ەلورداداعى ۇلتتىق كىتاپحانادا اقىن-جازۋشى, اۋدارماشى ايىپبەرگەن بالتاباي ۇلىنىڭ 75 جاسقا تولۋىنا وراي ء«سوز ونەرىنە عاشىق جان» اتتى شىعارماشىلىق كەش ءوتتى. كەشتە ء«بىر كەم دۇنيە» اتتى جىر كىتابى مەن يۆان پەرەۆەرزيننەن اۋدارعان «لەنا وزەنىنىڭ جاعالاۋىندا» اتتى روماننىڭ تانىستىرىلىمى ءوتتى.
شاراعا زيالى قاۋىم وكىلدەرى مەن كىتاپسۇيەر وقىرمان قاتىستى. العاشقى بولىپ ءسوز العان اكادەميك سەرىك نەگيموۆ اقىن تۋرالى:
«بۇل كىسى «Egemen Qazaqstan» گازەتىنە ءبىر ماقالام شىقسا, الا تاڭمەن تالاسا قوڭىراۋ سوعىپ, اقجارما نيەتىن بىلدىرەتىن. مىرجاقىپ دۋلات ۇلى ءبىر كەزدە «ويان, قازاق!» دەپ ۇران تاستاعان ەدى. وتكەن عاسىردىڭ بەل ورتاسىنداعى بۋىن ۇلتتىق ساناسى جاڭعىرىپ, ويانا باستادى. سول ەرتە ويانعانداردىڭ ءبىرى – ايىپبەرگەن بالتاباەۆ. قۇرىلىسشى, اۋداندىق ءماسليحات دەپۋتاتى سىندى جۇمىستار اتقارا ءجۇرىپ شىعارماشىلىقپەن اينالىستى. بۇگىنگى زاماندا كىتاپ وقۋ, جۋرنال وقۋ جاعى تۇرالاپ قالدى. ال ءبىزدىڭ ايەكەڭ سوناۋ جەتىسايدا جاتىپ ۇلكەن پوەزيالىق ەڭبەكتەر جازىپ, اۋدارمالار جاسادى. ال ومار حايامدى اۋدارۋى – بولەك تاقىرىپ. قۋاندىق شاڭعىتباەۆتان كەيىن مۇنداي تاۋەكەلگە بارۋدىڭ ءوزى ەرلىك دەر ەدىم. ويتكەنى ومار حايام – ءار شۋماعى تۇنىپ تۇرعان فيلوسوفياعا تولى كۇردەلى اقىن», دەدى.
ايىپبەرگەن بالتاباي ۇلى – كوپتەگەن جىر كىتابىنىڭ اۆتورى, نەمىس ويشىلى گەتەنىڭ 100-دەن اسا ولەڭ-جىرى مەن «رەينەكە تۇلكى» داستانىن, سونداي-اق پۋشكين, لەرمونتوۆ, ومار حايام, قۇمىق قىزى گۇلباعدات وماروۆانىڭ جىرلارىن ءتول تىلىمىزگە تارجىمالاعان. ال قازاق تىلىندە جارىق كورىپ وتىرعان «لەنا وزەنىنىڭ جاعالاۋىندا» رومانى – رەسەي جازۋشىسى يۆان پەرەۆەرزيننىڭ قايتا قۇرۋ الدىنداعى ياكۋت حالقىنىڭ تۇرمىس-تىرشىلىگىن جان-جاقتى سۋرەتتەيتىن سۇبەلى «ەنتسيكلوپەديالىق» تۋىندى. روماندا ماريا سۇلۋ مەن كەڭشار ديرەكتورى اناتولي پەتروۆيچ اراسىنداعى ماحاببات حيكاياسى ارقىلى سول ءداۋىردىڭ بەت-بەينەسى اشىلادى. ەلەۋلى تۋىندى حاقىندا ورىستىڭ تانىمال ادەبيەت سىنشىسى لەۆ اننينسكي: «بۇل رومان – ورىس پروزاسىنىڭ جادىندا ۇزاق ساقتالارى داۋسىز. شىعارما وسى كۇيىندە قالسا دا, نە جالعاسىن تاۋىپ, كوپتومدىق ەپوپەياعا اينالسا دا, ەش ارتىق ەتپەسى انىق», دەپ جوعارى باعا بەرىپتى.
ءىس-شاراعا قاتىسقان بەلگىلى جىرشى, ماناسشى بايانعالي ءالىمجانوۆ قالامگەر شىعارماشىلىعىنا توقتالدى.
«بۇل كىسى مايدانگەردىڭ بالاسى ەكەن. سول جاعىنان ۇقساستىعىمىز بار. ەكىنشىدەن, اعامىز قۇرىلىسشى اقىن. قۇرىلىسشى ماماندىعىن يەلەنە ءجۇرىپ, مىناداي ىرگەلى ەڭبەك جاساۋ ۇلكەن قۇمارلىقتان, عاشىقتىقتان تۋعان. باسقا ماماندىقتى يگەرسە دە, گۇلدىڭ تسەمەنتتى جارىپ شىعاتىن قايسار قاسيەتىندەي, اقىننىڭ تالانتى كەز كەلگەن كەدەرگىنى جارىپ شىعىپ, گۇلدەي ءوسىپ, كوركەيىپ تۇر دەپ ويلايمىن. گەتەنى العاش اباي اتامىز اۋدارسا, سول ىزگى ءداستۇردى جالعاپ, ءسىز ءارى قاراي دامىتقان ەكەنسىز. ال قۇمىق اقىنىن اۋدارعانىڭىز ۇلكەن ەڭبەك دەر ەدىم», دەدى ول.