ۇكىمەتتە وتكەن ءباسپاسوز ءماسليحاتىندا كولىك ۆيتسە-ءمينيسترى تالعات لاستاەۆ, بۇعان دەيىن اقمولا وبلىسى اكىمى مارات احمەتجانوۆتىڭ استانا-بۋراباي اۋە قاتىناسىن اشۋ مۇمكىندىگى تۋرالى ايتقان سوزىنە تۇسىنىكتەمە بەردى. اڭگىمە شاعىن اۋە كەمەلەرى جونىندە بولدى, دەپ جازادى Egemen.kz.
ۆيتسە-ءمينيستردىڭ ايتۋىنشا, اتالعان وبلىسقا قاتىستى مۇنداي مالىمدەمە بولعان, ول ونى باسپاسوزدەن كورگەن.
كەلەشەكتە استانا مەن بۋراباي اراسىندا تاپسىرىسپەن ورىندالاتىن چارتەرلىك باعىتتار اشىلىپ قالۋى عاجاپ ەمەس.
«بۇل جولاۋشىلاردىڭ جىلدام ءارى قولايلى جەتۋىنە مۇمكىندىك بەرەدى. جالپى مۇنداي مۇمكىنشىلىك بار. ينستيتۋتسيونالدىق تۇرعىدان العاندا ەشقانداي كەدەرگى جوق. اۋە كەمەلەرىنىڭ پاركى كەڭەيىپ كەلەدى. سوندىقتان مۇنداي مارشرۋتتار اشىلۋى ابدەن مۇمكىن دەپ ويلايمىن», دەدى ت.لاستاەۆ.