جەتىسۋ وبلىسىنىڭ شەكارالىق پانفيلوۆ اۋدانىندا جول ينفراقۇرىلىمىن جاقسارتۋ جۇمىستارى جۇيەلى تۇردە جالعاسىپ كەلەدى. بۇل تۋرالى وبلىس اكىمى بەيبىت يساباەۆتىڭ اۋدان حالىمەن كەزدەسۋىندە ءمالىم بولدى, دەپ جازادى Egemen.kz.
وتكەن جىلى ۇزىندىعى 32 شاقىرىمدى قۇرايتىن «جاركەنت–قورعاس» رەسپۋبليكالىق جولى تولىق جوندەلسە, بيىل 178 شاقىرىمدىق «سارىوزەك–كوكتال» اۆتوماگيسترالىنىڭ قايتا جاڭعىرتۋ جۇمىستارى ءتامامدالدى. ونىڭ 83 شاقىرىمى پانفيلوۆ اۋدانى ارقىلى وتەدى.
بيىل اتقارىلعان نەگىزگى جۇمىستاردىڭ قاتارىندا كونبە اسۋىنداعى كوپىردىڭ جانە كوكتال اۋىلىنان «الماتى–قورعاس» تراسساسىنا شىعاتىن 15 شاقىرىم جولدىڭ تولىق جوندەلۋى بار. سونىمەن قاتار وبلىستىق ماڭىزى بار «جاركەنت–سارىبەل» تاس جولىنىڭ 4 شاقىرىمىندا ورتاشا جوندەۋ اياقتالدى.
باسقۇنشى اۋىلىنا كىرەتىن جولدا كۇردەلى جوندەۋ جالعاسىپ جاتىر, نىسان كەلەسى جىلى پايدالانۋعا بەرىلمەك. اكىمنىڭ ايتۋىنشا, تۇرعىندار كوتەرگەن ماسەلە – ىنتالى اۋىلىنىڭ 11,8 شاقىرىم كىرەبەرىس جولى – بويىنشا دا جۇمىستار باستالىپ, بيىل اسفالت توسەۋ اياقتالادى. ال اباتتاندىرۋ مەن تولىق قابىلداۋ كەلەسى جىلعا جوسپارلانعان.
جاركەنت, اۋليەاعاش جانە باسقۇنشى ەلدى مەكەندەرىنىڭ سەگىز كوشەسىندە جول جوندەۋ جۇرگىزىلۋدە. قازىرگى تاڭدا باسقۇنشى اۋىلىنداعى ەكى كوشەنىڭ جۇمىستارى بىتكەن. جاركەنت قالاسى مەن اۋليەاعاش اۋىلىنداعى ىشكى كوشەلەردى جاڭارتۋ كەلەسى جىلى جالعاسادى.
ايتا كەتەيىك, سوڭعى ءۇش جىلدا كەربۇلاق پەن پانفيلوۆ اۋداندارى اۋماعىنداعى رەسپۋبليكالىق ماڭىزى بار 241 شاقىرىم جول جاڭارتىلدى. بۇل جۇمىستار تاس جولداردىڭ تەحنيكالىق جاعدايىن نورماتيۆكە ساي دەڭگەيگە جەتكىزۋگە مۇمكىندىك بەردى. سونىمەن بىرگە, بيىل پانفيلوۆ اۋدانىنداعى جەرگىلىكتى ماڭىزى بار 29 شاقىرىم جولدى جوندەۋگە جانە كۇتىپ-ۇستاۋعا قارجى قاراستىرىلعان.