ريگا تاريحى مۇراجايىندا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ «G-global: XXI عاسىر الەمى» اۆتورلىق كىتابىنىڭ لاتىش تىلىندە شىققان نۇسقاسىنىڭ تۇساۋكەسەرى ءوتتى.
سالتاناتقا لاتۆيانىڭ كورنەكتى قوعام جانە ساياسي قايراتكەرلەرى, دەپۋتاتتار, ساراپشىلار, جۋرناليستەر, ءىرى كومپانيالاردىڭ باسشىلارى, سونداي-اق, ديپلوماتتار قاتىستى. تۇساۋكەسەر ريگانىڭ ەجەلگى جانە كورىكتى عيماراتتارىنىڭ بىرىندە ءوتتى.
قازاقستان رەسپۋبليكاسىنىڭ ەلشىسى باۋىرجان مۇحامەتجانوۆ جينالعان قاۋىم الدىندا ءسوز سويلەپ, قاۋىپسىز جانە ادىلەتتى الەمدىك ءتارتىپتى ورناتۋ جولىندا بۇكىل ادامزاتتى بىرىكتىرۋ دەگەن پرەزيدەنت ن.ءا.نازارباەۆتىڭ G-GLOBAL باستاماسىنىڭ نەگىزگى ءمانى تۋرالى ايتىپ بەردى. ول قازاقستان باسشىسىنىڭ باستاماسىنا بىلدىرگەن قىزىعۋشىلىعى ءۇشىن لاتىش تاراپىنا العىسىن ءبىلدىرىپ, ونى قازاقستان ۇسىنىپ وتىرعان كوممۋنيكاتيۆتى الاڭدا جاھاندىق قۇرىلىم جونىندەگى ۇنقاتىسۋعا بەلسەنە قاتىسۋعا شاقىردى.
ن.نازارباەۆتىڭ كىتابى مەن «G-Global» يدەياسى لاتۆيالىق ساراپشىلاردىڭ قىزىعۋشىلىعى مەن وڭ پىكىرلەرىن تۋدىردى. ولاردىڭ پىكىرىنشە, قازاقستان باسشىسىنىڭ ەڭبەگى ستراتەگيالىق ويلارمەن, كوپتەگەن جاھاندىق وقيعالاردى, سونداي-اق حالىقارالىق ساياسات پەن ەكونوميكاداعى بايسالدى وزگەرىستەردى تالداۋىمەن وزەكتى.
لاتۆيا جازۋشىلار وداعىنىڭ پرەزيدەنتى يۋريس پايدەرستىڭ ايتۋىنشا, قازاقستان پرەزيدەنتى لاتۆيادا ۇلكەن بەدەلگە يە. قازاقستان باسشىسى كىتابىنىڭ لاتىش تىلىندە شىعۋى ەكى ەل اراسىنداعى قاتىناستاردىڭ دامۋىنا سەپتىگىن تيگىزىپ قانا قويماي, بولاشاقتا ەلدەرىمىز قاي باعىتتا داميتىنى تۋرالى تۇسىنىكتىڭ قالىپتاسۋىنا وڭ ىقپال ەتەدى.
سەيم دەپۋتاتى, قازاقستان پارلامەنتىمەن ىنتىماقتاستىق توبىنىڭ باسشىسى ينگۋنا سۋدرابا كىتاپتىڭ لاتىش تىلىندە شىعۋى دوستاس قازاقستان حالقىنىڭ مادەنيەتىن, ءداستۇرىن جانە بولاشاقتاعى جوسپارلارىن ءتۇسىنۋگە مۇمكىندىك بەرەتىنىن اتاپ كورسەتتى.
ەلباسىنىڭ كىتابى لاتۆيانىڭ جوعارى وقۋ ورىندارىنا, كىتاپحانالارعا, عىلىمي جانە زەرتتەۋ ورتالىقتارىنا تاراتىلادى. كىتاپ لاتۆيا ۋنيۆەرسيتەتىنىڭ كەيبىر فاكۋلتەتتەرىنىڭ قوسىمشا وقۋلىقتار تىزىمىنە ەنگىزىلدى.
«ەگەمەن-اقپارات».