الماتىدا مينيسترلەر دەڭگەيىندەگى ازيا جانە وكەانيا ەلدەرىنىڭ سپورتتاعى دوپينگپەن كۇرەس بويىنشا 12-ءشى ۇكىمەتارالىق كەڭەسى ءوتتى. دۇنيەجۇزىلىك دوپينگكە قارسى اگەنتتىك ۇيىمداستىرعان جىلداعى كەزدەسۋدىڭ بۇل جولعى وتىرىسى حالىقارالىق دەڭگەيدەگى بارلىق سپورت تۇرىندە دوپينگپەن كۇرەستە جاردەمدەسۋ, ۇيلەستىرۋ جانە باقىلاۋ شارالارىنا ارنالدى.
حالىقارالىق دوپينگكە قارسى كونۆەنتسيانىڭ 26 مۇشە-مەملەكەتى وكىلدەرى ەكى كۇن بويى ۇلتتىق جانە ايماقتىق دوپينگكە قارسى ۇيىمداردىڭ قىزمەتى بويىنشا بايانداما جاساپ, تاجىريبەسىمەن ءبولىستى, سونداي-اق, ازيا جانە وكەانيا ەلدەرى دوپينگكە قارسى ۇيىمدارى اراسىندا ىنتىماقتاستىق پەن سەرىكتەستىكتى نىعايتا وتىرىپ, سپورتتا دوپينگپەن ءتيىمدى كۇرەستىڭ يننوۆاتسيالىق ادىستەرى مەن قۇرالدارىن تالقىلادى.
كەزدەسۋ باعدارلاماسى كەڭ اۋقىمدى ماسەلەلەردى قامتىدى. اتاپ ايتقاندا, دۇنيەجۇزىلىك دوپينگكە قارسى كودەكستىڭ بولاشاعى, سپورتتا دوپينگكە قارسى يۋنەسكو حالىقارالىق كونۆەنتسياسى تاراپتارىنىڭ كونفەرەنتسياسى, ازيا ايماعىنىڭ دۇنيەجۇزىلىك دوپينگكە قارسى كۇرەس قىزمەتىندەگى ۇلەسى, مەديتسينالىق اسپەكتىلەر مەن «تازا سپورتشىنى» قورعاۋدا قىزمەتكەرلەردىڭ ءرولى, سونداي-اق, سپورتشىلارمەن ديسكۋسسيالىق توپتار ۇيىمداستىرۋ ماسەلەلەرى جان-جاقتى ءسوز بولدى.
شاراعا قاتىسۋ ءۇشىن استانادان ارنايى كەلگەن قازاقستان سىرتقى ىستەر ءمينيسترى ەرلان ىدىرىسوۆ ونىڭ الماتىدا وتكىزىلۋ ەرەكشەلىگى مەن سەبەبىن اتاپ ءوتتى: «بىرنەشە اپتادان كەيىن 2022 جىلعى قىسقى وليمپيا ويىندارىن وتكىزۋدە الماتى ۇسىنىسى قارالىپ, وسى ماسەلە بويىنشا شەشىم قابىلداناتىن بولادى», دەدى قازاقستان سىرتقى ساياسات ۆەدومستۆوسىنىڭ باسشىسى.
مينيستر, سونداي-اق, قىسقى وليمپيا ويىندارىن وتكىزۋ ءۇشىن الماتى ۇسىنىپ وتىرعان تابيعي ورتانىڭ ارتىقشىلىقتارىن اتاپ كورسەتتى. سونىمەن قاتار, ول قازاقستاندىقتاردىڭ سپورتقا جاقىن ەكەندىگىن جانە سپورت كەشەندەرى مەن تازا اۋادا قىسى-جازى ونىمەن بەلسەندى شۇعىلداناتىنىن ايتتى. «ءتۇرلى دارمەكتەر, ستەرويدتار جانە دوپينگتىڭ وزگە تۇرلەرى ونى قابىلداعان ادامنىڭ دەنساۋلىعىنا زيان كەلتىرەدى. سوندىقتان مۇنداي كەڭەستىڭ ماڭىزى وتە زور», – دەدى ءوزىنىڭ سوزىندە مينيستر.
ءسوزىنىڭ سوڭىندا ە.ىدىرىسوۆ شاراعا قاتىسۋشىلاردى الماتىدا 2022 جىلعى قىسقى وليمپيا ويىندارىندا قايتا كەزدەستىرسىن دەگەن نيەتىن ءبىلدىردى.
«ەگەمەن-اقپارات».