اقتوبە قالاسىنداعى «قازاقستان حالقى اسسامبلەياسى» عيماراتىندا قازاقستان حالقى اسسامبلەياسىنىڭ «ءبىز – قازاقستان حالقىمىز» اتتى رەسپۋبليكالىق اكتسياسى اياسىندا فورۋم وتكىزىلدى.
اقتوبە وبلىسى قازاقستان حالقى اسسامبلەياسى اتقارۋشى حاتشىلىعىنىڭ مۇرىندىق بولۋىمەن, «قوعامدىق كەلىسىم» كوممۋنالدىق مەملەكەتتىك مەكەمەسى جانە ەتنومادەني بىرلەستىكتەرمەن بىرلەسە وتىرىپ ۇيىمداستىرعان بۇل شاراعا اقتوبە وبلىسى قازاقستان حالقى اسسامبلەياسى جانىنداعى انالار كەڭەسىنىڭ, «بىرلىك» اقساقالدار كەڭەسىنىڭ, «ارۋ انا» كوپ بالالى انالار قوعامدىق بىرلەستىگىنىڭ, جاستار قاناتىنىڭ مۇشەلەرى قاتىستى. قوعامدىق ومىرگە بەلسەنە ارالاسىپ جۇرگەن ايەلدەردىڭ القالى جيىنىن اقتوبە وبلىسى قازاقستان حالقى اسسسامبلەياسى حاتشىلىعىنىڭ مەڭگەرۋشىسى جولداس نۇرشين قىسقاشا ءسوز سويلەپ اشىپ, الدا بولاتىن كەزەكتەن تىس پرەزيدەنتتىك سايلاۋدىڭ ماڭىزىنا توقتالدى. ول جينالعاندارعا 26 ساۋىرگە تاعايىندالعان سايلاۋ تۋرالى جان-جاقتى اڭگىمەلەپ, سايلاۋ ۇدەرىسىنىڭ بۇگىنگى بارىسىنان حاباردار ەتتى.
ول ءوز سوزىندە انانىڭ جۇرەگى ارقاشاندا ءوز ەلىنىڭ تابىسى مەن قيىنشىلىعىن ەلدەن ەرەكشە سەزەتىنىن ايتا كەلىپ, بارلىق وڭىرلەردە قازاقستان حالقى اسسامبلەياسى جانىنان انالار كەڭەستەرى قۇرىلعانىن اتاپ ءوتتى. ايەلدەردىڭ وتباسىنىڭ اجارى عانا ەمەس, قوعامدىق ءومىردىڭ دە قۋاتتى كۇشى ەكەنىن ەسكە سالدى. انالاردىڭ رۋحاني جانە تاربيەلىك ءرولى, وتباسىلىق قۇندىلىقتاردى ساقتاۋ جانە دامىتۋ ارقىلى قوعامدىق كەلىسىمدى نىعايتۋعا باعا جەتكىسىز ۇلەس قوسىپ وتىرعانىنا توقتالدى. ەلىمىزدە وتكەلى جاتقان كەزەكتەن تىس پرەزيدەنتتىك سايلاۋدا دا اق جاۋلىقتى انالارىمىز بەن كورىكتى قىز-كەلىنشەكتەرىمىزدىڭ ۇيىمشىلدىق پەن بىرلىكتىڭ ۇيىتقىسى بولاتىنىنا سەنىم ارتتى.
ودان كەيىن ءسوز العان وبلىستىق قازاقستان حالقى اسسامبلەياسى جانىنداعى «بىرلىك» اقساقالدار كەڭەسىنىڭ توراعاسى ەركىن قۇرمانبەكوۆ, ۋكراينداردىڭ جەكسەنبىلىك مەكتەبىنىڭ وقىتۋشىسى ستالينا باليۋرا, «شاتلىق» تاتار-باشقۇرت ەتنومادەني بىرلەستىگىنىڭ باسقارما مۇشەسى رامزيا ەسەمباەۆا جانە باسقالارى ەلىمىزدەگى ۇلتارالىق تاتۋلىق پەن دوستىقتىڭ تۇعىرى بەرىكتىگىن تىلگە تيەك ەتتى, الدا بولاتىن سايلاۋدىڭ ۇيىمشىلدىقپەن وتۋىنە اتسالىساتىندىقتارىن جەتكىزدى.
فورۋمعا قاتىسۋشىلار ءوڭىر ايەلدەرىنە ارناپ ۇندەۋ قابىلدادى. وندا ەلىمىزدە, وتباسىنداعى تۇراقتىلىق پەن تابىستىڭ, بالالار مەن قازاقستان حالقىنىڭ جارقىن بولاشاعى انالارعا اسا قىمبات ەكەنى اتاپ كورسەتىلىپ, الدا بولاتىن قازاقستان رەسپۋبليكاسىنىڭ كەزەكتەن تىس پرەزيدەنت سايلاۋىنا بارشا قازاقستاندىقتاردى ءبىر كىسىدەي ۇيىمشىلدىقپەن قاتىسۋعا شاقىردى.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.