2022 جىلدان باستاپ بۇگىنگى كۇنگە دەيىن مەملەكەت مەنشىگىنە 13,7 ملن گەكتار جەر قايتارىلعان. ۇكىمەتتىڭ ءباسپاسوز قىزمەتىنىڭ مالىمەتىنشە, ونىڭ ىشىندە 6,2 ملن گەكتارى قايتا بولىنگەن, دەپ جازادى Egemen.kz.
2,1 ملن گەكتار جەر ەلدى مەكەندەرگە جاقىن ورنالاسقاندىقتان, اۋىل تۇرعىندارىنىڭ مال جايۋىنا ورتاق پايدالانۋعا بەرىلسە, قالعان 4,1 ملن-ى اۋىل شارۋاشىلىعى تاۋارلارىن وندىرۋشىلەر اراسىندا كونكۋرس ارقىلى بولىنگەن. سونىمەن قاتار جەر پايدالانۋشىلار وزدەرىنە تيەسىلى 4 ملن گەكتار جەردى يگەرۋگە كىرىسكەن.
18 قىركۇيەك كۇنى ۆيتسە-پرەمەر – ۇلتتىق ەكونوميكا ءمينيسترى سەرىك جۇمانعاريننىڭ توراعالىعىمەن وتكەن جەر رەسۋرستارىن ۇتىمدى پايدالانۋ جونىندەگى رەسپۋبليكالىق كوميسسيا وتىرىسىندا پايدالانىلماي جاتقان اۋىل شارۋاشىلىعى جەرلەرىن ءبولۋ ۇدەرىسىنىڭ تسيفرلىق فورماتقا كوشىرۋ ماسەلەسى دە تالقىلاندى.
جالپى اۋىل شارۋاشىلىعى جەرلەرىن ء(شولدى اۋماقتاردان باسقا) تسيفرلاندىرۋ 2024 جىلى اياقتالعان. بۇگىندە 197,9 ملن گەكتار جەردىڭ كارتاسى اشىق فورماتتا قولجەتىمدى, بۇل ەل اۋماعىنىڭ 72,6%-ىن قۇرايدى. جۇمىستار تولىعىمەن 2025 جىلدىڭ سوڭىنا دەيىن اياقتاۋ جوسپارلانعان.
كوميسسيا وتىرىسىندا سونداي-اق جەر رەسۋرستارىن باسقارۋ كوميتەتىنىڭ اۋماقتىق بولىمشەلەرىنىڭ جىل باسىنان بەرگى قىزمەتى تۋرالى اقپارات بەرىلدى. بارلىعى 2,1 ملن گەكتار جەرگە 1381 جوسپاردان تىس تەكسەرۋ جۇرگىزىلگەن. ناتيجەسىندە 1,5 ملن گەكتاردى قامتيتىن 1013 زاڭ بۇزۋشىلىقتى جويۋ تۋرالى نۇسقاما بەرىلگەن.
قازىرگى تاڭدا بۇرىن بەرىلگەن نۇسقامالار بويىنشا 350,1 مىڭ گەكتار جەر يگەرىلە باستادى. ال 52,6 مىڭ گەكتار بويىنشا ءماجبۇرلى تۇردە قايتارىپ الۋ ءۇشىن سوت ىستەرى ءجۇرىپ جاتىر. جالپى قايتارىلۋى ءتيىس 2 ملن گەكتاردىڭ 1,55 ملن گەكتارى مەملەكەتكە قايتارىلدى.
«اۋىل شارۋاشىلىعى جەرلەرىن ءادىل ءبولۋ – حالىق ءۇشىن ەڭ وزەكتى ماسەلەلەردىڭ ءبىرى, جەر كوميسسيالارىنىڭ ارالاسۋىن بولدىرماي, ۇدەرىستى تولىقتاي ەلەكتروندى ءارى اشىق ەتۋ قاجەت», دەدى سەرىك جۇمانعارين.