ەلىمىزدە تۇيە سۇتىنەن قۇرعاق ۇنتاق وندىرەتىن كاسىپورىندار كوپ ەمەس. وسى باعىتتاعى قۋاتتى ءوندىرىس ورنى تۇركىستان وبلىسىندا ورنالاسسا, ەكىنشىسى ارال اۋدانىندا ىسكە قوسىلاتىن بولدى. اۋداندا «Qazaq Camel» جشس-ءنىڭ «تۇيە سۇتىنەن قۇرعاق ۇنتاق شىعارۋ زاۋىتىن سالۋ» جوباسى اياسىنداعى جۇمىس قايتا جانداندى.
قۇنى 3 ملرد تەڭگە بولاتىن جوبا بىرنەشە جىل بۇرىن باستالعانىمەن, ءبىراز ۋاقىت قۇرىلىس جۇمىستارى توقتاپ قالعان ەدى. بيىل باستاماعا قايتا سەرپىن بەرىلىپ, اۋدان اكىمى امانجول وڭعارباەۆ ءوندىرىس ورنىندا بولىپ, جوبا جەتەكشىلەرىمەن كەزدەستى.
ارال ءتورت ت ۇلىكتىڭ تورەسى سانالاتىن تۇيە سانىنان باسقا اۋدانداردان الدا تۇر. قازىرگى ەسەپ بويىنشا اۋداندا 37 مىڭنان استام ويسىلقارا تۇقىمى بار. سوندىقتان ءوندىرىستى ءدال وسى ايماقتا جولعا قويۋ ءتيىمدى بولىپ وتىر.
بۇگىندە زاۋىتقا قىتايدان ارنايى ماماندار شاقىرىلىپ, ءونىم وندىرۋگە قاجەتتى قۇرىلعىلار ورناتىلىپ جاتىر. بۇعان دەيىن سالىنعان نەگىزگى عيمارات جانىنان ءسۇتتى كەپتىرۋگە ارنالعان قوسىمشا نىسان بوي كوتەرىپ كەلەدى.
ماماندار دەرەگىنشە زاۋىت تاۋلىگىنە 20 مىڭ ليتر تۇيە ءسۇتىن وڭدەي الادى. تۇرعىنداردان ءسۇت قابىلداۋ جۇيەسى دە جولعا قويىلعان. ءار اۋىلدان جينالاتىن شيكىزات ءوندىرىس ورنىنا ارناۋلى تەحنيكامەن جەتكىزىلەدى.
قازىر زاۋىت ءىشى – قاربالاسقا تولى. ماماندار قۇرىلعىلاردى تەحنيكالىق تالاپتارعا ساي ورناتىپ جاتىر. اۋدان اكىمى جوبا جەتەكشىسىمەن كەزدەسۋدە جەرگىلىكتى بيلىك تاراپىنان ءوندىرىس ورنىنا قاجەتتى قولداۋ كورسەتىلەتىنىن جەتكىزدى.
قىزىلوردا وبلىسى,
ارال اۋدانى