ايبا-نىڭ WSB جوباسىندا ەل نامىسىن قورعايتىن «استانا ارلاندارى» بەسىنشى ماۋسىمنىڭ جەڭىمپازى. ماۋسىمنىڭ 20 جانە 21-ءى كۇندەرى ەلورداداعى «داۋلەت» سپورت كەشەنىندە وتكەن ەكى فينالدىق كەزدەسۋدىڭ قورىتىندىسىندا ولار «كۋبا دومادورەس» كومانداسىن جالپى ەسەپتە 6:4 ەتىپ ۇتتى.
جوباعا بىلتىر قوسىلعان بويدا جەڭىمپاز اتانعان كۋبالىقتار استاناعا سول اتاقتارىن ساقتاپ قالۋ ءۇشىن كەلدى. كوماندا ساپىندا 2016 جىلعى وليمپياداعا جولداما العان التى بىردەي بوكسشىنىڭ بولۋى وسىنى ايعاقتاي تۇسەدى.
جارىستىڭ العاشقى كۇنى 49 كيلوعا دەيىنگى سالماق دارەجەسىندەگى بوكسشىلاردىڭ جەكپە-جەگىمەن باستالدى. بۇل سىندا «ارلاندار» ساپىنان تەمىرتاس ءجۇسىپوۆ شارشى الاڭعا كوتەرىلدى. ال كۋبالىقتار يوانيس ارگيلاگوسقا سەنىم ارتتى. بەس راۋند بويى ايقىن باسىمدىق تانىتقان تەمىرتاس 3:0 ەسەبىمەن جەڭىسكە جەتتى. ءوز كەزەگىندە كوماندامىزدىڭ كاپيتانى سامات باشەنوۆ (64 كگ.) پەن مەيىرىم نۇرسۇلتانوۆ (75 كگ.) تا قارسىلاستارىن وسىنداي ەسەپپەن تىزە بۇكتىردى. ولار سايكەسىنشە, ياسنيەر لوپەس پەن ارلەن كاردونانى جەڭدى.
ال 56 كيلوعا دەيىنگى سالماقتا سىنعا تۇسكەن قايرات ەراليەۆتىڭ لوندون وليمپياداسىنىڭ چەمپيونى روبەيسي راميرەسكە شاماسى جەتپەدى. قايرات ءبىرىنشى جانە ءۇشىنشى راۋندتاردا باسىم ءتۇسكەنىمەن, جالپى ەسەپتە 0:3 بولىپ ۇتىلدى.
العاشقى كۇننىڭ نۇكتەسىن اۋىر سالماقتاعى (91 كگ.) بوكسشىلاردىڭ جەكپە-جەگى قويدى. بۇل سىندا ءبىزدىڭ كوماندا ساپىنان ۆاسيلي لەۆيت شىقسا, قارسى تاراپتان ەريسلاندي ساۆون سىنعا ءتۇستى. ۆاسيانىڭ وسى جوبا ارقىلى 2016 جىلعى ويىندار جولداماسىن يەمدەنگەنى بەلگىلى. ال ەريسلانديدىڭ ءۇش دۇركىن وليمپيادا چەمپيونى, اتاقتى فەليكس ساۆوننىڭ تۋىسى ەكەنىن ايتا كەتەيىك. تارتىستى وتكەن جەكپە-جەك ناتيجەسىندە كۋبالىق 2:1 ەسەبىمەن جەڭىسكە جەتتى. بۇل رەتتە لەۆيتتىڭ قارسىلاسىنان الدەقايدا باسىم بولعانىن قاپەرگە العانىمىز ءجون. دەگەنمەن, تورەشىلەر جەڭىستى قوناق بوكسشىعا ۇستاتتى. وسىلايشا, فينالدىڭ ءبىرىنشى ءبولىگىندە «ارلاندار» 3:2 ەسەبىمەن العا شىقتى.
ەكىنشى كۇنى العاش بولىپ شارشى الاڭعا 52 كيلوعا دەيىنگى سالماق دارەجەسىندەگى بوكسشىلار كوتەرىلدى. «ارلانداردىڭ» جاتتىقتىرۋشىلارى بۇل سالماقتا ولجاس ساتتىباەۆتى شىعارسا, كۋبالىقتار وعان يوسۆاني ۆەيتيانى قارسى قويدى. شايقاستا ولجاس 3:0 ەسەبىمەن جەڭىسكە جەتتى. ءدال وسىنداي ەسەپپەن اسلانبەك شىمبەرگەنوۆ (69 كگ.) پەن يۆان دىچكو دا (+91 كگ.) قارسىلاستارىن قاپى قالدىردى. اسلانبەك رونيەل يگلەسياس سوتولونگودان باسىم تۇسسە, ۆانيا يوحاندي ورتەگانى جەڭدى.
ال 60 كيلوعا دەيىن سالماقتا باق سىناعان «ارلان» زاكير سافيۋللين لاسارو الۆارەسكە 1:2 ەسەبىمەن ەسە جىبەردى. سونداي-اق, 81 كيلودا جۇدىرىقتاسقان نۇرداۋلەت جارمانوۆ ەكى دۇركىن الەم چەمپيونى حۋليو سەسار لا كرۋستەن 0:3 ەسەبىمەن جەڭىلدى.
سونىمەن, ءبىزدىڭ بوكسشىلار ەكىنشى كۇنى 3:2 ەسەبىمەن ۇتىپ, جالپى ەسەپتى 6:4 ەتتى. وسىنىڭ ناتيجەسىندە «استانا ارلانس» WSB جوباسىنىڭ ەكىنشى مارتە چەمپيونى اتاندى. بۇعان دەيىن ول 2013 جىلى وسى تۇعىردان كورىنگەن ەدى. ال 2011 جىلى – كۇمىس, 2012 جانە 2014 جىلدارى قولا مەدالدارعا قول جەتكىزگەن بولاتىن.
ايتا كەتەيىك, ماۋسىم باسىندا «استانا ارلاندارىنىڭ» قۇرىلىمى ايتارلىقتاي وزگەرىسكە ۇشىراپ, كوماندا باسشىلىعىنا لوندون وليمپياداسىنىڭ چەمپيونى سەرىك ساپيەۆ كەلدى. سونداي-اق, جاتتىقتىرۋشىلار قۇرامى دا قايتا جاساقتالدى جانە العاش رەت ۇلتتىق قۇرامامەن تۇتاس كوماندا رەتىندە ونەر كورسەتتى.
بيىلعى جەڭىس وسى رەفورمالاردىڭ جەمىسى ەكەنىن ايتقان «استانا ارلاندارى» كومانداسىنىڭ باس ديرەكتورى سەرىك ساپيەۆ: «بۇل – تۇتاس كوماندانىڭ جەڭىسى. ماۋسىم بويى بەلسەندىلىك تانىتقان جاتتىقتىرۋشىلارعا العىسىم شەكسىز. «ارلاندارىمىزدىڭ» جەڭىسى – سول توگىلگەن تەردىڭ وتەمى», – دەدى.
ەلامان قوڭىر,
«ەگەمەن قازاقستان».