مەملەكەتتىك كەڭەسشى ەرلان قارين وتكىزگەن باسقوسۋعا پرەزيدەنت اكىمشىلىگى قۇرىلىمدىق بولىمشەلەرىنىڭ باسشىلارى, ورتالىق مەملەكەتتىك ورگانداردىڭ وكىلدەرى, سونداي-اق الماتى وبلىسىنىڭ اكىمى قاتىستى, دەپ حابارلايدى اقوردانىڭ ءباسپاسوز قىزمەتى.
— جيىندا ەتنوسارالىق قاتىناستاردى دامىتۋدىڭ وزەكتى ماسەلەلەرى, مەملەكەتتىك اپپارات جۇمىسىنا جاڭا تەتىكتەردى ەنگىزۋ, جاڭا قوعامدىق ەتيكانى قالىپتاستىرۋعا باعىتتالعان يدەولوگيالىق قىزمەتتى جەتىلدىرۋ شارالارى قاراستىرىلدى. مەملەكەتتىك كەڭەسشى يدەولوگيالىق جۇمىستىڭ فورمالارىن ۇنەمى جاڭعىرتۋ, جاۋاپكەرشىلىك پەن سىيلاستىق مادەنيەتىن ىلگەرىلەتۋ قوعامدىق كەلىسىمدى نىعايتۋدىڭ ماڭىزدى شارتى ەكەنىن اتاپ ءوتتى, — دەلىنگەن اقوردا تاراتقان اقپاراتتا.
كەڭەس قورىتىندىسى بويىنشا مەملەكەتتىك ورگاندار مەن ءوڭىر اكىمدەرىنە قوعامدىق-ساياسي تۇراقتىلىقتى نىعايتۋعا باعىتتالعان كۇش-جىگەردى بىرىكتىرۋ جونىندە ناقتى تاپسىرمالار بەرىلدى.
بۇدان بۇرىن الماتىدا قازاقستان-رەسەي ەكىنشى مەديافورۋمى ۇيىمداستىرىلعانى بەلگىلى بولدى. وعان ەكى ەلدىڭ جەتەكشى مەدياقۇرىلىمدارىنىڭ باسشىلارى قاتىستى. سونىمەن قاتار قازاقستان رەسپۋبليكاسىنىڭ مەملەكەتتىك كەڭەسشىسى ەرلان قارين مەن رەسەي فەدەراتسياسى پرەزيدەنتى اكىمشىلىگى باسشىسىنىڭ ورىنباسارى — رەسەي پرەزيدەنتىنىڭ ءباسپاسوز حاتشىسى دميتري پەسكوۆ مەديافورۋم قاتىسۋشىلارىنا ارناپ قۇتتىقتاۋ ءسوز سويلەدى.