“قازاقستان” ورتالىق كونتسەرت زالىندا ينە شانشار ورىن بولعان جوق. گەرمانيا, اقش, رەسەي, ءتۇركيا, قىتاي ەلدەرىنىڭ ساحناسىندا ونەر كورسەتىپ جۇرگەن مايتالمان ارتىستەر وزدەرى كەلىپ ونەر كورسەتىپ جاتقاندا مۇنداي تاريحي وقيعادان كىمنىڭ شەت قالعىسى كەلەدى دەيسىڭ. رەسەيدىڭ حالىق ءارتىسى, ماسكەۋ ۇلكەن تەاترىندا باستى پارتيالاردى ورىنداۋشى نيكولاي تسيسكاريدزەنىڭ ونەرىن ءبىر تاماشالاپ قالعاننىڭ ءوزى نە تۇرادى؟ ساحنادا تاۋ قىرانىنداي قالىقتايتىن ءبيشى قالا كۇنىنە ورىس كومپوزيتورى يگور ستراۆينسكيدىڭ مۋزىكاسىنا جازىلعان “نارتسيسس” ءبيىن ادەيى دايىنداپ اكەلگەن كورىنەدى. باقىت تاڭىن اڭساعان عاشىق جۇرەكتىڭ ءلۇپىلىن جەتكىزەتىن شىعارما جەلىسى مۇنداعى جاستاردىڭ ارمان-مۇراتىمەن ۇيلەسە ورىلەدى. قاي جەردە بولسىن ادامزات بالاسىنىڭ مىزعىماس تىرلىگىنە تيەك بولار ماحاببات تولعامىنىڭ تولاعاي ۇمىتىنە جولىعاسىز. تەك سول ارماننىڭ اقجەلكەن ساۋلەسى ءومىر ايدىنىنا اداستىرماي الىپ شىقسىن دەڭىز.
قىتايدىڭ بالەت ونەرى وكىلدەرىنىڭ قالتقىسىز پلاستيكالىق قالىبىن قايتا-قايتا كورە بەرگىڭ كەلەتىنى عاجاپ. حالىقارالىق بايقاۋلاردىڭ لاۋرەاتتارى تساۋ شۋتسى مەن جانگ ءشيدىڭ ورىنداۋىنداعى ا.اداننىڭ “جيزەل” بالەتىندەگى كورىنىستەر قويىلىمعا شىعىستىق بوياۋ دارىتۋىمەن دارالانادى. وسىعان قوسا ك.بايسەيىتوۆا اتىنداعى ۇلتتىق وپەرا جانە بالەت تەاترىنىڭ ترۋپپاسى ا.ءبوروديننىڭ – “كنياز يگور”, ال نيۋ-يورك سيتي بالەتىنىڭ ونەرپازدارى ەشلي بۋدە مەن ەندريۋ ۆەيەت ل.گوتتشالكتىڭ – “تارانتەللا”, بەرلين شتاتسوپەردەن كەلگەن ەليزا كابرەرا مەن ميحايل كانيسكين د.روسسينيدىڭ – “Grand pas de deux”, انكارا مەملەكەتتىك وپەرا جانە بالەت تەاترىنىڭ تانىمال ءبيشىلەرى وزگە باشاران مەن باحري گيۋردجان پ.چايكوۆسكيدىڭ “ۇيقىداعى ارۋ” بالەتتەرىنەن كۇردەلى يىرىمدەردى يمەنبەي ورىنداپ, سۇيىسپەنشىلىككە بولەندى. قۇدايعا شۇكىر, مۇنداي الەمدىك ەسىمدەر قاتارىندا قازاقتىڭ دا تالانتتى ۇل مەن قىزدارى جەتەرلىك. سونىڭ ءبىرى دە بىرەگەيى, ءبۇگىندە تسيۋريح وپەرا جانە بالەت تەاترىندا ونەر كورسەتىپ جۇرگەن ءاليا تانىقپاەۆا مەن ك.بايسەيىتوۆا اتىنداعى ۇلتتىق وپەرا جانە بالەت تەاترىنىڭ ءارتىسى سەرجان كاۋىكوۆتىڭ ا.اداننىڭ “كورسار” بالەتىنەن كەلتىرگەن ءبىر ۇزىك كورىنىسى ۇزدىك ءورىلىپ, كوكەيدەن كەتپەستەي ءورنەك قالدىردى. استانا اسپانى قييالدىڭ قىلقۇيرىعىمەن جەلپىگەندەي ءاسەم سازبەن تولقىپ تۇردى.
قاراشاش توقسانباي.
* * *
شابىتتى قىزدىرعان “دەجاۆيۋ”
اتى الەمگە ءماشھۇر وپەرا جۇلدىزى دميتري حۆوروستوۆسكيدىڭ سازگەر يگور كرۋتويمەن بىرلەسىپ قويعان كونتسەرتىن ءونەرسۇيەر قاۋىم “قازاقستان” ورتالىق كونتسەرت زالىنان تاماشالادى.
حۆوروستوۆسكي مەن كرۋتويدىڭ بۇل جولعى ۇسىنعان “دەجاۆيۋ” جوباسىندا سان الۋان شىعارماشىلىق ستيل مەن ءتۇرلى جانرداعى 24 كومپوزيتسيا ورىندالدى. ادامنىڭ جان دۇنيەسىن تەبىرەنتەر كونتسەرتتە ۆيكتور پوپوۆتىڭ حور ونەرى اكادەمياسىنىڭ اكادەميالىق حورى جانە كونستانتين وربەلياننىڭ باسقارۋىنداعى كامەرالىق وركەسترى دە ءوز ونەرلەرىن ورتاعا سالدى.
اراي ۇيرەنىشبەكقىزى.