قازان ايىنىڭ ءۇشىنشى جەكسەنبىسىندە ورمان شارۋاشىلىعى قىزمەتكەرلەرى كۇنى اتالىپ وتەدى. بۇل كۇن – تابيعاتتىڭ بايلىعىن ساقتاپ, ونى ۇرپاقتان-ۇرپاققا امانات ەتۋ جولىندا ەڭبەك ەتىپ جۇرگەن بەينەتكەش قاۋىمعا دەگەن قۇرمەتتىڭ بەلگىسى. ورمان – ەلىمىزدىڭ باعا جەتپەس بايلىعى, تابيعاتتىڭ تىنىسى, تۇرعىنداردىڭ تىرشىلىك كوزى. پرەزيدەنت قاسىم-جومارت توقاەۆ تال ەگۋ, ورماندى القاپتاردى ساقتاۋ, ۇلعايتۋ ىسىنە ەرەكشە نازار اۋدارىپ وتىر. مەملەكەت باسشىسىنىڭ تاپسىرماسىمەن جاقىن جىلدارى ەلىمىزدىڭ ورمان القاپتارىندا 2 ملرد, ەلدى مەكەندەردە 15 ملن اعاش وتىرعىزىلادى.
ەلىمىزدە ءبىراز جىلداردان بەرى جۇيەلى تۇردە جۇزەگە اسىرىلىپ كەلە جاتقان «جاسىل ەل» باعدارلاماسى بار. جىل سايىن «بۇكىلحالىقتىق اعاش وتىرعىزۋ كۇنى» ەكولوگيالىق اكتسياسى وتكىزىلەدى. اكتسيانىڭ ماقساتى – ورمانداردى ساقتاۋ, قالپىنا كەلتىرۋ, كوبەيتۋ, اۋىل, اۋدان, ايماقتاردى اباتتاندىرۋ. كەيىنگى كەزەڭدە «تازا قازاقستان» جالپىۇلتتىق اكتسياسى اياسىندا دا جەر-جەرلەردە كوگالداندىرۋ, تال كوشەتتەرىن وتىرعىزۋعا قاتىستى كوپتەگەن جۇمىس اتقارىلدى. ورمان قورلارىن ساقتاۋ, كوبەيتۋ جونىندەگى شارالار بارشامىز ءۇشىن ەڭ اۋەلى جەر-انامىزدى ساۋىقتىرۋ ءۇشىن اسا قاجەت. ورمان – ۇلت بايلىعى, ادامزاتتىڭ اماناتى. ونى قورعاۋ – تەك وسى سالادا ەڭبەك ەتەتىن مامان, جۇمىسشىلاردىڭ عانا ەمەس, ءاربىر سانالى ازاماتتىڭ پارىزى.