جاستار رەسۋرستىق ورتالىقتارىنىڭ (جرو) جەتەكشىلەرىنە ارنالعان وقىتۋدىڭ ەكىنشى لەگى باستالدى. ەلىمىزدىڭ ءار تۇكپىرىنەن كەلگەن ازاماتتار ەلوردادا 22 تامىزعا دەيىن سەمينار-ترەنينگكە قاتىسادى. بۇل كاسىبي دامۋ اكادەمياسى – مادەنيەت جانە اقپارات مينيسترلىگى جاستار جانە وتباسى ىستەرى كوميتەتى مەن «جاستار» عىلىمي-زەرتتەۋ ورتالىعىنىڭ بىرلەسكەن كەشەندى باعدارلاماسى.
مۇنداعى ماقسات – جاستار ساياساتى سالاسىنداعى كادرلىق الەۋەتتى دامىتۋ. اكادەميا تىڭداۋشىلارى تەك تەوريالىق ءبىلىم الىپ قانا قويماي, سونىمەن قاتار ينتەراكتيۆتى ساباقتارعا, ناقتى جاعدايلاردى تالداۋعا جانە توپتىق جۇمىستارعا قاتىسادى. بۇل فورمات جاستار رەسۋرستىق ورتالىقتارىنىڭ كۇندەلىكتى كەزدەسەتىن ناقتى قيىندىقتارىنا يكەمدەلىپ, الىنعان داعدىلاردى تاجىريبەدە ءتيىمدى قولدانۋعا جول اشادى.
جالپى, بيىل ەلىمىزدىڭ ءار وڭىرىنەن شامامەن 200-گە جۋىق جرو قىزمەتكەرلەرى بىلىكتىلىكتى ارتتىرۋ كۋرستارىنان ءوتتى. وسىلايشا, كاسىبي دامۋ اكادەمياسى تاجىريبە الماسۋدىڭ, جاڭا تاسىلدەردى ازىرلەۋدىڭ جانە جاستارمەن جۇمىس ىستەيتىن مامانداردىڭ كاسىبي قاۋىمداستىعىن قالىپتاستىرۋدىڭ ماڭىزدى الاڭىنا اينالىپ كەلەدى.
ەكىنشى لەك نەگىزىنەن داعدارىستىق جاعدايلاردا قازىرگى زامانعى باسقارۋشىلىق جانە كوممۋنيكاتسيالىق داعدىلاردى قالىپتاستىرۋعا, جاستاردىڭ وسال توپتارىمەن جۇمىس ىستەۋدىڭ تاسىلدەرىن مەڭگەرۋگە جانە ينكليۋزيۆتىلىك قاعيداتتارىن دامىتۋعا, اناليتيكالىق ادىستەردى پايدالانۋ جانە دەرەكتەرگە سۇيەنگەن باسقارۋشىلىق شەشىمدەر قابىلداۋعا باعىتتالعان.
ايتا كەتەيىك, 1 تامىزدا پاۆلودار قالاسىندا مەملەكەتتىك جاستار ساياساتى مەكتەبى اياسىندا وڭىرلىك سەمينار-ترەنينگ ءوتتى. بۇل ءىس-شارا ۇزاقمەرزىمدى ءبىلىم بەرۋ جوباسىنىڭ قورىتىندى كەزەڭى بولدى. وعان اباي, شىعىس قازاقستان, قاراعاندى جانە پاۆلودار وبلىستارىنان جاستار رەسۋرستىق ورتالىقتارىنىڭ 25 قىزمەتكەرى قاتىستى. وقۋ ترەنينگتەرى بارىسىندا جاستارمەن جۇمىس ىستەيتىن ماماندار تسيفرلىق جانە اقپاراتتىق قاۋىپسىزدىك سالاسىنداعى بىلىمدەرىن كەڭەيتتى. سونداي-اق ولار جاستار ساياساتى اياسىندا جوبالىق باسقارۋدىڭ نەگىزدەرىمەن تانىستى. بۇدان بولەك, قاتىسۋشىلار جۇمىس ۇدەرىستەرىن وڭتايلاندىرۋ ءۇشىن جاساندى ينتەللەكتىنىڭ الەۋەتىن زەرتتەپ, ماڭىزدى ماسەلەلەردى ءتيىمدى شەشۋگە مۇمكىندىك بەرەتىن تاسىلدەردى مەڭگەردى.
پاۆلودارداعى سەمينار بۇعان دەيىن قوسشى, شىمكەنت, الماتى, ورال قالالارىندا وتكەن ترەنينگتەر سەرياسىنىڭ قورىتىندى كەزەڭى بولدى. جالپى العاندا, ءبىلىم بەرۋ باعدارلاماسىنان ەلىمىزدىڭ بارلىق وڭىرىندەگى جاستار رەسۋرستىق ورتالىقتارىنىڭ 150-گە جۋىق مامانى ءوتتى.
بيىلعى مەملەكەتتىك جاستار ساياساتى مەكتەبىنىڭ نەگىزگى ماقساتى – جاستار رەسۋرستىق ورتالىقتارىنىڭ قىزمەتكەرلەرىنىڭ كاسىبي قۇزىرەتتىلىگىن ارتتىرۋ, تسيفرلىق داعدىلارىن دامىتۋ جانە مەملەكەتتىك جاستار ساياساتىن جەرگىلىكتى دەڭگەيدە ءتيىمدى جۇزەگە اسىرۋعا ىقپال ەتەتىن يننوۆاتسيالىق قۇرالداردى ەنگىزۋ. بۇل ءوز كەزەگىندە جاستاردىڭ وزەكتى ماسەلەلەرى مەن مىندەتتەرىن شەشۋدە اناعۇرلىم سەرپىندى ءارى ساپالى تاسىلدەردى قولدانۋعا نەگىز قالايدى.