قازاننىڭ 22-ءسى كۇنى استاناداعى «Kinopark 7 IMAX Keruen» كينوتەاترىندا «كاپيتان بايتاسوۆ» كوركەم ءفيلمىنىڭ جابىق كورسەتىلىمى وتەدى. مادەنيەت جانە اقپارات مينيسترلىگىنىڭ قولداۋىمەن ش.ايمانوۆ اتىنداعى «قازاقفيلم» كينوستۋدياسى مەن ۇلتتىق كينونى قولداۋ مەملەكەتتىك ورتالىعى بىرلەسە تۇسىرگەن تۋىندى شىنايى وقيعاعا نەگىزدەلگەن.
جابىق كورسەتىلىمى 23-ءى كۇنى الماتىدا وتەتىن كوركەم ءفيلمدى ەرەكشە اتاۋىمىزدىڭ سەبەبى بار. تۋىندى جەلىسى سوناۋ 2011 جىلدىڭ 12 قاراشاسىندا تاراز قالاسىندا ەلدى ءدۇر سىلكىندىرگەن اۋىر وقيعاعا قۇرىلعان. قارۋ-جاراق دۇكەنىنە جاسالعان قارۋلى شابۋىل سوڭى قايعىلى جاعدايعا ۇلاسىپ, بەيبىت تۇرعىندار اراسىندا ۇلكەن ۇرەي تۋعىزدى. جيھاد يدەياسىن ۇستانعان قىلمىسكەر بىرنەشە قارۋلى شابۋىل جاساپ, سونىڭ سالدارىنان قاۋىپسىزدىك جانە قۇقىق قورعاۋ ورگاندارىنىڭ قىزمەتكەرلەرى قازا تاپتى. وقيعا سوڭىندا ول ءوزىن-ءوزى جارىپ جىبەرىپ, قايعىلى جاعدايمەن اياقتالدى.
سول كۇن حالىق جادىندا پوليتسيا كاپيتانى عازيز بايتاسوۆتىڭ ەسىمىمەن ماڭگى ساقتالدى. ول ءوزىن قۇربان ەتىپ, ونداعان ادامنىڭ ءومىرىن ساقتاپ قالدى. مىنا «كاپيتان بايتاسوۆ» ءفيلمى – سول ەرلىكتىڭ ەستەلىگى. باتىردىڭ بۇل ەرلىگى وتانسۇيگىشتىكتىڭ, پارىز بەن ادالدىقتىڭ رامىزىنە اينالدى دەسە بولعانداي.
«كاپيتان بايتاسوۆ» ءفيلمى – دراما مەن ەكشن جانرىنداعى كورەرمەندى تەرەڭ ويعا جەتەلەيتىن فيلم. جاڭا تۋىندى ەرلىك پەن ادامگەرشىلىك, ار مەن نامىستى ايگىلەيدى.
كوركەم تۋىندىنىڭ قويۋشى رەجيسسەرى – داۋرەن قامشىباەۆ. باستى رولدەردى تانىمال ارتىستەر ازامات ساتىبالدى, ەركەبۇلان دايىروۆ, اسان ماجيت, دارحان سۇلەيمەنوۆ, قوبىلاندى بولات, سامال ەسلياموۆا سومدايدى.