«قارىزسىز قوعام» جوباسىنىڭ جەتەكشىسى دۋلات مىڭباەۆ دەرەگىنشە قازاقستاندا نەسيە جۇكتەمەسىن وتەي الماي جۇرگەن ازاماتتار سانى ءبىر جارىم ميلليوننان اسقان, دەپ حابارلايدى Egemen.kz.
مامانداردىڭ دەرەگىنشە, تەك استانانىڭ وزىندە قارىزىن 90 كۇننەن بەرى تولەمەگەن تۇرعىندار سانى 116 مىڭعا جۋىقتاعان. بيىل سول بورىشكەرلەردىڭ شامامەن ۇشتەن ءبىرى ارنايى وقىتۋ كۋرستارىنا قاتىسىپ, قارجىلىق ساۋاتتىلىق نەگىزدەرىن مەڭگەرمەك.
جوبا اياسىندا قارجىگەرلەر مەن زاڭگەرلەر حالىققا قارىزدى باسقارۋ جولدارىن, بانكروتتىق راسىمدەۋ ءتارتىبىن جانە نەسيەلىك تاۋەكەلدەردەن ساقتانۋ تاسىلدەرىن تۇسىندىرەدى.
باعدارلاما ىسكە قوسىلعاننان بەرى 16 مىڭنان استام ادام ءدارىس تىڭداپ ۇلگەرگەن. ولاردىڭ باسىم بولىگى جەكە بانكروتتىقتى راسىمدەۋ جونىندە ناقتى كەڭەس العان.
جوبانىڭ ناتيجەسىندە 10 مىڭعا جۋىق ازامات ءوز ماسەلەسىن سوتقا جەتكىزبەي بانكروتتىق ءراسىمىن باستاعان. ال 500-دەن استام ادامنىڭ ءىسى قازىر سوت ارقىلى قارالۋدا.
مامانداردىڭ ايتۋىنشا, حالىقتىڭ قارجىلىق ساۋاتىن ارتتىرۋ – نەسيەلىك داعدارىستى ازايتۋدىڭ ەڭ ءتيىمدى جولى.