ءال-فارابي اتىنداعى قازاق ۇلتتىق ۋنيۆەرسيتەتىندە «ماتەماتيكا, مەحانيكا جانە اقپاراتتىق تەحنولوگيالار» اتتى ح حالىقارالىق عىلىمي كونفەرەنتسيا ءوز جۇمىسىن باستادى, دەپ جازادى Egemen.kz.
اۋقىمدى عىلىمي شارا عىلىم جانە جوعارى ءبىلىم مينيسترلىگىنىڭ قولداۋىمەن ۇيىمداستىرىلۋدا.
كونفەرەنتسياعا قازاقستان, اقش, ۇلىبريتانيا, جاپونيا, يتاليا, رەسەي, پورتۋگاليا, پاكىستان, ازەربايجان, ليتۆا, گرۋزيا جانە باسقا دا ەلدەردىڭ كورنەكتى عالىمدارى مەن ساراپشىلارى قاتىسىپ جاتىر.
القالى جيىندى قازۇۋ-دىڭ باسقارما توراعاسى-رەكتور جانسەيىت تۇيمەباەۆ قۇتتىقتاۋ سوزبەن اشىپ, تسيفرلىق تەحنولوگيانىڭ ماڭىزىنا توقتالدى.
«تسيفرلىق تەحنولوگيالاردىڭ دامۋى – جاڭا مۇمكىندىكتەر مەن سىن-قاتەرلەر كەزەڭى. ەل پرەزيدەنتى قاسىم-جومارت توقاەۆ جولداۋىندا جاساندى ينتەللەكتى باسىم باعىت رەتىندە اتاپ ءوتتى. بۇگىندە بۇل – تەك زەرتتەۋ نىسانى عانا ەمەس, سونىمەن قاتار ينجەنەرلىك جانە وندىرىستىك مىندەتتەردى شەشۋدىڭ قۋاتتى قۇرالى. ۋنيۆەرسيتەتىمىز وسى باعىتتا بەلسەندى عىلىمي جوبالار جۇرگىزىپ, جاس عالىمدار مەن ستۋدەنتتەردى يننوۆاتسيالىق قىزمەتكە كەڭىنەن تارتۋدا», – دەي كەلە, رەكتور ۋنيۆەرسيتەتتىڭ عىلىمي ورتالىقتارى اتقارىپ جاتقان زەرتتەۋ جۇمىستارىمەن تانىستىردى.
سونىمەن قاتار اشىلۋ سالتاناتىندا قر ۇلتتىق ينجەنەرلىك اكادەمياسىنىڭ پرەزيدەنتى باقىتجان جۇماعۇلوۆ, قر ۇعا اكادەميگى ايدارحان قالتاەۆ, رەسەي عا كوررەسپوندەنت-مۇشەسى سەرگەي كابانيحين ءسوز سويلەپ, ماتەماتيكا مەن مەحانيكانىڭ ىرگەلى ماسەلەلەرى جايلى پىكىر ءبىلدىردى.
ءۇش كۇنگە سوزىلاتىن حالىقارالىق جيىن اياسىندا الەمدىك دەڭگەيدەگى عالىمداردىڭ قاتىسۋىمەن پلەنارلىق ماجىلىستەر; ماتەماتيكا, مەحانيكا, IT سالالارى بويىنشا سەكتسيالىق وتىرىستار; جاس زەرتتەۋشىلەر ءوز جوبالارىن ۇسىناتىن ستەندتىك سەسسيالار; «عىلىم مەن ينجەنەرياداعى جاساندى ينتەللەكت: سىن-قاتەرلەر مەن مۇمكىندىكتەر» اتتى دوڭگەلەك ۇستەل جانە وزگە دە شارالار جوسپارلانعان.
كونفەرەنتسيا بارىسىندا قازاقستان جانە رەسەي ۇلتتىق عىلىم اكادەميالارىنىڭ اكادەميكتەرى, پيتتسبۋرگ ۋنيۆەرسيتەتى, پادۋيا ۋنيۆەرسيتەتى, لوندون ۋنيۆەرسيتەتى (Queen Mary), نازارباەۆ ۋنيۆەرسيتەتى جانە وزگە دە جەتەكشى عىلىمي ورتالىقتار پروفەسسورلارى بايانداما جاسادى. سونداي-اق ۇزدىك باياندامالار مەن زەرتتەۋلەر ارنايى سىيلىقتارمەن ماراپاتتالماق.
باسقوسۋدا ماتەماتيكا مەن مەحانيكانىڭ ىرگەلى جانە قولدانبالى ماسەلەلەرى, روبوتوتەحنيكا, اقپاراتتىق تەحنولوگيالار جانە جاساندى ينتەللەكت سالاسىنداعى سوڭعى جەتىستىكتەر تالقىلانادى.