اتىراۋدا كوپشىلىكتىڭ نازارىن اۋدارعان يانا لەگكوديموۆانىڭ ولىمىنە قاتىستى قىلمىستىق ءىس بويىنشا سوت ۇكىمى جاريالاندى. سوت ەكى كۇدىكتىنى اسا اۋىر قىلمىس جاساعانى ءۇشىن ءومىر بويىنا باس بوستاندىعىنان ايىردى, دەپ حابارلايدى Egemen.kz.
ايىپتالۋشىلار ريزۋان قايىرجانوۆ پەن التىنبەك كاتيموۆ قىلمىستىق كودەكستىڭ 99-بابى 2-بولىگىنىڭ 7 جانە 8-تارماقتارىنا سايكەس اسا اۋىر قىلمىس جاسادى دەپ تانىلىپ, ءومىر بويىنا باس بوستاندىعىنان ايىرىلدى.
جازا مەرزىمى ايىپتالۋشىلاردىڭ ۇستالعان كۇنى 2024 جىلدىڭ 22 قازانىنان باستاپ ەسەپتەلەدى.
«قر قك-ءنىڭ 62-بابى 3-بولىگىنىڭ 1-تارماعىنا سايكەس, قايىرجانوۆ پەن كاتيموۆتىڭ ۇكىم زاڭدى كۇشىنە ەنگەنگە دەيىن قاماۋدا بولعان ۋاقىتى جازانىڭ ءبىر كۇنىنە ءبىر كۇن ەسەبىمەن تولىقتاي قوسىلادى», دەدى سوت.
سوت وتىرىسىندا قارالعان ازاماتتىق تالاپ بويىنشا مارقۇمنىڭ اناسى گالينا لەگكوديموۆانىڭ شاعىمى ءىشىنارا قاناعاتتاندىرىلعان. ايىپتالۋشىلاردان 1 955 070 تەڭگە كولەمىندە ماتەريالدىق شىعىن وندىرىلەتىن بولدى.
بۇدان بولەك, قايىرجانوۆ پەن كاتيموۆ جابىرلەنۋشىنىڭ پايداسىنا مورالدىق وتەماقى رەتىندە ارقايسىسى 15 ميلليون تەڭگەدەن تولەۋگە مىندەتتەلدى. سونىمەن قاتار مەملەكەت كىرىسىنە 21 517 تەڭگە مولشەرىندە مەملەكەتتىك باج وندىرىلەدى.
ايىپتالۋشىلارعا سوت ۇكىمىنىڭ تالاپتارىن ورىنداۋ ءۇشىن ەكى اي مەرزىم بەرىلگەن.