ەلىمىزدىڭ شىعىسىندا ورنالاسقان زايسان شەكارا وتريادىنا قاراستى «مايقاپشاعاي» باقىلاۋ-وتكىزۋ بەكەتىنىڭ باقىلاۋشىلارى قوماقتى قارجىنى جاسىرىن جولمەن الىپ وتپەك بولعان قىتاي ەلىنىڭ ازاماتىن ۇستادى.
اسپان استى ەلىنەن قازاقستانعا «يۋتون» اۆتوبۋسىمەن كەلە جاتقان 40 جاسار قىتايلىق وزىندە ەشقانداي زاڭسىز زاتتىڭ جوق ەكەندىگىن حابارلادى. ال اۆتوبۋستىڭ ۇڭعىل-شۇڭعىلىن تەرەڭدەتىپ قاراعان كەزدە ونىڭ ءبىر قۋىسىنان قوماقتى اقشا شىعا كەلدى. ساناپ جىبەرگەندە اناۋ-مىناۋ ەمەس –
3 000 000 تەڭگە بولىپ شىقتى, دەپ حابارلادى ۇقك شق ءباسپاسوز قىزمەتى.
اتالعان دەرەك بويىنشا قر اكىمشىلىك-قۇقىق بۇزۋشىلىق كودەكسىنىڭ 551-بابى, ياعني «تاۋارلاردى, قولما-قول اقشانى, جول چەكتەرىن, نەمەسە قۇندى قاعازداردى جاريالاماۋ نەمەسە دۇرىس جاريالاماۋ» بابى بويىنشا ءىس قوزعالىپ, كەدەن بەكەتىنە تاپسىرىلدى.