استانا. 21 ناۋرىز. فۋتبولدان ەۋروپا ليگاسىنىڭ شيرەك فينالىندا وينايتىن جۇپتار بەلگىلى بولدى. شۆەيتساريانىڭ نون قالاسىندا وتكەن جەرەبە تارتۋ راسىمىندە جارىستىڭ قازىرگى جەڭىمپازى «سەۆيلياعا» رەسەيدىڭ «زەنيتى» قارسىلاس اتاندى. بۇل تۋرالى egemen.kz حابارلادى.
ەۋروپا ليگاسىنىڭ شيرەك فينالىندا مىنا كوماندالاردىڭ ويىندارىن كورە الامىز:
«سەۆيليا» (يسپانيا) – «زەنيت» (رەسەي)
بۇل ەكەۋى دە ۋەفا كۋبوگىن (ەۋروپا ليگاسىنىڭ بۇرىنعى اتاۋى) يەمدەنگەن كوماندا. 2005-2006 جىلعى ۋەفا كۋبوگىنىڭ شيرەك فينالىندا قوس كوماندا قارسىلاس اتانىپ, ەكى ويىننىڭ قورىتىندىسى بويىنشا يسپاندار 5:2 ەسەبىمەن جەڭىسكە جەتكەن ەدى. سول ماۋسىمدا «سەۆيليا» العاش رەت ۋەفا كۋبوگىن يەمدەندى. سونداي-اق, كەلەسى 2006-2007 جىلعى ماۋسىمدا دا يسپاندار جارىس جەڭىمپازى اتاندى. بۇل جارىستا سوڭعى رەت وتكەن ماۋسىمدا توپ جاردى. ال «زەنيت» 2008 جىلى اتالعان تۋرنيردە جەڭىسكە جەتكەن بولاتىن.
«بريۋگگە» (بەلگيا) – «دنەپر» (ۋكراينا)
«بريۋگگە» ەۋروپا ليگاسىنىڭ بيىلعى ماۋسىمىندا جەڭىلمەي كەلە جاتقان جالعىز كوماندا. ايتسە دە, بۇرىن «دنەپەردەن» وسى تۋرنير اياسىندا جەڭىلىپ كوردى. ياعني 2004 جىلى ۋەفا كۋبوگىنىڭ توپتىق كەزەڭىندە قارسىلاستارىنا 2:3 ەسەبىمەن ەسە جىبەردى.
«دينامو» كيەۆ (ۋكراينا) – «فيورەنتينا» (يتاليا)
«دينامو» مەن «فيورەنتينانىڭ» بۇگىنگە دەيىن ءتورت رەت جولى تۇيىسكەن. سونىڭ بىردە بىرىندە ۋكرايندەر جەڭىسكە جەتىپ كورمەگەن.
«ۆولفسبۋرگ» (گەرمانيا) – «ناپولي» (يتاليا)
1/8 فينالدا ميلاننىڭ «ينتەرىنەن» ايلاسىن اسىرعان نەمىستەر شيرەك فينالدا تاعى ءبىر يتاليانىڭ كومانداسىمەن كۇش سىناسادى. «ناپولي» 1989 جىلى ۋەفا كۋبوگىن يەمدەنگەنىن ايتا كەتەيىك.
شيرەك فينالدىڭ العاشقى ويىندارى 16 ساۋىردە وتەدى. قارىمتا كەزدەسۋلەر 23 ساۋىرگە جوسپارلانعان. ال ەۋروپا ليگاسىنىڭ بيىلعى فينالى 27 مامىردا ۆارشاۆاداعى «Narodowy» ستاديونىندا وتەدى دەپ كۇتىلۋدە.
ەلامان قوڭىر.
دەرەك: egemen.kz.
سۋرەت: uefa.com.