2026 جىلدان باستاپ ققس مولشەرلەمەسىنىڭ 12%-دان 16%-عا ءوسۋى مەملەكەتتىك قۇرىلىس جوبالارىن زالالدى ەتۋى مۇمكىن. بيزنەس بۇل ماسەلەنى شەشۋ ءۇشىن ۇكىمەتتەن ناقتى مەحانيزم سۇراپ وتىر, دەپ جازادى Egemen.kz.
«اتامەكەن» ۇكپ الاڭىندا وتكەن جيىندا قۇرىلىس كومپانيالارى بارلىق جوبالار 12% ققس مولشەرلەمەسىمەن كەلىسىلگەنىن, ال جاڭا 16% مولشەرلەمە ماتەريالدار مەن جۇمىستىڭ وزىندىك قۇنىن كۇرت كوتەرەتىنىن ايتتى.
قۇرىلىس سالاسىنىڭ تابىستىلىق دەڭگەيى شامامەن 8%. ساراپشىلاردىڭ ايتۋىنشا, ققس-تىڭ 4% ءوسىمى وسى مارجانى تولىق جويىپ, جوبالاردى شىعىنعا اكەلەدى.
بيزنەس وكىلدەرى 2026 جىلعا وتەتىن مەملەكەتتىك جوبالاردى قايتا ەسەپتەۋ تەتىگىن تەز ارادا بەكىتۋدى سۇرادى. ۇكپ كوميتەتىنىڭ وكىلدەرى جالعىز دۇرىس ءادىس – تاپسىرىس بەرۋشىمەن قوسىمشا كەلىسىم جاساپ, قالعان جۇمىس كولەمىنە 4% ۇستەمە قوسۋ ەكەنىن جەتكىزدى.
قارجى مينيسترلىگى ققس-تىڭ 16% مولشەرلەمەسى 2026 جىلدان باستاپ بارلىق ساتىلىمدارعا قولدانىلاتىنىن راستادى. قۇرىلىس ىستەرى كوميتەتى سالىق وزگەرسە, جوبانىڭ قۇنىن ۇلعايتۋعا مۇمكىندىك بەرەتىن نورما بار ەكەنىن ايتتى. بىراق قۇرىلىسشىلار جەرگىلىكتى ورگاندار بۇل تەتىكتى ءىس جۇزىندە پايدالانبايتىنىن جەتكىزدى.
تۇرعىن ۇيگە قاتىستى ققس ماسەلەسى دە تالقىلاندى. 2026 جىلدان باستاپ تۇرعىن ءۇي ساتۋ ققس-تان بوساتىلمايدى. بىراق 2026 جىلعا دەيىن باستالعان نەمەسە پايدالانۋعا بەرىلگەن نىساندارعا سالىق سالىنبايدى.
سالا وكىلدەرى جاڭا مولشەرلەمەگە كوشۋ ءتارتىبىن تۇسىندىرەتىن بىرىڭعاي رەسمي قۇجات قاجەت ەكەنىن اتاپ ءوتتى. ونسىز كەلىسىمشارتتاردىڭ بۇزىلۋى, ايىپپۇلدار جانە سوت داۋلارى كوبەيەدى.