كەشە ەلورداداعى №5 مامانداندىرىلعان ءورت ءسوندىرۋ ءبولىمىنىڭ اۋماعىندا ورنالاسقان جاڭا سپورت كەشەنىنىڭ سالتاناتتى اشىلۋى ءوتتى. وعان پرەمەر-مينيستر كارىم ءماسىموۆ ارنايى كەلىپ قاتىستى. الداعى استانا كۇنى مەرەكەسىنە ورايلاس اشىلىپ وتىرعان بۇل سپورت كەشەنىنىڭ سالتاناتىندا ءسوز العان ۇكىمەت باسشىسى بارشا ەلوردالىقتاردى كەلە جاتقان قالا كۇنى مەرەكەسىمەن جانە بۇگىنگى يگىلىككە بەرىلىپ وتىرعان سپورت كەشەنىمەن قۇتتىقتادى.
توتەنشە جاعدايلار مينيسترلىگى جىل سايىن ورتتىك-قۇتقارۋ سپورتى بويىنشا جازدىق, قىستىق چەمپيوناتتاردى وتكىزىپ كەلەدى. جارىس بارىسىندا ۇزدىك سپورتشىلار كوزگە ءتۇسىپ, ولار بىرقاتار سپورت تۇرلەرى بويىنشا ەل نامىسىن قورعايدى. جاڭا سپورت كەشەنىنىڭ اشىلۋى استانا قالاسى توتەنشە جاعدايلار دەپارتامەنتى ءۇشىن عانا ەمەس, سونىمەن قاتار, جالپى ەلوردا حالقى ءۇشىن دە ماڭىزدى وقيعا بولىپ تابىلادى.
سالتاناتتى اشىلۋ ءراسىمى اياسىندا سپورتشى – ءورت ءسوندىرۋشىلەردىڭ وقۋ مۇناراسىنداعى كورسەتىلىمدەرى قويىلدى. سونداي-اق, فۋتبول بويىنشا تۋرنيرلەر مەن كۇرەس (سامبو, ەركىن كۇرەس,) سايىستارى بولدى.
كەشەننىڭ قۇرىلىسى 2009 جىلدىڭ باسىندا باستالىپ, ونىمەن قازاقستاننىڭ وندىرىستىك, الەۋمەتتىك ينفراقۇرىلىمى مەن تۇرعىن ءۇي قورىنا ءوز ۇلەسىن قوسىپ كەلە جاتقان “اقمولاستروي” كورپوراتسياسى اينالىسقان. كەشەندە ءورت-وقۋ قالقاسىمەن 100 مەترلىك جولاعى (4 جولاق), باسسەين (25 م), جاۋىنگەرلىك جانە جاتتىعۋ زالدارى, كىشى فۋتبول, ۆولەيبول, تەننيسكە ارنالعان زالدار, جۇگىرۋ جولاقتارى بار اشىق فۋتبول الاڭى بار. سونىمەن قاتار, كەشەن الاڭىندا وقۋعا ارنالعان گاز-ءتۇتىن كامەرالارى ورنالاستىرىلعان. قۇرىلىستىڭ جالپى اۋماعى 2,5842 گەكتاردى الىپ جاتسا, ونى سالۋ ءۇشىن 700 ملن. تەڭگەدەن استام قاراجات ءبولىنىپتى.
جاتتىعۋ ورنىنىڭ بولۋى ءورت ءسوندىرۋشى مامانداردىڭ سپورتتىق شەبەرلىگىن ارتتىرۋ ءۇشىن وتە ماڭىزدى بولىپ تابىلسا, ول حالىقارالىق ارەنادا دا قازاقستاننىڭ نامىسىن الىپ شىعۋعا سەپتىگىن تيگىزبەك. سونداي-اق, توتەنشە جاعدايلاردىڭ سالدارىن جويۋعا قاجەتتى تاسىلدەردى جەتىلدىرۋ ءۇشىن دە اسا كەرەك كەشەن دەگەنىمىز ءجون.
ءابدىراحمان قىدىربەك.