مەملەكەت باسشىسى قاسىم-جومارت توقاەۆ ورتالىق ازيا مەملەكەتتەرى باسشىلارىنىڭ VII كونسۋلتاتيۆتىك كەزدەسۋىندە ءوڭىر ءۇشىن سۋ قاۋىپسىزدىگى ماسەلەسى اسا وزەكتى ەكەنىن اتاپ ءوتتى. سوڭعى بەس جىلدا ورتالىق ازيا مەملەكەتتەرى سۋ ساياساتىنا قاتىستى ۇستانىمدارىن جاڭعىرتقانىن جەتكىزدى, دەپ جازادى Egemen.kz.
– سۋ ماسەلەسىنىڭ ترانسشەكارالىق سيپاتىن ەسكەرە وتىرىپ, سالالىق ستراتەگيامىزدى ۇيلەستىرۋ ماڭىزدى دەپ سانايمىن. بۇل ءبىر جاعىنان سۋ ۇنەمدەۋدىڭ اناعۇرلىم ءساتتى تاجىريبەلەرىن كەڭىنەن تاراتۋ ءۇشىن قاجەت. الداعى ۋاقىتتا حالىقارالىق ستاندارتتارعا سايكەس ورتالىق ازيانىڭ سۋدى پايدالانۋ جونىندەگى نەگىزدەمەلىك كونۆەنتسياسىن قابىلداۋدى ويلاستىرۋعا بولادى. مۇنداي قۇجات سالاداعى بىرىڭعاي جۇمىس قاعيداتتارىن بەكىتىپ, ىقتيمال قاراما-قايشىلىقتاردىڭ الدىن الۋعا مۇمكىندىك بەرەدى. كەلەسى جىلى ءساۋىر ايىندا استانادا وڭىرلىك ەكولوگيالىق سامميتىمەن قاتار وتەتىن حالىقارالىق ارالدى قۇتقارۋ قورىنا مۇشە مەملەكەتتەر باسشىلارىنىڭ جيىنىندا وسى تاقىرىپقا ورالىپ, ۇسىنىستاردى تالقىلاي الامىز. سىزدەر اتالعان ءىس-شارالارعا بەلسەندى قاتىسادى دەپ سەنەمىن, – دەدى قازاقستان پرەزيدەنتى.
تاشكەنت