استانا قالاسىنىڭ اكىمى جەڭىس قاسىمبەك نۇرا اۋدانى تۇرعىندارىمەن كەزدەسۋ بارىسىندا جاڭا جۇمىس ۋاقىتىنىڭ رەجيمىنە نەگىزىنەن مەملەكەتتىك ورگانداردىڭ, ۇلتتىق جانە كوممۋنالدىق كومپانيالاردىڭ قىزمەتكەرلەرى كوشكەنىن ايتتى, دەپ حابارلايدى Egemen.kz.
«قازىرگى تاڭدا 36–38 مىڭ استانالىق جاڭا جۇمىس كەستەسىمەن ەڭبەك ەتىپ جاتىر. بۇل مەملەكەتتىك مەكەمەلەر مەن ۇلتتىق كومپانيالاردىڭ, سونداي-اق كوممۋنالدىق سالانىڭ وكىلدەرى. ناتيجەسى قاراشا ايىنىڭ سوڭىنا قاراي ايقىن كورىنەدى دەپ سەنەمىز», دەدى قالا باسشىسى.
اكىمنىڭ سوزىنشە, كولىك قوزعالىسىن رەتتەۋگە باعىتتالعان بۇل شارامەن قاتار قوعامدىق كولىكتى دامىتۋ جۇمىستارى دا بەلسەندى ءجۇرىپ جاتىر.
«سوڭعى ەكى جارىم جىلدا قالاداعى اۆتوبۋس پاركتەرىن تۇگەل ارالاپ شىقتىم. وسى ۋاقىت ىشىندە 800-900 اۆتوبۋس جاڭارتىلدى, بۇل بۇكىل اۆتوپاركتىڭ 40 پايىزى. كەلەسى جىلى تاعى شامامەن 400 جاڭا اۆتوبۋس ساتىپ الۋدى جوسپارلاپ وتىرمىز. حالىقتى قوعامدىق كولىكتى كوبىرەك پايدالانۋعا شاقىرامىز», دەدى جەڭىس قاسىمبەك.
بيىل اۆتوبۋستاردىڭ ورتاشا قوزعالىس جىلدامدىعى وتكەن جىلمەن سالىستىرعاندا 3,5 شاقىرىمعا ارتقان. ەگەر بىلتىر تاۋلىگىنە شامامەن 800 مىڭ ادام اۆتوبۋس قىزمەتىن پايدالانسا, قازىر بۇل كورسەتكىش 1 ميلليون 150 مىڭعا جەتكەن.