استانادا بەيبىت ۋاقىتتا ەرلىك پەن جانقيارلىق تانىتقان پوليتسيا قىزمەتكەرلەرى مەن ۇلتتىق ۇلاننىڭ اسكەري قىزمەتشىلەرىن ۇلىقتاۋعا ارنالعان «قازىرگى زامان قاھارمانى» رەسپۋبليكالىق اكتسياسى ءوتتى, دەپ حابارلايدى Egemen.kz.
ءىس-شاراعا قاتىسۋشىلار الدىندا ىشكى ىستەر مينيسترلىگىنىڭ جەكە قۇراممەن جۇمىس جونىندەگى دەپارتامەنتىنىڭ باستىعى ولجاس مىرزابەكوۆ, استانا قالالىق پوليتسيا دەپارتامەنتىنىڭ باستىعى مارات تولەباەۆ جانە ءىىم ۇلتتىق ۇلانى باس قولباسشىسىنىڭ ورىنباسارى قايرات ۇمبەتوۆ ءسوز سويلەدى.
ىشكى ىستەر ءمينيسترى ەرجان سادەنوۆ پوليتسيا قىزمەتى جاي عانا جۇمىس ەمەس, بۇل ومىرلىك ۇستانىم ەكەنىن ءاردايىم اتاپ وتەدى. بۇل قىزمەت وزگەنىڭ ءومىرى ءۇشىن ءوز ءومىرىن تاۋەكەلگە تىگۋگە دايىن, بەيبىت كۇندە دە, قيىن ساتتە دە ەرلىك جاساي الاتىن جاندارعا ارنالعان.
سالتاناتتى ءراسىم بارىسىندا ەلىمىزدىڭ ءار وڭىرىنەن كەلگەن 16 زاماناۋي قاھارمان – 15 پوليتسيا قىزمەتكەرى مەن ۇلتتىق ۇلاننىڭ ءبىر اسكەري قىزمەتشىسى ماراپاتتالدى.
ولاردىڭ بارلىعى شىنايى باتىلدىق پەن ادالدىقتىڭ ۇلگىسىن كورسەتكەن.
ماراپاتتالعاندار اراسىندا پوليتسيا اعا لەيتەنانتى ساعىندىق قۇرمانتاەۆ پەن ادىلەت سەرجانتى راحات بايلين بار. ولار باتىل ارەكەتتەرىنىڭ ارقاسىندا 2025 جىلدىڭ 23 ناۋرىزىندا كوكشەتاۋدا قايعىلى جاعدايدىڭ الدىن الدى.
سول كۇنى پوليتسياعا بەس قاباتتى تۇرعىن ۇيدە ءورت شىققانى تۋرالى حابارلاما تۇسكەن. العاشقىلاردىڭ ءبىرى بولىپ وقيعا ورنىنا ۋچاسكەلىك ينسپەكتور ساعىندىق قۇرمانتاەۆ پەن اقمولا وبلىسى بويىنشا قاج دەپارتامەنتىنىڭ قىزمەتكەرى راحات بايلين جەتتى. ولار پاتەر ىشىندە ەر ادام مەن بالانىڭ قالعانىن ءبىلىپ, ەش ويلانباستان ەسىكتى بۇزىپ كىرىپ, قويۋ ءتۇتىن باسقان بولمەدەن سەگىز جاستاعى بالانى الىپ شىققان. كەيىن قايتا كىرىپ, ەس-ءتۇسسىز جاتقان ەر ادامدى دا قۇتقارىپ قالعان.
بارلىق قاھارماندارعا ءىىم اتىنان العىس حاتتار مەن ەستەلىك سىيلىقتار تابىس ەتىلدى. شاراعا اكىمدىك وكىلدەرى, ىشكى ىستەر ورگاندارىنىڭ ارداگەرلەرى, «جاس ساقشى» پوليتسەي سىنىپتارىنىڭ وقۋشىلارى, سونداي-اق قىزمەت بابىندا قازا تاپقان قىزمەتكەرلەردىڭ جۇبايلارى مەن انالارى قاتىستى.
ءمينيستردىڭ اتىنان قازا تاپقان پوليتسەيلەردىڭ انالارى مەن جۇبايلارىنا گۇل شوقتارى جانە ەستەلىك سىيلىقتار تابىستالدى. سونداي-اق جاستاردى وتانسۇيگىشتىككە تاربيەلەۋگە بەلسەندى اتسالىسىپ جۇرگەن مەكتەپ ديرەكتورلارىنا العىس حاتتار بەرىلدى.
«قازىرگى زامان قاھارمانى» اكتسياسى 2011 جىلى تاراز قالاسىندا تەرروريستى ۇستاۋ كەزىندە قازا تاپقان پوليتسيا قىزمەتكەرى, حالىق قاھارمانى عازيز بايتاسوۆتىڭ ەرلىگىن ۇلىقتاۋعا ارنالعان يگى داستۇرگە اينالدى.