ەل تۇرعىندارى بالىققا قانشالىقتى قۇمار؟

سونىمەن قاتار دايىندالعان نەمەسە وزگە تاسىلمەن كونسەرۆىلەنگەن بالىق, ۋىلدىرىق جانە ونىڭ بالامالارىنىڭ ءوندىرىسى 20,2%-عا ءوسىپ, 12,3 مىڭ تونناعا جەتتى. 

تۇششى, سالقىنداتىلعان نەمەسە مۇزداتىلعان بالىقتى ەڭ كوپ وندىرگەن ءوڭىر – شىعىس قازاقستان وبلىسى (9,1 مىڭ توننا). ودان كەيىن اتىراۋ, قىزىلوردا, تۇركىستان جانە الماتى وبلىستارى كەلەدى. ال كونسەرۆىلەنگەن بالىق پەن ۋىلدىرىق بويىنشا تۇركىستان, باتىس قازاقستان جانە شىعىس قازاقستان وبلىستارى الدىڭعى قاتاردا تۇر. 

2025 جىلدىڭ قاڭتار-قىركۇيەك ايلارىندا وتاندىق كومپانيالار ىشكى نارىق پەن ەكسپورتقا باعىتتالعان وڭدەلگەن جانە كونسەرۆىلەنگەن بالىق, شاباقتارعا دەگەن سۇرانىستىڭ 49,6%-ىن قامتاماسىز ەتتى (وتكەن جىلى – 47,8%). وسى كەزەڭدە ءوندىرىس 14,6%-عا ارتىپ, 44,5 مىڭ توننانى قۇرادى. يمپورت كولەمى دە 6,4%-عا ءوسىپ, 45,2 مىڭ تونناعا جەتتى. ەكسپورت پەن رەەكسپورت 15,2%-عا ازايىپ, 12,7 مىڭ توننانى كورسەتتى. ىشكى نارىقتاعى جالپى ساتىلىم كولەمى 77 مىڭ توننا بولدى, بۇل وتكەن جىلمەن سالىستىرعاندا 16,1%-عا ارتىق.

2025 جىلدىڭ ەكىنشى توقسانىندا حالىقتىڭ بالىق جانە تەڭىز ونىمدەرىن تۇتىنۋى ءبىر ادامعا شاققاندا 3,5 كگ بولدى, ياعني وتكەن جىلمەن شامالاس ء(وسىم – 0,5%). تۇششى نەمەسە سالقىنداتىلعان بالىق تۇتىنۋ 1,9%-عا ءوسىپ, 2,3 كگ-عا جەتتى. مۇزداتىلعان بالىق تۇتىنۋ 8,7%-عا ازايىپ, 377 گرامدى قۇرادى. 

وڭىرلەر بويىنشا العاندا بالىق پەن تەڭىز ونىمدەرىن ەڭ كوپ تۇتىناتىن ايماق – سولتۇستىك قازاقستان وبلىسى, وندا ءبىر ادام توقساندا ورتا ەسەپپەن 5,7 كگ ءونىم پايدالانعان. ودان كەيىن اقمولا وبلىسى (5,6 كگ) جانە اتىراۋ وبلىسى (5 كگ) كەلەدى. ەڭ تومەن كورسەتكىش شىمكەنت قالاسىندا (1,1 كگ), سونداي-اق ماڭعىستاۋ (2,5 كگ) جانە جامبىل (2,8 كگ) وبلىستارىندا تىركەلدى.

2025 جىلدىڭ ەكىنشى توقسانىندا ءۇي شارۋاشىلىقتارىنىڭ بالىق پەن تەڭىز ونىمدەرىنە جۇمساعان شىعىنى 20,3 مىڭ تەڭگەنى قۇراپ, ءبىر جىل ىشىندە 8,4%-عا ارتتى. ەڭ كوپ شىعىن اتىراۋ وبلىسىندا تىركەلدى – ورتا ەسەپپەن 30,2 مىڭ تەڭگە (وتكەن جىلى – 27,7 مىڭ تەڭگە). ودان كەيىنگى ورىنداردا تۇركىستان وبلىسى مەن الماتى قالاسى تۇر. ەڭ از قارجى شىمكەنت, ماڭعىستاۋ جانە قوستاناي وبلىستارىنىڭ تۇرعىندارى تاراپىنان جۇمسالعان.

2025 جىلدىڭ قازان ايىندا بالىق پەن تەڭىز ونىمدەرىنىڭ باعاسى ءبىر ايدا 2,5%-عا, جىل ىشىندە 16,3%-عا قىمباتتادى. ءبىر ايلىق ديناميكادا تۇششى نەمەسە سالقىنداتىلعان بالىق 2,6%-عا, مۇزداتىلعان بالىق 1,5%-عا, كونسەرۆىلەنگەن ونىمدەر 2,9%-عا ءوستى. جىلدىق ءوسىم بويىنشا تۇششى بالىق باعاسى 11,2%-عا, مۇزداتىلعان بالىق 22,9%-عا, ال كونسەرۆىلەنگەن تۇرلەرى 20,4%-عا قىمباتتادى.

ايماقتار ىشىندە ەڭ جوعارى باعا ءوسىمى قىزىلوردا وبلىسىندا تىركەلدى – ءبىر ايدا 13,9%. ەڭ تومەن ءوسىم پاۆلودار مەن جامبىل وبلىستارىندا بايقالدى – ارقايسىسىندا 0,4%. شىمكەنت قالاسىندا بالىق باعاسى قازان ايىندا وزگەرىسسىز قالعان.