باتىس قازاقستان وبلىسىنىڭ قازتالوۆ اۋدانىندا جۇمىسشى ماماندىقتارى جىلى قورىتىندىلانىپ, اۋىل شارۋاشىلىعى قىزمەتكەرلەرى كۇنى اتالىپ ءوتتى.
كەڭ كولەمدى ءىس-شارا اۋدان اكىمدىگىنىڭ, شارۋا قوجالىعى جەتەكشىلەرى مەن كاسىپكەرلەردىڭ, «ەت يندۋسترياسى» جشس, «بايگە» فەدەراتسياسىنىڭ قولداۋىمەن ءوتتى. تالدىاپان اۋىلدىق وكرۋگىنىڭ ورتالىعىندا وتكەن مەرەكەدە «قۇرىلىسشىلار اۋىلى», «كاسىپكەرلەر اۋىلى», «شارۋالار اۋىلى», «قولونەرشىلەر اۋىلى», «ۇستازدار اۋىلى», «سپورتشىلار اۋىلى», «ونەرپازدار اۋىلى» سەكىلدى بولەك-بولەك وتاۋ تىگىلىپ, كيىز ۇيلەردە ءار سالا وكىلدەرى ءوز جەتىستىگى مەن تابىسىن كوپشىلىك نازارىنا ۇسىندى, جاڭا باستامالار مەن جوبالاردى تانىستىردى.
ءىس-شارا شەڭبەرىندە جۇمىسشى ماماندىقتارى جىلىنىڭ قازتالوۆ اۋدانىنداعى قورىتىندىسى شىعارىلىپ, اۋىل شارۋاشىلىعى, ەنەرگەتيكا, گاز, سۋ, تۇرعىن ءۇي-كوممۋنالدىق شارۋاشىلىعى سالالارىندا ۇزدىك ناتيجە كورسەتكەن ماماندار ماراپاتتالدى.
«حالقىمىزدا «ەڭبەك – ادامنىڭ كوركى, ادام – زاماننىڭ كوركى» دەگەن قاناتتى ءسوز بار. اۋىل ەڭبەككەرلەرىنىڭ ماڭداي تەرىمەن كەلگەن جەتىستىكتەر اۋدانىمىزدى وركەندەتىپ وتىر», دەدى اۋدان اكىمى اسلانبەك سارقۇلوۆ.
قاراسۋ اۋىلدىق وكرۋگىندەگى «داۋكەن» شارۋا قوجالىعىنىڭ شوپانى سالاۋات ەسەنگەلدين – «ۇزدىك شوپان», كوكتەرەك اۋىلدىق وكرۋگىندەگى «بەرجان» شارۋا قوجالىعىنىڭ مەحانيزاتورى رۋسلان يمانعاليەۆ – «ۇزدىك مەحانيزاتور», قازتالوۆ اۋىلدىق وكرۋگىنەن مانشۇك مالاەۆا – «ۇزدىك كاسىپكەر», قوشانكول اۋىلدىق وكرۋگىندەگى ء«المىرزا» شارۋا قوجالىعىنىڭ جىلقىشىسى سالاۋات ميتانوۆ – «ۇزدىك جىلقىشى», اقپاتەر اۋىلدىق وكرۋگىنەن سامات حاسانوۆ – «ۇزدىك جاڭا تەحنولوگيالاردى قولدانۋشى», بىرىك اۋىلدىق وكرۋگىنەن بەرىك قارابالين – «ۇزدىك ەنەرگەتيكا سالاسىنىڭ مامانى», جالپاقتال اۋىلدىق وكرۋگىندەگى «باتىس-ە» اۋىل شارۋاشىلىعى وندىرىستىك كووپەراتيۆىنىڭ جەتەكشىسى ەرنار ابىشەۆ – «ۇزدىك اۋىل شارۋاشىلىعى وندىرىستىك كووپەراتيۆى», قاراوبا اۋىلدىق وكرۋگىندەگى «عالىم» شارۋا قوجالىعىنىڭ جەتەكشىسى ابزال عالىموۆ – «ۇزدىك باۋ-باقشا ەگۋشى», بوستاندىق اۋىلدىق وكرۋگىنەن عادىلجان قوسپولوۆ – «ۇزدىك گاز سالاسىنىڭ مامانى», بولاشاق اۋىلدىق وكرۋگىنەن ەرلان دۇيسەنبيەۆ – «ۇزدىك مالشى», تەرەڭكول اۋىلدىق وكرۋگىندەگى «جالعاس» شارۋا قوجالىعىنىڭ جەتەكشىسى باتىربەك قاۋمەتوۆ – «ۇزدىك اسىل تۇقىمدى قوي شارۋاشىلىعى», قاراوزەن اۋىلدىق وكرۋگىندەگى «قاناتقالي» شارۋا قوجالىعىنىڭ جەتەكشىسى مەڭدىبەك ابۋعاليەۆ – «ۇزدىك اسىل تۇقىمدى ءىرى قارا مال شارۋاشىلىعى», قايىڭدى اۋىلدىق وكرۋگىنەن مارينا وتەۋليەۆا – «ۇزدىك مال دارىگەرى», تالدىاپان اۋىلدىق وكرۋگىنەن «ەت يندۋسترياسى» كاسىپورنى – «ۇزدىك ەكسپورتتاۋشى», تالدىقۇدىق اۋىلدىق وكرۋگىنەن سايلاۋ يشانعازيەۆ – «ۇزدىك كوممۋنالدىق شارۋاشىلىق قىزمەتكەرى», جاڭاجول اۋىلدىق وكرۋگىنەن دارحان بيسەنعاليەۆ «ۇزدىك سۋ شارۋاشىلىعىنىڭ مامانى» اتانىپ, ەستەلىك سىيلىقتارمەن ماراپاتتالدى.
ءىس-شارا بارىسىندا اۋىل شارۋاشىلىعى تەحنيكالارى مەن اسىل تۇقىمدى ت ۇلىكتىڭ كورمەسى ۇيىمداستىرىلدى. سالتانات ءداستۇرلى دالا قىزىقتارىنا ۇلاسىپ, ۇلتتىق سپورت ويىندارىمەن اياقتالدى.
باتىس قازاقستان وبلىسى