مەملەكەت باسشىسىنا بيىلعى جەتى ايداعى سوت جۇيەسى قىزمەتىنىڭ قورىتىندىلارى جونىندە باياندالدى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
قاسىم-جومارت توقاەۆقا ازاماتتىق ىستەر بويىنشا داۋلاردى شەشۋدىڭ بالامالى ادىستەرىن قولدانۋ 24 پايىزعا, ياعني, 61 مىڭنان 76 مىڭعا دەيىن وسكەنى ايتىلدى. ولاردىڭ قاتارىندا مەدياتسيا, بىتىمگە كەلۋ مەن تاتۋلاستىرۋ راسىمدەرى بار.
جوعارعى سوت توراعاسى اسلامبەك مەرعاليەۆتىڭ ايتۋىنشا, ازاماتتاردىڭ مەملەكەتتىك ورگاندارمەن اراداعى داۋلار بويىنشا قۇقىعىن قورعاۋ شەڭبەرىندە اكىمشىلىك ورگاندار مەن لاۋازىمدى تۇلعالاردىڭ 2,6 مىڭ اكتىسى (57 پايىز) زاڭسىز دەپ تانىلدى.
سونداي-اق پرەزيدەنتكە قىلمىستىق ءىس جۇرگىزۋدە كونستيتۋتسيالىق قۇقىقتار مەن بوستاندىقتاردى قامتاماسىز ەتۋ شارالارى تۋرالى مالىمەت بەرىلدى. اتاپ ايتقاندا, تەرگەۋ سوتتارىنىڭ قاماۋعا الۋدى سانكتسيالاۋدان باس تارتۋ ۇلەسى 23 پايىزدان 37 پايىزعا ءوستى. اقتالعان ازاماتتاردىڭ سانى (جەكە ايىپتاۋ ىستەرىن قوسپاعاندا) 59-دان 88-گە جەتتى.
مەملەكەت باسشىسىنىڭ تاپسىرماسىنا سايكەس, بيىلعى 1 شىلدەدەن باستاپ دەربەس كاسساتسيالىق سوت جۇمىس ىستەي باستادى. العاشقى ايدىڭ وزىندە اتالعان مەكەمەگە 5 مىڭعا جۋىق ارىز-شاعىم تۇسكەن.
كەزدەسۋ سوڭىندا قاسىم-جومارت توقاەۆ حالىقتىڭ سوت جۇيەسىنە سەنىمىن نىعايتۋ جانە سوت تورەلىگىنىڭ ساپاسىن ارتتىرۋ جۇمىستارىن جالعاستىرۋدىڭ ماڭىزدى ەكەنىن اتاپ ءوتتى.