو جانىنداعى قازاقستاننىڭ تۇراقتى وكىلى اسقار ءابدىراحمانوۆ پەن فرانتسياداعى قازاقستاننىڭ توتەنشە جانە وكىلەتتى ەلشىسى گۇلسارا ارىستانقۇلوۆا قويىلىمعا ارنايى كەلىپ قاتىستى, دەپ حابارلايدى Egemen.kz.
قوبىلاندى ءرولىن سومداعان ادىلەت مۇحتار ەلدىڭ تاعدىرى تالقىعا تۇسكەن كەزەڭدەگى مىنەزى, ىشكى بولمىسى, كوڭىل-كۇيى, جەڭىسى مەن قاتەلەسكەن تۇستارى ارقىلى ورتاعاسىرلىق باتىر تابيعاتىن بارىنشا اشۋعا تىرىسقان. ونىڭ جانىنداعى –توقتارباي (كەڭەس كەمالباەۆ), انالىق (ايگۇل ورازالينا), ەستەمىس (ەلامان دوسجانوۆ), قارلىعا (اجار جاردەنبەكقىزى), قارلىعاش (فاتيما بەردىبەكوۆا), قۇرتقا (ارۋجان بازارباەۆا) قوبىلاندى بەينەسىن تولىقتىرىپ تۇر. ساحناداعى الشاعىر, كوبىكتى, كوكلان, قارامان مەن قازان وبرازدارى دا ءار قىرىنان سومدالعان. سول زاماننىڭ ءۇنىن جەتكىزۋشى اقىن (ابزال قۇدايبەرگەنوۆ) ارقىلى قويىلىمنىڭ يدەياسى مەن كومپوزيتسياسى تۇتاسقان.
بۇل پاريج كورەرمەندەرىنە ورتاعاسىرلىق قىپشاق دالاسى كەيىپكەرلەرىنىڭ تابيعاتى مەن بولمىسىن, مىنەزى مەن ءومىر سالتىن تۇسىنۋگە تەز جول اشادى. سپەكتاكلدىڭ قويۋشى رەجيسسەرى – دينا جۇماباەۆا, قويۋشى سۋرەتشىسى ليليا حيسماتۋللينا. كەيىپكەرلەر كيىمدەرى, قيمىل قوزعالىستارى قوبىز سارىنىمەن ۇندەسىپ, قوبىلاندى ءومىر سۇرگەن زامانداعى دالا زاڭىنا باعىنعان قوعامنىڭ ءومىر ءسۇرۋ سالتىن كوركەمدەيدى.
«ت. احتانوۆ اتىنداعى وبلىستىق دراما تەاترى ارتىستەرىنىڭ ساپارى اقتوبە وبلىسى اكىمدىگىنىڭ قولداۋىمەن ىسكە اسىرىلدى. الەمدىك ساحنادا ونەر كورسەتۋ ءبىزدىڭ ارتىستەرىمىزگە ۇلكەن تاجىريبە بولدى. ايتا كەتۋ كەرەك, بيلەتتەر الدىن الا تەز ساتىلىپ كەتتى. ادام كوپ جينالدى. قويىلىم ءوزىن ءوزى اقتادى», دەيدى وبلىستىق مادەنيەت باسقارماسىنىڭ باسشىسى التىناي يۋنيسوۆا.
اقتوبە وبلىسى