قاليبەك قۋانىشباەۆ اتىنداعى قازاق ۇلتتىق مۋزىكالىق-دراما تەاترىندا «ەل سالتاناتى» اتتى مەرەيتويلىق كونتسەرت ءوتتى. ءىس-شارا «سالتانات» مەملەكەتتىك بي ءانسامبلىنىڭ 70 جىلدىعى مەن قازاقستان حالقى اسسامبلەياسىنىڭ 30 جىلدىعىنا ارنالدى.
قازاقستان رەسپۋبليكاسى پرەمەر-ءمينيسترىنىڭ ورىنباسارى – مادەنيەت جانە اقپارات ءمينيسترى ايدا بالاەۆانىڭ جولداعان قۇتتىقتاۋ حاتىن مادەنيەت كوميتەتىنىڭ توراعاسى ەرلان داكەنوۆ وقىپ بەردى.
«العاش قۇرىلعان كۇننەن باستاپ-اق انسامبل ەلىمىزدىڭ مادەني كەڭىستىگىندە ەلەۋلى ورىن الىپ, ءتول ونەرىمىزدى الەمگە تانىتۋ جولىندا ايانباي ەڭبەك ەتىپ كەلەدى. وسىلايشا, قازاق بي ونەرىنىڭ قارا شاڭىراعى سان ۇرپاقتىڭ رۋحاني تەمىرقازىعىنا اينالىپ, ۇلتتىق بولمىسىمىز بەن مادەني قۇندىلىقتارىمىزدى بي تىلىندە سويلەتە ءبىلدى», دەلىنگەن ءمينيستردىڭ قۇتتىقتاۋىندا.
كونتسەرت ۇلتتىق حورەوگرافيانىڭ تاڭداۋلى ۇلگىلەرىن جانە ءتۇرلى ەتنومادەني داستۇرلەردى توعىستىرعان كوركەم ونەر مەرەكەسى بولدى. انسامبل جاڭارتىلعان كونتسەرتتىك باعدارلاماسىندا كلاسسيكالىق قازاق بيلەرى مەن الەمدىك حورەوگرافيانىڭ ۇزدىك قويىلىمدارىن ۇسىندى.
كەشتىڭ ەرەكشە اتموسفەراسىن قۇرمەتتى قوناقتاردىڭ ونەرى تولىقتىرا ءتۇستى. ەركەعالي راحماديەۆ اتىنداعى مەملەكەتتىك اكادەميالىق فيلارمونيانىڭ قازاق وركەسترى, «قازاقكونتسەرت» رمكۇ-نىڭ «بىرلىك» ءان-بي ءانسامبلى, ايگىلى «گۇلدەر» ءانسامبلى, «شالقىما» حالىق بي ءانسامبلى جانە «ناز» مەملەكەتتىك بي تەاترىنىڭ ۇجىمدارى مەرەكەلىك كەشتىڭ ءسانىن كەلتىردى.