قازتالوۆ اۋدانىندا تۇڭعىش رەت «Kaztalov-Invest» اۋداندىق ينۆەستيتسيا فورۋمى ءوتتى. فورۋمدا وكرۋگ اكىمدەرى مەن كاسىپكەرلەر اراسىندا جالپى قۇنى 1 ملرد 133,4 ملن تەڭگەگە تەڭ 13 جوبا بويىنشا مەموراندۋمعا قول قويىلدى.
«ەلدىڭ ەكونوميكالىق الەۋەتىن ارتتىرۋ, جاڭا مۇمكىندىكتەرگە جول اشۋ ماقساتىندا اۋدانىمىزدا كەشەندى شارالار تىزبەگىن قولعا الدىق. مەملەكەت باسشىسى جولداۋدا: «ينۆەستيتسيا تارتۋ – ورتالىق اتقارۋشى ورگانداردىڭ عانا مىندەتى ەمەس. وسى ماڭىزدى جۇمىسقا جەرگىلىكتى بيلىك تە اتسالىسىپ, ءبارى جۇمىلا جۇمىس ىستەۋگە ءتيىس» دەپ اتاپ وتكەن ەدى. سوندىقتان بۇگىنگى فورۋم – اۋدانىمىزدىڭ الەۋەتىن تانىتىپ, جاڭا سەرىكتەستىكتەرگە جول اشاتىن, ورتاق ماقساتقا قول جەتكىزۋگە ارنالعان ءتيىمدى الاڭ بولدى», دەيدى قازتالوۆ اۋدانىنىڭ اكىمى اسلانبەك سارقۇلوۆ.
باتىس قازاقستان وبلىستىق كاسىپكەرلىك جانە يندۋستريالدىق-يننوۆاتسيالىق دامۋ باسقارماسىنىڭ باسشىسى نۇرجان وتەپباەۆتىڭ ايتۋىنشا, مەملەكەتتىڭ جۇيەلى قولداۋى ارقاسىندا وبلىستا بيىل جىل باسىنان بەرى جۇمىس ىستەپ تۇرعان شاعىن جانە ورتا كاسىپكەرلىك نىساندارىنىڭ سانى 1,8%-عا ارتىپ, 59 153 بىرلىككە جەتىپتى. قازىر بۇل سالادا جالپى سانى 120,3 مىڭ ادام قىزمەت ەتىپ, ناپاقا تاۋىپ ءجۇر. ۇدەرىس قازتالوۆ اۋدانىندا دا جاقسى ءجۇرىپ جاتىر. ونى وسى فورۋم الدىندا ۇيىمداستىرىلعان جەرگىلىكتى كاسىپكەرلەردىڭ ونىمدەرى كورمەسىنەن دە بايقادىق.
مىسالى, «قابىعاليەۆ» جەكە كاسىپكەرلىگىنىڭ جەتەكشىسى اقىلبەك قابدىعاليەۆ «اۋىل اماناتى» باعدارلاماسى اياسىندا نەسيە الىپ, قازتالوۆ اۋىلىندا شاتىرعا قاجەتتى قوسالقى بولشەكتەر وندىرۋگە كىرىسكەن. اياۋجان ساميعوللاقىزى قاراوبا اۋىلىندا ەت ونىمدەرى مەن شۇجىق شىعارا باستاعان. بىرىك اۋىلدىق وكرۋگىندە قۇس شارۋاشىلىعىن قولعا العان «ماناس» جەكە كاسىپكەرلىگىنىڭ جەتەكشىسى ماناس اسىلحان ۇلىنىڭ ەڭبەگى دە ماقتاۋعا تۇرارلىق.
فورۋمنىڭ پلەنارلىق وتىرىسىندا مەملەكەتتىك قولداۋ تەتىكتەرى مەن كاسىپكەرلىكتى دامىتۋ جايىندا دا كەڭىنەن ايتىلدى.
اۋداندا اۋىل شارۋاشىلىعى مەن كاسىپكەرلىك سالادا جەمىستى ەڭبەك ەتىپ جۇرگەن ازاماتتار از ەمەس. اقپاتەر اۋىلدىق وكرۋگىندە ەكپەشوپ ءوسىرىپ, مال ازىعىن الىپ جاتقان «ەر-قوجا» شارۋا قوجالىعىنىڭ جەتەكشىسى, وبلىستىق ءماسليحات دەپۋتاتى سامات حاسانوۆ, قاراوبا اۋىلدىق وكرۋگىندە دايىن ءونىم وندىرۋگە مەملەكەتتەن قايتارىمسىز گرانت الىپ, كاسىبىن دوڭگەلەتكەن «دايار» جەكە كاسىپكەرلىگىنىڭ نەگىزىن قالاۋشى جانايدار رىسقالي ۇلى, مەملەكەتتىك قايتارىمسىز گرانت جانە «اۋىل اماناتى» باعدارلاماسى ارقىلى نەسيە الىپ قۇس شارۋاشىلىعىن دامىتىپ وتىرعان ماناس اسىلحان ۇلى فورۋمدا تاجىريبەسىن ورتاعا سالدى. اقكول جاعاسىندا دەمالىس ايماعىن قۇرىپ, قوناقۇي سالعان سۇلتان سارتاەۆ جاڭا كاسىبى تۋرالى ايتىپ بەردى.
اۋىلدا وتكەن ينۆەستيتسيا فورۋمى اۋىل ەكونوميكاسىن دامىتۋعا باعىتتالعان جاڭا كەزەڭ بولسا كەرەك. بۇل جوبالار جۇزەگە اسقان جاعدايدا اۋىلدىڭ ەكىنشى تىنىسى اشىلىپ, حالىقتىڭ الەۋمەتتىك احۋالى جاقسارارى ءسوزسىز.
باتىس قازاقستان وبلىسى