سوڭعى كۇندەرى دوللاردىڭ ايتارلىقتاي ارزانداۋى تەڭگە باعامىنىڭ كۇشەيۋىنە اكەلدى. ساراپشىلار مۇنى ىشكى نارىقتاعى ۇسىنىستىڭ ارتۋىمەن جانە سىرتقى ەكونوميكالىق فاكتورلارمەن بايلانىستىرىپ وتىر, دەپ حابارلايدى Egemen.kz.
قازاقستان قارجىگەرلەر قاۋىمداستىعى دوللاردىڭ تەڭگەگە قاتىستى كۇرت السىرەۋىن ءتۇسىندىردى. 2 جەلتوقسانداعى بيرجالىق ساۋدادا دوللار بىردەن 5 تەڭگەگە ءتۇستى. ۇلتتىق بانك 3 جەلتوقسانداعى رەسمي كۋرستى 508,2 تەڭگە دەپ بەلگىلەدى, الايدا الماتىداعى كەيبىر ايىرباستاۋ پۋنكتەرىندە دوللار 506 تەڭگەدەن ساتىلىپ جاتىر.
سونىمەن قاتار سىرتقى فاكتورلاردىڭ دا اسەرى بار. ماماندار اقش پەن قىتاي اراسىنداعى ساۋدا شيەلەنىسى, مۇناي باعاسىنىڭ قۇبىلۋى جانە الەمدىك نارىقتاعى وزگەرىستەر دوللاردىڭ السىرەۋىنە ىقپال ەتكەنىن ايتادى.
«ساۋدا كولەمى ايتارلىقتاي ءوسىپ, 407,3 ملن دوللارعا جەتتى. ۇلتتىق بانكتىڭ شەتەل ۆاليۋتاسىن ۇلكەن كولەمدە ساتۋى (شامامەن 1,4 ملرد دوللار), كۆازيمەملەكەتتىك سەكتور سۋبەكتىلەرىنىڭ ۆاليۋتالىق ءتۇسىمدى كونۆەرتاتسيالاۋى, ەكسپورتتاۋشىلاردىڭ بەلسەندىلىگى جانە رەزيدەنت ەمەستەردىڭ تەڭگەمەن اكتيۆتەرگە قىزىعۋشىلىعىنىڭ قايتا ارتۋى بيزنەس پەن حالىق تاراپىنان بولعان جەرگىلىكتى دوللار سۇرانىسىن ايتارلىقتاي باسىپ وزدى», دەپ اتاپ ءوتتى ساراپشىلار.
ەكونوميست بەكنۇر قيسىقوۆتىڭ پىكىرىنشە, تەڭگە باعامىنا اقش پەن قىتاي اراسىنداعى ساۋدا سوعىسى دا اسەر ەتىپ وتىر.
«وزدەرىڭىز بىلەسىزدەر, اقش قىتايعا جانە باسقا دا ەلدەرگە وتە جوعارى تاريفتەر ەنگىزدى. سونىڭ ناتيجەسىندە ولاردىڭ نازارى ىشكى رەسۋرستار مەن وندىرىسكە اۋىستى. بىراق بۇل ءوندىرىس رەنتابەلدى بولۋى ءۇشىن ۇلتتىق ۆاليۋتانى ءسال السىرەتۋ قاجەت. سوندىقتان كتك-عا قاتىستى جاعداي اياسىندا مۇناي باعاسى دا ازداپ قۇبىلدى. ول ءوستى, ارينە. بۇل دا دوللاردىڭ قۇنىنا اسەر ەتەدى», دەدى ەكونوميست.
ونىڭ بولجامىنشا, جىل باسىندا دوللار باعامى قايتا ءوسىپ, 530-540 تەڭگە دەڭگەيىنە جەتۋى ىقتيمال.