ۇلتتىق اگرارلىق عىلىمي-ءبىلىم بەرۋ ورتالىعىنىڭ باسقارما توراعاسى باۋىرجان اسانوۆ جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتىنىڭ عىلىمي الەۋەتىن جوعارى باعالادى.
ورال قالاسىندا وتكەن قازاق-ستان–رەسەي وڭىرارلىق فورۋمىنا كەلگەن قازاقستاندىق جوو وكىلدەرى ۋنيۆەرسيتەتتىڭ عىلىمي زەرتحانالارىن ارالاپ, اتقارىلىپ جاتقان جۇمىستاردى كوردى. «قۇس شارۋاشىلىعى» عىلىمي-وندىرىستىك زەرتحاناسىندا, «ۆەتەرينارلىق جانە بيولوگيالىق قاۋىپسىزدىك», «تاعام قاۋىپسىزدىگى», «قۇرىلىس ماتەريالدارى جانە تەحنولوگيالار» عىلىمي زەرتتەۋ زەرتحانالارىندا بولىپ, ورالدىق عالىمداردىڭ جاڭا عىلىمي جوبالارىمەن تانىستى.
«قۇس شارۋاشىلىعى» عىلىمي-وندىرىستىك زەرتحاناسىنىڭ قىزمەتكەرلەرى مۇنداعى ينكۋباتور تۇرلەرىن, ولارعا جۇمىرتقا سالۋ ارقىلى بالاپان الۋ ءۇردىسىن, بالالاپان ءوسىرۋ تەحنولوگياسىن كورسەتتى. زەرتحانادا وسىرىلەتىن قاز-ۇيرەكتى باعىپ-كۇتۋ جاعدايىنا نازار اۋدارتىپ, ولارعا بەرىلەتىن ازىق تۇرلەرى, جاسالاتىن جەم-ءشوپ قوسپالارى تۋرالى ايتىپ ءوتتى.
«قۇرىلىس ماتەريالدارى جانە تەحنولوگيالار» عىلىمي زەرتتەۋ ورتالىعىنىڭ جۇمىسىن تانىستىرعان يندۋستريالدى-تەحنولوگيالىق ينستيتۋتى ديرەكتورىنىڭ ورىنباسارى ءسابيت جارىلعاپوۆ ۋنيۆەرسيتەت عالىمدارىنىڭ ءىرى قارا مالىنىڭ ءمۇيىزى مەن تۇياعىن, شىنى قالدىقتارىن كادەگە جاراتۋ بويىنشا عىلىمي جۇمىستارى تۋرالى ايتىپ بەردى. مۇنداعى عىلىمي زەرتتەۋ جۇمىستارىنا قوناقتار ەرەكشە قىزىعۋشىلىق تانىتتى. مىسالى, زەرتحانادا مالدىڭ ءمۇيىز-تۇياعى كوبىك بەتون وندىرىسىندە كوبىك تۇزگىش دايىنداۋعا قولدانىلسا, اينەك قالدىقتارى سيليكاتتى كىرپىشكە نەمەسە ورنەكتاستارعا قوسىمشا قاسيەت بەرەدى ەكەن. بۇل جاڭالىقتار عىلىمي زەرتتەۋلەر ارقىلى دالەلدەنگەن. بۇعان قوسا وبلىس اۋماعىنداعى تاسقالا كەن ورنىندا كەزدەسەتىن كرەمنيلى تاۋ جىنىسى – وپوكادان جاساندى قيىرشىق تاس الۋ نەمەسە اتالعان تاۋ جىنىسىن قۇراما جەمگە ارالاستىرۋ بويىنشا دا عىلىمي زەرتتەۋ جۇمىسى ءبىراز ۋاقىتتان بەرى جۇرگىزىلىپ كەلەدى.
ۋنيۆەرسيتەتتەگى «عىلىم جانە تەحنولوگيالاردى كوممەرتسيالاندىرۋ» دەپارتامەنتىنىڭ ديرەكتورى, بيولوگيا عىلىمدارىنىڭ دوكتورى ينديرا بەيشوۆانىڭ ايتۋىنشا, جانۋارلار گەنەتيكاسى جونىندەگى حالىقارالىق قوعام (ISAG) ۇيىمداستىرعان ءىرى قارا مال مەن جىلقىنىڭ گەنەتيكالىق ءپروفيلىن انىقتاۋعا ارنالعان حالىقارالىق سالىستىرمالى سىناقتا ۋنيۆەرسيتەتتىڭ «بيوتەحنولوگيا جانە جۇقپالى اۋرۋلاردى دياگنوستيكالاۋ» زەرتحاناسى گەنەتيكالىق زەرتتەۋلەردىڭ جوعارى ساپاسىن راستايتىن 1-رانگ مارتەبەسىنە يە بولعان.
– مەملەكەت باسشىسى عىلىم-ءبىلىم سالاسىنا وتە جوعارى تالاپ قويىپ وتىر. ءبىز سىزدەرمەن جانە ءوندىرىس ورىندارىمەن بىرلەسىپ, سول تالاپ-مىندەتتى ورىنداۋعا كۇش سالامىز. عىلىم سالاسىنداعى جاڭا جوبالاردى, جەتىستىكتەردى ءارى قاراي جۇزەگە اسىرۋىمىز كەرەك. پرەزيدەنت بيىلعى جولداۋىندا اگروحاب قۇرۋ ماسەلەسىن ەرەكشە تاپسىردى. بۇگىن جاڭگىر حان ۋنيۆەرسيتەتىنىڭ ماماندار دايارلاۋ جۇيەسىمەن, ۋنيۆەرسيتەت عالىمدارىنىڭ عىلىمي زەرتتەۋ جۇمىستارىمەن جانە جۇزەگە اسىرىلىپ جاتقان جوبالارىمەن جاقىن تانىستىق. وسى ەڭبەكتەرىڭىز ءۇشىن سىزدەرگە العىس بىلدىرەمىن, – دەدى باسقارما توراعاسى ب.اسانوۆ.
– ءبىز جاڭگىر حان ۋنيۆەرسيتەتىمەن عىلىمي باعىتتا بۇرىننان دا بىرلەسە جۇمىس ىستەپ كەلەمىز. جالپى ۇلتتىق اگرارلىق عىلىمي-ءبىلىم بەرۋ ورتالىعىنا قاراستى ءۇش ۋنيۆەرسيتەت ءوزارا ارىپتەستىك بايلانىستا, ورتاق ماقساتتا جۇمىستانىپ جاتىرمىز. وسى جولعى ساپارىمىز ءبىز ءۇشىن وتە ماڭىزدى بولدى, – دەيدى س.سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتىنىڭ رەكتورى قانات تىرەۋوۆ.
باتىس قازاقستان وبلىسى