گازاداعى سوعىس باستالعانىنا ەكى جىل وتۋىنە بايلانىستى الەمنىڭ ونداعان ەلىندە پالەستينانى قولداۋ شەرۋلەرى ءوتتى. گەرمانيا, ۇلىبريتانيا, فرانتسيا, شۆەيتساريا, تۇركيا جانە لاتىن امەريكاسى مەملەكەتتەرىندە مىڭداعان ادام كوشەگە شىعىپ, بەيبىتشىلىك پەن ادىلدىك ورناۋىن تالاپ ەتتى. قاتىسۋشىلاردىڭ كوپشىلىگى ءيزرايلدىڭ اسكەري ارەكەتتەرىن ايىپتاپ, بەيبىت تۇرعىنداردى قورعاۋعا شاقىردى, دەپ جازادى Egemen.kz.
بىرىككەن ۇلتتار ۇيىمىنىڭ گۋمانيتارلىق ىستەر جونىندەگى ۇيلەستىرۋ باسقارماسى مەن گازا دەنساۋلىق ساقتاۋ مينيسترلىگىنىڭ دەرەكتەرىنە سايكەس, 2025 جىلدىڭ جازىنا دەيىنگى كەزەڭدە گازا سەكتورىندا 58 مىڭنان استام ادام قازا تاپقان, ال 1,9 ميلليونعا جۋىق تۇرعىن بىرنەشە رەت قونىس اۋدارۋعا ءماجبۇر بولعان. بۇل – ايماقتاعى حالىقتىڭ شامامەن 90 پايىزى. قاقتىعىس سالدارىنان ميلليونداعان ادام باسپاناسىز قالدى, ەلەكتر مەن اۋىزسۋ تاپشىلىعى ءالى دە شەشىلمەگەن كۇيدە.
بۇگىندە حالىقارالىق قاۋىمداستىق وكىلدەرى اتىستى توقتاتۋ مەن گۋمانيتارلىق دالىزدەر اشۋ قاجەتتىگىن ءجيى ايتىپ كەلەدى. الەم ەلدەرىنىڭ استانالارىندا وتكەن شەرۋلەر دە وسى ۇندەۋدى كۇشەيتىپ, بەيبىتشىلىككە شاقىرعان ادامزات داۋىسىنىڭ بىرىگۋىن كورسەتتى.