كەشە ەلباسى نۇرسۇلتان نازارباەۆتىڭ قاراعاندى وبلىسىنا جۇمىس ساپارى باستالدى.
ەلدىڭ دامۋى مەن وركەندەۋىندە ورنى بولەك قاراعاندى ايماعى كوشباسشىلىق جولىنا بەرىكتىككە ءارى بيىكتەن كورىنۋگە ۇمتىلىسىن قاشاندا جارقىن ىستەرىمەن ايعاقتاپ كەلە جاتقانى ءمالىم. نەگىزىنەن ءوندىرىستىڭ الىپتارى شوعىرلانعان ءوڭىردىڭ وتاندىق ەكونوميكاعا قوساتىن ۇلەسى وتە زور بولسا, يندۋستريالىق-يننوۆاتسيالىق باعىتتى جەدەلدەتۋگە بەت ءتۇزەۋى جاڭا بەلەستەرگە قۇلاش سەرپىلتە ءتۇسىپ وتىر. بۇعان دالەل جەتىپ ارتىلادى. اتالعان مەرەيلى ماقساتقا ارنايى جاسالعان باعدارلاما بويىنشا رەسپۋبليكالىق ماڭىزى بار 18 جوبا بەلگىلەنگەن. سونىڭ 10-ى بيىل ىسكە اسىرىلۋعا ءتيىس. ال 4-ءى ورىندالدى.
ەلباسى وبلىسقا جۇمىس ساپارى الدىندا تەلەكوپىر ارقىلى ينۆەستيتسيالىق جوبالاردىڭ تۇساۋكەسەرىنە قاتىسۋى كەزىندە سولاردىڭ ءبىرىنىڭ, اتاپ ايتقاندا, بوتاقارا كەنتىندە بولات پانەلدى جىلىتۋ رادياتورلارى زاۋىتىنىڭ اشىلۋىن كورگەن ەدى. اۋىلدىق جەردە, مۇنىڭ سىرتىندا تۇرعىن ءۇي قۇرىلىسىنا اسا قاجەتتى وسىناۋ بۇيىمنىڭ كوپ مولشەردە شىعارىلۋىنىڭ جولعا قويىلۋى ەلەۋلى وقيعا. بۇعان دەيىن جاڭاارقا, شەت اۋداندارىندا كومىر جانە تەمىر كونتسەنتراتىن وندىرەتىن كەنىشتەردىڭ ىرگە كوتەرۋى ايماقتىڭ الىس تۇكپىرلەرى تىنىسىنا تىڭ لەپ ەستىرگەن-ءدى.
كەشە تۇستەن كەيىن پرەزيدەنت نۇرسۇلتان نازارباەۆتى وسىنداي جان جادىراتار جاڭالىقتارىمەن قارسى العان قاراعاندىلىقتار جۇرەگىنە بۇل جولعى كەزدەسۋلەردىڭ ءبىر ىستىق سيپاتى بار. تەمىرتاۋدا, قاراعاندىدا ۇلكەن ەڭبەك مەكتەبىنەن ءوتىپ, قايراتكەرلىككە قايرالعان بولاشاق مەملەكەت باسشىسىنىڭ قازاقستاندىق تۇڭعىش شويىن الۋشىلار ساپىندا بولۋى ءاردايىم ماقتانىش تۇتىلادى. وڭىردەگى جاڭا ءوندىرىس وشاقتارىمەن تانىسۋ ءارى سول ايتۋلى وقيعاعا 50 جىل تولۋى قۋانىشىن كەشەگى ارىپتەس مەتاللۋرگتەرمەن بىرگە بولىسۋگە نيەتتەستىككە, پەيىل-ىلتيپاتقا جۇرتشىلىق رازىلىعى زور بۇل كۇندە.
بۇگىندە ءوندىرىستى ولكەنىڭ اتىنا زاتى ساي بولىپ كەلەدى. قاراعاندى ءوز باسىندا سالىناتىن, باستاپقىدا 50 مىڭ اۆتوكولىك شىعاراتىن زاۋىت قۇرىلىسىنا قازىق قاعىلعانى كەشە عانا. رەسەيلىك “Sollers” ااق كومپانياسى مەن “سارىارقا” الەۋمەتتىك-كاسىپكەرلىك كورپوراتسياسى بىرلەسىپ قۇرعان كاسىپورىندا 2015 جىلى – 187 مىڭ, ال 2020 جىلى 254 مىڭ جەڭىل كولىك ءتۇرلەرى قازاقستاندىق تۇتىنۋشىلارعا ۇسىنىلاتىن بولادى. حالىقتىڭ ءال-اۋقاتى جاقسارا تۇسۋىنە بايلانىستى, ءبىر جاعىنان, بۇل قوزعالىس قۇرالىنا سۇرانىمدى قاناعاتتاندىرۋدىڭ جولى تابىلسا, ەكىنشى جاعىنان, ءبىراز ادامنىڭ ەڭبەككە قامتىلۋىنا مۇمكىندىك بەرەدى. مىسالى, العاشقى كەزەگىندە 1,5 مىڭ, سودان سوڭ 3,5 مىڭ ادام جۇمىسقا تارتىلادى.
بۇرىننان ماقسات ورتاق, تىلەگى ۇندەس كورشى مەملەكەتتەرمەن ءوزارا پايدالى ەكونوميكالىق ىنتىماقتاستىقتى تەرەڭدەتۋگە باعىتتالعان مۇنداي جوبالاردىڭ قاتارىنا بەلارۋستىق ايگىلى بەلاز-داردىڭ باستى تەتىكتەرى مەن اگرەگاتتارى ەندى قاراعاندىدا دا جاسالۋى جاتادى.
مەملەكەت باسشىسى اۋەجايدان بىردەن قازاقستان-بەلارۋس بىرلەسكەن “قازبەلاز” جشس ورىن تەپكەن قاراعاندى قۇيۋ-ماشينە جاساۋ زاۋىتىنا بەت الدى. كاسىپورىن تسەحتارىن ارالاپ, جۇمىسىمەن تانىسۋ كەزىندە ءىستىڭ اياق الىسىن بايان ەتۋشىلەر مۇندا اۋىر سالماقتى اتاقتى جۇك كولىگىنىڭ ءبىرىنشى كەزەڭدە كۇردەلى جوندەۋدەن وتكىزىلەتىندىگىن, قوسالقى ءبولشەكتەرى جاسالاتىندىعىن, سودان سوڭ قۇراستىرىلۋى باستالاتىندىعىن ايتتى. جالپى العاندا تولىق كۇش-قۋاتىنا ەنۋى الداعى ءۇش-ءتورت جىلدا اياقتالۋعا ءتيىس. سوندا جىلىنا 90 توننالىق 5 جانە 45 توننالىق 10 بەلاز قازبا ورىندارىنان كەن تاسىمالداۋعا جونەلتىلىپ تۇرادى. ودان ارعى ۋاقىتتا شىعارىلۋ كولەمى ۇلعايىپ, اتالعان تەحنيكامەن قازاقستاندىق تۇتىنۋشىلار سۇرانىمىن قاناعاتتاندىرۋ ماسەلەسى شەشىلەدى. بۇل جوبانى ىسكە اسىرۋدىڭ سالماقتى جۇگى جۇكتەلگەن “قازاقمىس” كورپوراتسياسى ءۇشىن ول وتە ءتيىمدى بولماق. “بەلاز”-دار كەڭ قولدانىستاعى ءوندىرىس الىبى, ونى جەرگىلىكتى ورىندا قۇراستىرۋ ارقىلى ساتىپ الىنۋ باعاسىن ەكى ەسەگە دەيىن تومەندەتە الادى.
جاڭا كاسىپورىنعا 100-گە جۋىق ادام جۇمىسقا قامتىلعان. سولاردىڭ ءبىرى ءبىرىنشى تسەح تەحنولوگى جۇماعالي ايمىشەۆ: “وزىق تەحنولوگيالىق قوندىرعىلارمەن, اسپاپ-قۇرالدارمەن جابدىقتالعان مۇنداي وندىرىستە ەڭبەك ەتۋ ءبارىمىزگە زور مارتەبە. ءبىر توپ ءارىپتەسىمىز جاقىندا مينسك زاۋىتىندا ماماندىق جەتىلدىرىپ ورالدى. وسىنداي تەحنيكانى وزىمىزدە شىعارۋعا قول جەتكىزۋ قانداي دا كۇردەلى مىندەتتى اتقارۋعا دايىن ەكەنىمىزدىڭ ايعاعى”, دەپ قۋانىشىنا ۇجىم مۇشەلەرى ءبارى ورتاقتىعىن ءبىلدىردى.
پرەزيدەنت ن.ءا.نازارباەۆ جۇمىسشىلارمەن, ماماندارمەن, ءوندىرىس باسشىلارىمەن, ىسكەر توپ وكىلدەرىمەن ەمەن-جارقىن اڭگىمەلەسىپ, وي-پىكىرلەرىن ىنتا قويا تىڭدادى. ەل ەكونوميكاسىن جاڭعىرتۋ باستى ماقسات ەكەنىن اتاي كەلىپ, يندۋستريالىق دامۋدىڭ نەگىزگى باعىتتارىن جىكتەپ, تالداپ كورسەتتى. “كەلەشەگى زور مۇنداي وندىرىستەر قاتارى كوبەيە ءتۇسۋى ماعان ۇلكەن قۋانىش. بىلتىر بەلارۋس رەسپۋبليكاسىنا جۇمىس ساپارىمدا “بەلاز”-دى قازاقستاندا دا قۇراستىراتىن بىرلەسكەن كاسىپورىن قۇرۋ جونىندە ۇسىنىس جاساعان ەدىم. بىزدە مەتالل, رەزينا جەتكىلىكتى. ونداي جوبانى ىسكە اسىرۋعا جاعدايىمىز بار. مىنەكي, ورىندالۋىنا ءىز سالىندى”, دەگەن ەلباسى يندۋستريالىق دامۋ باعدارلاماسى ارقىلى 50 مىڭ ادامنىڭ جۇمىسقا قامتىلاتىندىعىن, تۇرعىنداردىڭ ءال-اۋقاتىن كوتەرۋ, حالىق يگىلىگىنە قىزمەت ەتۋ جولىندا ءىس-شارالاردىڭ اتقارىلا بەرمەكتىگىن اتادى.
ۇجىم مۇشەلەرىمەن جىلى قوشتاسقان ەلباسىنا دەگەن زور قۇرمەت, شىنايى سۇيىسپەنشىلىك سەزىمى ولاردىڭ جارقىن ءجۇزدەرىنەن اڭعارىلىپ, “جاساسىن قازاقستان”, “جاساسىن نۇرسۇلتان”, “راحمەت سىزگە” دەگەن جان-جاقتان جاۋعان العىس سوزدەرىنەن جاڭعىرىپ تۇردى.
مەملەكەت باسشىسى بۇگىن تەمىرتاۋدا وتەتىن قازاقستاندىق تۇڭعىش شويىن قورىتىلۋىنىڭ 50 جىلدىعى قۇرمەتىنە مەرەكەلىك شويىن الۋ راسىمىنە, مەتاللۋرگتەردىڭ سالتاناتتى جينالىسىنا قاتىسىپ, قالادا جاڭادان بوي كوتەرگەن نىساندارمەن تانىسادى.
ايقىن نەسىپباي.
قاراعاندى.