اقوردادا مەملەكەت باسشىسى نۇرسۇلتان نازارباەۆ “ەلوردانىڭ ون ەكى بىرەگەي عيماراتى استانا قۇرداستارى ءۇشىن” اتتى جەمىستى جۇزەگە اسىرىلعان باعدارلامانىڭ اياسىندا قالانىڭ ەڭ اسەم عيماراتتارىن ارالاپ كورگەن ەلوردا قۇرداستارى – بالالارمەن كەزدەستى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
مۇنداي ەڭ تانىمال عيماراتتاردىڭ قاتارىنا “قازاقستان” ورتالىق كينوكونتسەرت زالى, تۇڭعىش پرەزيدەنتتىڭ ينتەللەكتۋالدىق مەكتەبى, “بايتەرەك” كەشەنى, نازارباەۆ ۋنيۆەرسيتەتى, “استانا ارەنا” جابىق ستاديونى, “قازاق ەلى” مونۋمەنتى, تاۋەلسىزدىك سارايى, بەيبىتشىلىك جانە كەلىسىم سارايى, “شابىت” شىعارماشىلىق سارايى, سونداي-اق “دۋمان” جانە “كەرۋەن” ويىن-ساۋىق كەشەندەرى جاتادى.
سول كۇنى بالالار قازاقستان رەسپۋبليكاسى پرەزيدەنتىنىڭ رەزيدەنتسياسىندا بولىپ, اقورداداعى زالداردى ارالاپ كوردى.
– قازىرگى ۋاقىتتا استانادا بالالارعا ارنالعان تۇڭعىش پرەزيدەنتتىڭ ينتەللەكتۋالدىق مەكتەبى اشىلدى. ونى بىتىرگەننەن كەيىن وقۋدى جاڭا حالىقارالىق ۋنيۆەرسيتەتتە – نازارباەۆ ۋنيۆەرسيتەتىندە جالعاستىرۋعا بولادى. ونداعى ءبىلىم دەڭگەيى الەمنىڭ ۇزدىك جوعارى وقۋ ورىندارىنان كەم تۇسپەيدى, – دەپ اتاپ ءوتتى مەملەكەت باسشىسى وقۋشىلارمەن اڭگىمەلەسۋ كەزىندە.
پرەزيدەنت دەنە شىنىقتىرۋمەن جانە سپورتپەن اينالىسۋدىڭ ماڭىزدىلىعىن اتاپ ءوتتى.
– ءبىز سەندەر باقىتتى جانە ءبىلىمدى ازامات بولىپ شىعۋلارىڭ ءۇشىن ءبارىن جاسايمىز, – دەپ اتاپ كورسەتتى نۇرسۇلتان نازارباەۆ.
پرەزيدەنت وقۋشىلارعا تەرەڭ ءبىلىم مەڭگەرىپ, كەلەشەكتە وتانىمىزدىڭ لايىقتى ازاماتى بولۋ ءۇشىن العا ۇمتىلۋلارىڭ قاجەت دەگەن يگى تىلەگىن ءبىلدىردى.