رەسپۋبليكا كۇنى قارساڭىندا الماتىنىڭ جەدەل مەديتسينالىق جاردەم قىزمەتى جاڭارىپ, 50 ارنايى كولىكتىڭ كىلتىن قالا اكىمى دارحان ساتىبالدىنىڭ ءوزى تابىستادى, دەپ حابارلايدى Egemen.kz.
مەملەكەتتىڭ قولداۋىمەن مەگاپوليس اۆتوپاركى س كلاستى 12 رەانيموبيل مەن ۆ كلاستى 38 اۆتوكولىكپەن تولىعا ءتۇستى. بارلىق كولىكتەر زاماناۋي مەديتسينالىق قۇرىلعىلارمەن تولىق جابدىقتالعان جانە حالىقارالىق تالاپقا تولىق ساي كەلەدى.
قالا باسشىسى اۆتوپاركتىڭ جاڭارۋى الماتىداعى دەنساۋلىق ساقتاۋ جۇيەسىن مودەرنيزاتسيالاۋدىڭ ماڭىزدى بولىگى ەكەندىگىن اتاپ ءوتىپ, بۇل شارا شۇعىل مەديتسينالىق كومەكتىڭ ساپاسى مەن جەدەلدىگىن ارتتىرۋعا مۇمكىندىك بەرەتىنىن اتادى.
«الماتى – ەلىمىزدەگى ەڭ ءىرى ءارى قارقىندى دامىپ كەلە جاتقان مەگاپوليس. مۇندا تۇرعىندارعا ۋاقىتىلى ءارى ساپالى مەديتسينالىق كومەك كورسەتۋ ەرەكشە ماڭىزدى. زاماناۋي جابدىقتالعان جاڭا اۆتوكولىكتەر دارىگەرلەر مەن جۇرگىزۋشىلەرگە سەنىمدى كومەكشى بولادى. سىزدەردىڭ ەڭبەكتەرىڭىزدىڭ ارقاسىندا كۇن سايىن مىڭداعان ادامنىڭ ءومىرى قۇتقارىلادى. ءبىز سىزدەردىڭ كاسىبيلىكتەرىڭىزدى جانە حالىققا ادال قىزمەتتەرىڭىزدى جوعارى باعالايمىز», دەدى دارحان ساتىبالدى.
بۇگىندە الماتى قالاسىنىڭ جەدەل مەديتسينالىق جاردەم قىزمەتى 14 بەكەت پەن 188 شۇعىل قىزمەت بريگاداسىنان تۇرادى. ديسپەتچەرلىك ورتالىق تاۋلىگىنە شامامەن 3 مىڭ قوڭىراۋ قابىلدايدى, ال بريگادالار كۇنىنە 2600-گە جۋىق شاقىرتۋعا شىعادى.