پرەمەر-ءمينيستردىڭ ورىنباسارى قانات بوزىمباەۆ مەملەكەت باسشىسىنىڭ حالىقتى 100% اۋىزسۋمەن قامتاماسىز ەتۋ جونىندەگى تاپسىرماسىن ىسكە اسىرۋ, سونداي-اق توپتىق سۋ قۇبىرلارىن سالۋ مەن رەكونسترۋكتسيالاۋ بارىسى بويىنشا كەڭەس وتكىزدى.
جيىنعا ونەركاسىپ جانە قۇرىلىس مينيسترلىگى مەن سۋ رەسۋرستارى جانە يرريگاتسيا مينيسترلىگىنىڭ, سونداي-اق وبلىس اكىمدىكتەرىنىڭ باسشىلارى قاتىستى.
بيىل توپتىق سۋ قۇبىرلارىن سالۋ جانە رەكونسترۋكتسيالاۋ جوبالارىن جۇزەگە اسىرۋعا 70,2 ملرد تەڭگە قاراستىرىلعان, ونىڭ قاتارىندا 47,5 ملرد تەڭگە ارناۋلى مەملەكەتتىك قوردان ءبولىندى. سۋ رەسۋرستارى جانە يرريگاتسيا مينيسترلىگى تاپسىرىس بەرۋشى رەتىندە 20 جوبانى جۇزەگە اسىرىپ جاتىر, جىل سوڭىنا دەيىن سونىڭ 8-ءىن اياقتاۋ جوسپارلانعان. ناتيجەسىندە, 149 اۋىلدىق ەلدى مەكەندە سۋمەن جابدىقتاۋ جاقسارىپ, 4 اۋىل (1,5 مىڭ تۇرعىن) ورتالىقتاندىرىلعان اۋىزسۋعا قوسىلادى.
سولتۇستىك قازاقستان, الماتى مەن اقمولا وبلىستارىندا التى جوبا بويىنشا جوبالىق-سمەتالىق قۇجاتتامانى ازىرلەۋ جۇمىسى جۇرگىزىلۋدە. بيىل حالىق سانى 40 مىڭنان اساتىن 49 اۋىل ورتالىقتاندىرىلعان اۋىزسۋ جۇيەسىنە قوسىلادى. سۋ رەسۋرستارى جانە يرريگاتسيا مينيسترلىگى بارلىق جوسپارلانعان جوبانى بەلگىلەنگەن مەرزىمدە اياقتاۋدى كوزدەپ وتىر.
قانات بوزىمباەۆ توپتىق سۋ قۇبىرلارى بىرقاتار وڭىردە اۋىزسۋدىڭ نەگىزگى كوزى بولىپ سانالاتىنىن اتاپ ءوتىپ, ولاردىڭ قۇرىلىسى مەن جاڭعىرتۋ جۇمىستارىن جەدەلدەتۋ قاجەتتىگىن جەتكىزدى.
كەڭەستە وڭىرلەردىڭ ەسەبى تىڭدالدى. ەسكە سالا كەتەيىك, مەملەكەت باسشىسىنىڭ حالىقتى اۋىزسۋمەن قامتاماسىز ەتۋ جونىندەگى تاپسىرماسىن ورىنداۋ ءۇشىن وڭىرلەرگە ەكى ترانشپەن 161 ملرد تەڭگە بولىنگەن. قازىرگى ۋاقىتتا ەل بويىنشا 269 جوبا جۇزەگە اسىرىلىپ جاتىر, الايدا ولاردىڭ ءبىر بولىگى نەبارى 50%-عا ورىندالعان.
اباي, اقمولا, قاراعاندى, پاۆلودار, سولتۇستىك قازاقستان, تۇركىستان وبلىستارى مەن الماتى قالاسىندا جۇمىستىڭ كەشىكتىرىلىپ, ۋاقتىلى اياقتالماۋ قاۋپى بار وڭىرلەر رەتىندە اتالدى. الماتىدا قارجىنىڭ يگەرىلمەۋى مەن جوبالاردى باياۋ جۇزەگە اسىرۋ بايقالادى. ال اباي وبلىسىندا, ونىڭ ىشىندە ۇشەۋى سەمەيدە بولاتىن جەتى جوبا بويىنشا جۇمىس ءالى باستالماعان.
«قىس باستالعانعا دەيىن ەكى اي ۋاقىت قالدى. كەلەر جىلعا وتەتىن جوبا بولماۋعا ءتيىس. بيىل اياقتالۋى جوسپارلانعان بارلىق نىساندار ۋاقىتىندا تاپسىرىلۋى كەرەك. سۋمەن قامتاماسىز ەتۋ ماسەلەسى – مەنىڭ جەكە باقىلاۋىمدا», دەدى ۆيتسە-پرەمەر.
كەڭەس قورىتىندىسى بويىنشا قانات بوزىمباەۆ ءوندىرىس جانە قۇرىلىس مينيسترلىگىنە, سۋ رەسۋرستارى جانە يرريگاتسيا مينيسترلىگىنە جەرگىلىكتى جەرلەردە جۇمىستىڭ بارىسىنا تۇراقتى مونيتورينگ ۇيىمداستىرۋدى, ال اكىمدىكتەرگە جەرگىلىكتى بيۋدجەت ەسەبىنەن قاجەتتى قاراجات ءبولۋدى جانە بيىل پايدالانۋعا بەرىلۋگە ءتيىس بارلىق نىساندى ۋاقتىلى اياقتاۋدى تاپسىردى.