ونى وسى ۇيىمنىڭ باس حاتشىسى دميتري مەزەنتسەۆ باسقاراتىن بولدى
وتكەن اپتادا بەيجىڭ قالاسىندا شانحاي ىنتىماقتاستىق ۇيىمىنا مۇشە مەملەكەتتەر ۇلتتىق ۇيلەستىرۋشىلەر كەڭەسىنىڭ (ۇۇك) وتىرىسى ءوتتى.
وتىرىس بارىسىندا شىۇ-عا مۇشە مەملەكەتتەردىڭ ۇلتتىق ۇيلەستىرۋشىلەرى ۇستىمىزدەگى جىلدىڭ 9-10 شىلدەسىندە ۋفا قالاسىندا جوسپارلانعان مەملەكەت باسشىلارىنىڭ كەزەكتى سامميتىن جانە 2015 جىلعى باسقا دا ءىس-شارالاردى دايىنداۋ ماسەلەلەرىن قاراستىردى.ۇلتتىق ۇيلەستىرۋشىلەر شىۇ-نىڭ 2025 جىلعا دەيىنگى دامۋ ستراتەگياسىنىڭ جوباسىن ازىرلەۋ جانە ۇيىمدى كەڭەيتۋ تۋرالى پىكىر الماستى.
سونىمەن قاتار, تاراپتار 2015 جىلعى 29 ناۋرىزداعى وزبەكستان رەسپۋبليكاسى پرەزيدەنتىن سايلاۋ مەن 26 ساۋىردەگى قازاقستان رەسپۋبليكاسى پرەزيدەنت سايلاۋىنا قاتىساتىن شىۇ-دان بايقاۋشىلار ميسسياسىن قۇرۋ ماسەلەلەرىن تالقىلادى. شىۇ باس حاتشىسى دميتري مەزەنتسەۆ قازاقستانداعى پرەزيدەنتتىك سايلاۋدا شىۇ-نىڭ بايقاۋشىلار ميسسياسىن باسقاراتىن بولدى.
ۇۇك وتىرىسىندا قازاقستان دەلەگاتسياسىنا شىۇ قىزمەتىنىڭ ماسەلەلەرى جونىندەگى ۇلتتىق ۇيلەستىرۋشى, قازاقستان رەسپۋبليكاسى سىرتقى ىستەر مينيسترلىگىنىڭ ەرەكشە تاپسىرمالار جونىندەگى ەلشىسى ايدار ابىشەۆ جەتەكشىلىك ەتتى.
وتىرىستىڭ قورىتىندىسى بويىنشا حاتتاماعا قول قويىلدى.
«ەگەمەن-اقپارات».