كەشە قازاقستان پرەزيدەنتى جانىنداعى ورتالىق كوممۋنيكاتسيالار قىزمەتىندە حالىقارالىق كورمەلەر بيۋروسىنىڭ باس حاتشىسى ۆيسەنتە لوسسەرتالەستىڭ ەلىمىزگە كەلگەن ەكى كۇندىك رەسمي ساپارى اياسىندا ءباسپاسوز ءماجىلىسى بولىپ ءوتتى. وعان سىرتقى ىستەر ءمينيسترىنىڭ ءبىرىنشى ورىنباسارى – ەكسپو-2017 حالىقارالىق مامانداندىرىلعان كورمەسىنىڭ كوميسسارى ءراپىل جوشىباەۆ جانە «استانا ەكسپو-2017» ۇق» اق-تىڭ باسقارما توراعاسى تالعات ەرمەگياەۆ قاتىستى.
حالىقارالىق كورمەلەر بيۋروسىنىڭ باس حاتشىسى ساپارىنىڭ العاشقى كۇنى ەلوردادا قىزۋ قارقىنمەن جۇرگىزىلىپ جاتقان كورمە قالاشىعىنىڭ قۇرىلىس جۇمىستارىمەن تانىستى. سونىمەن بىرگە, كورمە ۇيىمداستىرۋداعى كەشەندى شارالارمەن, پاۆيلونداردىڭ ديزاينىمەن, كورمە قالاشىعىنىڭ قۇرىلىسىنا ينۆەستورلار تارتۋ, زاڭگەرلىك ماسەلەلەرىمەن اينالىستى. «مەن تاڭەرتەڭ كورمە قالاشىعىنىڭ قۇرىلىس الاڭىنا بارىپ, جۇمىس بارىسىمەن تانىستىم. ۇلكەن قۇرىلىس الاڭىنداعى ءتارتىپ پەن جيناقىلىق مەنى ەرەكشە تاڭعالدىردى. قۇرىلىس جوسپارى ناقتى جانە اۋقىمدى جاسالعان. جوسپار ەكسپو-نى ۇيىمداستىرۋ بويىنشا وتكىزىلەتىن ءىس-شارالارعا تولىق سايكەس كەلەدى», دەدى ءوز سوزىندە ۆ.لوسسەرتالەس. سونىمەن بىرگە, ول قۇرىلىس جۇمىستارىنىڭ بەلگىلەنگەن مەرزىمنەن بۇرىن اياقتالاتىندىعىنا سەنىم ءبىلدىرىپ, قازاقستان تاراپىنىڭ حالىقارالىق مامانداندىرىلعان كورمەنى ءوتكىزۋگە بارىنشا جاۋاپتى دايىندىقپەن كەلىپ وتىرعاندىعىن اتاپ كورسەتتى. «مەن قازاقستاندىقتاردىڭ جاھاندىق شارانى وتكىزۋدە ۇلكەن جاۋاپكەرشىلىك بيىگىنەن كورىنەتىنىنە سەنىمدىمىن», دەدى ول ءسوزىنىڭ قورىتىندىسىندا.
ورتالىق كوممۋنيكاتسيالار قىزمەتىندەگى جۇزدەسۋدە ءسويلەگەن سوزىندە «استانا ەكسپو-2017» ۇق» اق باسقارما توراعاسى ەرمەگياەۆ «ءبىز كەستەگە سايكەس جۇمىس جاساپ قانا قويماي, كوپ رەتتە ودان وزا قيمىلداپ جاتىرمىز. وسى قىستا قۇرىلىسشىلار نىسانداردىڭ ىرگەتاسىن قۇيىپ ءبىتىردى. كەيبىر پاۆيلونداردىڭ مەتالل قۇرىلىمدارى ورناتىلىپ, كەيبىرەۋلەرى قازىردىڭ وزىندە شىنىمەن قاپتالدى. ەكپىندى قۇرىلىس الاڭىنداعى 3500 قۇرىلىسشى وزدەرىنە جۇكتەلگەن تاپسىرمانى مەرزىمىنەن بۇرىن اياقتاۋعا جىگەرلەنگەن. ءبىز 2016 جىلدىڭ سوڭىنا قاراي قۇرىلىستى تولىق اياقتاۋدى جوسپارلاعان ەدىك. ەندى بۇگىن ونى تامىز ايىنىڭ سوڭىنا تامان نەمەسە قىركۇيەك ايىنىڭ باسىندا اياقتاۋ جونىندە مىندەت الىپ وتىرمىز», – دەدى.
سودان كەيىن جۇزدەسۋگە قاتىسۋشىلار باق وكىلدەرىنىڭ كوپتەگەن سۇراقتارىنا جان-جاقتى جاۋاپ بەردى. وسى ءپىكىرالىسۋ بارىسىندا انىقتالعانىنداي, بۇگىنگى كۇنگە دەيىن استانادا وتەتىن كورمەگە قاتىسۋ ءۇشىن 19 مەملەكەت ءوتىنىش بىلدىرگەن كورىنەدى. جىل اياعىنا دەيىن ولاردىڭ سانى 60-قا جەتپەك. قازىر قۇرىلىس الاڭىندا 3500 قۇرىلىسشى ەڭبەك ەتۋدە. ولاردىڭ 70 پايىزعا جۋىعى جەرگىلىكتى تۇرعىندار. جىل اياعىنا دەيىن كورمە قالاشىعىنىڭ قۇرىلىس الاڭىنداعى قۇرىلىسشىلاردىڭ سانى 10 مىڭ ادامعا دەيىن جەتەدى.
جىلقىباي جاعىپار ۇلى,
«ەگەمەن قازاقستان».