قىزىلوردا قالاسىندا قۇرىلىس سالاسى جىل سايىن قارقىن الىپ كەلەدى. اسىرەسە داريانىڭ سول جاعالاۋىنداعى كوپقاباتتى ۇيلەرمەن قاتار ءتۇرلى نىسان بوي كوتەرگەن جاڭا اۋداننىڭ كەلبەتى ايشىقتى. العاشقى ۇيلەر ونشاقتى جىل بۇرىن عانا سالىنعان سول جاعالاۋ قازىر اۋقىمدى قۇرىلىس الاڭىنا اينالعان.
وبلىستا قۇرىلىسپەن اينالىساتىن سەرىكتەستىكتەر قاتارى دا ارتقانى بايقالادى. سولاردىڭ ءبىرى – كوپ جىلداردان بەرى باسپانا كەزەگىن كۇتكەن مىڭداعان ادامعا قۋانىش سىيلاعان ء«سات-سەرۆيس» كومپانياسى. بىلتىر وبلىس ورتالىعىندا اۋماعى 8,8 مىڭ شارشى مەتردەن اساتىن «جايلى مەكتەپتىڭ» ءبىرىن سالعان ء«سات-سەرۆيس» وسى كۇنى سالادا اتى العاشقىلار قاتارىنا اتالاتىن سەرىكتەستىكتەر قاتارىندا تۇر. ءبىزدىڭ بۇگىنگى كەيىپكەرىمىز مارات قاسىمبەكوۆ وسىنداي ىرگەلى ۇجىمنىڭ ءبىر مۇشەسى ەكەنىن ماقتان تۇتادى.
جوعارى وقۋ ورنىنان مۇنايشى ماماندىعىن العان جاس جىگىت باستاپقىدا وڭىردەگى «قارا التىن» وندىرەتىن كومپانيالاردىڭ بىرىندە ەڭبەك ەتتى. التى جىلدان كەيىن بۇرىنعى تابىستى كاسىپورىنداعى جۇمىس ىرعاعى ىركىلىسكە ۇشىراي باستادى. وڭىردەگى مۇناي قورىنىڭ تاۋسىلۋعا تاياعانى دا بۇل جۇمىستىڭ كەلەشەگىن كۇماندى ەتە باستاپ ەدى. ءسويتىپ جۇرگەندە اياق استىنان جۇمىسسىز قالدى. كوپ ويلانباي, قۇرىلىسقا ادام ىزدەپ جاتقان ء«سات-سەرۆيس» كومپانياسىنا كەلدى. ءىستى جاڭادان كەلگەندەردىڭ ءبارى باسىنان وتكەرگەن بەتون قۇيۋدان باستادى, تاس قالاۋشى بولدى. بۇل جۇمىستا اعا ارىپتەسى باقىتجاننىڭ كومەگى كوپ ءتيدى.
«قازىرگى جۇرتتىڭ كوزىنە «قۇرىلىس» دەسە بەينەتكە بەلشەسىنەن باتىپ جۇرگەن جاندار ەلەستەي كەتەتىنى راس. ايتسە دە, بۇگىندە جاڭا تەحنولوگيا بۇل سالاعا دا جەتكەن, جۇمىستىڭ اۋىرىن تەحنيكا اتقارادى. وسىنىڭ ارقاسىندا ەڭ اۋىر ءىس – بەتون قۇيۋ دا بۇرىنعىدان كوپ جەڭىلدەگەن. ارينە, قاي سالادا دا باستاپقىدا قينالاسىڭ. مەن جۇمىس ىستەي ءجۇرىپ, وسى ماماندىققا قوسىمشا وقىپ الدىم», دەيدى ول.
بۇل سالادا جۇرگەندەردىڭ بىرلىگى ەرەكشە ەكەن. بىلمەگەنىن ۇيرەتكەننەن بولەك, قينالىپ جاتساڭ ءاردايىم كومەگى دايىن تۇرادى. تاعى ءبىر بايقاعانى – قۇرىلىستا وقۋدى جاڭادان بىتىرە سالا جۇرتقا بيلىك ايتىپ, باسشى بولۋ وڭاي ەمەس. ءار جۇمىستا ابدەن ءپىسىپ, ءىستى كوزىڭ تانيتىن دارەجەگە جەتكەنىڭدە عانا ەشكىم سەنىڭ ءسوزىڭدى ەكى ەتە المايدى. وسى كۇنى پروراب قىزمەتىن اتقارىپ جۇرگەن مارات تا وسىنداي جولداردان ءوتتى.
قازىردە قىستىڭ كۇنى قۇرىلىس سالۋعا قارسىلار قاتارى كوپ. بىراق مارات بۇل پىكىرمەن كەلىسە قويمايدى. ويتكەنى قازىر جىلۋدى قالىپتى ۇستاپ تۇراتىن قوندىرعىلار بار. ەشكىم دە ءوزىنىڭ سالعان ۇيىنەن شيكىلىك شىققانىن قالامايدى. قاي كومپانيا بولسا دا اۋەلى ساپاعا ءمان بەرەدى. ونىڭ ۇستىنە تەحنيكالىق, اۆتورلىق قاداعالاۋ, ءتيىستى باسقارمالار مەن زەرتحانالار دا كەمشىلىككە جول بەرە قويمايدى. ولار سالعان ءۇيى سىنعا ىلىككەندەرگە اقاۋىن قالىپقا كەلتىرتپەي تىنىم تاپپايدى. ادال ەڭبەكتىڭ ارقاسى بولار, وسى ۋاقىتقا دەيىن بۇلار سالعان قۇرىلىسقا كىنا ارتاتىندار كەزدەسپەپتى.
بۇگىندە جەرگىلىكتى جىگىتتەرگە سەنبەي, ماماندى سىرت مەملەكەتتەن الدىراتىندار دا كەزدەسىپ قالادى. ارينە, قالتاسىنداعى قارجىسىن قايدا, قالاي جۇمسايمىن دەسە دە اركىمنىڭ ەركى بىلەدى. بىراق ماراتتىڭ جاڭاعىداي پىكىردىڭ كەڭ ەتەك الىپ كەلە جاتقانىنا قىنجىلاتىنى بار. قازىر جۇمىس ىزدەپ كەلگەن جەرگىلىكتى 10 جىگىتتىڭ جەتەۋى مىقتى قۇرىلىسشىعا اينالىپ وتىر. تاس قالاۋدان بولەك, سىلاۋ, ارلەۋدى دە مەڭگەرگەن ماماندار كوپ. سىرتتان ناپاقا ىزدەپ كەلگەندەردى كەۋدەسىنەن كەرى يتەرىپ جاتقان ەشكىم جوق, بىراق قۇرىلىستى جەرگىلىكتى جەردىڭ كليماتتىق جاعدايىن جاقسى بىلەتىن ءوزىمىزدىڭ جىگىتتەر سالعانى دۇرىس.
«بۇرىندارى كىرپىشتەن باستاپ قۇرىلىسقا قاجەتتى ماتەريالداردىڭ كوبىن سىرتتان تاسيتىن ەدىك. قازىر سولاردىڭ كوبى وزىمىزدەن شىعىپ جاتىر. مىسالى, كىرپىشتىڭ كۇيدىرىلگەنى دە, سىرتىن ارلەيتىنى دە قىزىلوردادا وندىرىلەدى. جەرگىلىكتى ءوندىرىس ىشكى جۇمىستارعا ارنالعان گيپستەر, جەلىمدەر, كافەلدەر دە شىعارىپ جاتىر. ولاردىڭ ساپاسى دا دا شەتەلدىك ماتەريالداردان ءبىر مىسقال دا كەم ەمەس», دەيدى ول.
مارات قۇرىلعانىنا 20 جىلعا جۋىقتاعان كومپانيادا جۇمىس ىستەي ءجۇرىپ, مول تاجىريبە جيناقتادى. بىلتىر تاعى ءبىر ءۇيدى ۋاقتىلى تاپسىرىپ, ونىڭ اشىلۋىندا وبلىس اكىمىنىڭ قولىنان ماراپات الدى. وسىنىڭ ءبارى ادال ءىس ادامدى ءاردايىم العا شىعاراتىنىنىڭ ايقىن دالەلى.
قىزىلوردا