قانات بوزىمباەۆ وڭىرلەردىڭ قىسقى ماۋسىمعا دايىندىعىن جانە كوكتەمگى سۋ تاسقىنى قاۋپى جوعارى كەزەڭگە قاتىستى قابىلدانىپ جاتقان شارالاردى تەكسەردى, دەپ حابارلايدى Egemen.kz.
ەكولوگيا جانە تابيعي رەسۋرستار, سۋ رەسۋرستارى جانە يرريگاتسيا, جاساندى ينتەللەكت جانە تسيفرلىق دامۋ, توتەنشە جاعدايلار, كولىك مينيسترلىكتەرى مەن اقمولا, اقتوبە, باتىس قازاقستان, قوستاناي جانە سولتۇستىك قازاقستان وبلىستارىنىڭ اكىمدىكتەرى اتقارىلىپ جاتقان جۇمىستار تۋرالى ەسەپ بەردى.
ەل بويىنشا سۋ باسۋ قاۋپى بار 1242 ەلدى مەكەن انىقتالدى. ينجەنەرلىك جۇمىستار جوسپارى 800-دەن استام ءىس-شارانى قامتيدى, سونىڭ ىشىندە 557-ءسى ورىندالدى, قالعانى جۇرگىزىلۋ ساتىسىندا.
وڭىرلەردە 666 شاقىرىمعا جۋىق قورعانىس بوگەتتەرى مەن بىلىكتەرى سالىنىپ, جوندەلىپ, نىعايتىلدى. 356 شاقىرىم درەناج جۇيەسى جوندەلىپ, جاڭادان سالىندى, 220 شاقىرىم ارنا مەن ارىق رەتكە كەلتىرىلدى. قاۋىپتى ايماقتاردا 400 شاقىرىمنان استام وزەن جاعالاۋلارىن بەكىتۋ, ارنالاردى تەرەڭدەتۋ جانە تۇزەۋ جۇمىستارى اتقارىلدى.
قولدانىستاعى 31 ماۋسىمدىق گيدروبەكەتكە قوسىمشا, سۋ تاسقىنى قاۋپى جوعارى ۋچاسكەلەردە تاعى 32 دەڭگەي ولشەيتىن بەكەت ورناتىلادى. قاڭتار-ناۋرىز ايلارىندا قار جامىلعىسىنداعى ىلعال قورىن انىقتاۋ ءۇشىن قار ولشەۋ جۇمىستارى جۇرگىزىلەدى. وزەن الاپتارى بويىنشا, سونىڭ ىشىندە ترانسشەكارالىق وزەندەردە گيدرولوگيالىق بولجامدار جاسالدى. نەگىزگى وزەندەردە باتيمەتريالىق زەرتتەۋ جانە توپوگرافيالىق تۇسىرىلىمدەر جۇرگىزىلۋدە. Tasqyn اقپاراتتىق جۇيەسىنىڭ ينتەرفەيسى جاڭارتىلىپ, دەرەكقورى تولىقتىرىلۋدا.
بارلىق سۋ قويمالارى بەكىتىلگەن جۇمىس ءتارتىبى بويىنشا پايدالانىلۋدا. ەلدى مەكەندەرگە جاقىن ورنالاسقان وزەندەردىڭ 800 شاقىرىمنان استام ۋچاسكەسىندە ارنالاردى تازارتۋ جانە رەتكە كەلتىرۋ جۇمىستارى جوسپارلانعان.
رەسپۋبليكالىق ماڭىزى بار اۆتوجولداردا كۇردەلى جانە ورتاشا جوندەۋ اياسىندا 227 سۋ وتكىزۋ نىسانى ورناتىلدى, جىل باسىنان بەرى 200-دەن استام سۋ وتكىزگىش قۇبىر سالىندى, تاعى 169-ىنىڭ قۇرىلىسى جالعاسۋدا. شىعىس قازاقستان جانە قوستاناي وبلىستارىندا 5 كوپىرگە كۇردەلى جوندەۋ جۇرگىزىلدى.
الدىن الا بولجام بويىنشا, الداعى قىس قالىپتى جىلى بولادى دەپ كۇتىلۋدە, جاۋىن-شاشىن مولشەرى ەل اۋماعىنىڭ باسىم بولىگىندە كليماتتىق نورمادان اسپايدى. الايدا «تەمپەراتۋرالىق اۋىتقۋلار» ناتيجەسىندە قار قاباتىندا مۇزدى قىرتىس ءتۇزىلۋى مۇمكىن, بۇل ءوز كەزەگىندە سۋ تاسقىنى جاعدايىن قيىنداتۋى مۇمكىن.
قانات بوزىمباەۆ بارلىق دايىندىق جۇمىستارىن قىس تۇسكەنگە دەيىن تولىق اياقتاۋدى تاپسىردى. اكىمدەرگە – جاعدايدى جەكە باقىلاۋدا ۇستاۋدى, توتەنشە جاعدايلار مينيسترلىگىنە – سۋ تاسقىنى قاۋپى جوعارى وڭىرلەرگە بارىپ, جۇرگىزىلىپ جاتقان جۇمىستاردىڭ بارىسىن تەكسەرۋدى جۇكتەدى.
سۋ رەسۋرستارى جانە يرريگاتسيا مينيسترلىگىنە سۋ قويمالارىن تۇراقتى باقىلاۋدا ۇستاپ, تاسقىن سۋلاردى قابىلداۋعا جەتكىلىكتى بوس كولەمنىڭ بولۋىن قامتاماسىز ەتۋ, سونداي-اق كورشىلەس ەلدەرمەن ترانسشەكارالىق وزەندەردەگى سۋ اعىمدارى بويىنشا دەرەكتەر الماسۋدى جۇيەلى تۇردە جۇرگىزۋدى تاپسىردى.