جول اپاتى ازايماي تۇر

2025 جىلدىڭ العاشقى جارتىسىندا بىلتىرعى 434 وقيعامەن سالىستىرعاندا بيىل جول اپاتى كوبەيىپ كەتكەن. ءتۇرلى دارەجەدە جاراقات العان ادامنىڭ سانى دا بىلتىرعى 576-دان اسىپ, 849-عا جەتىپتى.

– اپاتتىڭ نەگىزگى سەبەبى – جول ەرەجەسى ورەسكەل بۇزىلادى, اسىرەسە جىلدامدىقتى شەكتەن اسىرۋ ءجيى كەزدەسەدى. جۇرگىزۋشىلەر جول قيىلىسى مەن جاياۋ جۇرگىنشى وتكەلىندە, باسىپ وزۋ, مانەۆر جاساۋ كەزىندە ەرەجە ساقتامايدى. رولدە كەلە جاتىپ تەلەفون پايدالانۋ دا ازايماي تۇر. ءبىز وسىنداي ەرەجە بۇزۋشىلاردى انىقتاۋ ءۇشىن جۇمىستى كۇشەيتىپ, جىل باسىنان بەرى كولىك ايداپ كەلە جاتقاندا تەلەفوندى پايدالانعان 2 399 جۇرگىزۋشىنى انىقتادىق. ولاردىڭ ءبارى جاۋاپقا تارتىلدى. بۇل باعىتتا جۇمىستى ءالى دە كۇشەيتەمىز, – دەيدى و.ىبىرايىموۆ.

ساراپتاما وبلىس ورتالىعى ورال قالاسى اۋماعىندا, سونداي-اق ورال-اقتوبە, چاپاەۆ-جال­پاق­تال-قازتالوۆ جانە پودستەپنوە-ەلەك تاسجولدارىندا ەرەجە ءجيى بۇزىلاتىنىن كورسەتكەن.

شىنى كەرەك, بۇگىندە جول ەرەجەسى قاتال دەۋگە بولادى. تەك باتىس قازاقستان وبلىسىنىڭ وزىندە جىل باسىنان بەرى 2 مىڭنان اسا جۇرگىزۋشى كولىك قۇرالىن جۇرگىزۋ قۇقىعىنان ايىرىلعان. جول ەرەجەسىنىڭ ساقتالۋىن جاريا جانە جاسىرىن قاداعالايتىن 10 «ەكين پاترول», «ح سپوتتەر», «يۋتونگ مارش» ارنايى كولىكتەرى, 20 «كيبەر شەريف» ارنايى كولىگى وبلىس اۋماعىندا كۇنى-ءتۇنى قىزمەت ەتىپ, 10 مىڭنان اسا قۇقىقبۇزۋشىلىقتى انىقتا­عان. ودان بولەك, وڭىردە ورناتىل­عان 153 اۆتوماتتى تەحنيكالىق قۇرالدىڭ كومەگىمەن 62 473 قۇقىقبۇزۋشىلىق تىركەلگەن. مەملەكەت پايداسىنا وندىرىلگەن ايىپپۇل كولەمى 590 ملن تەڭگەگە جۋىقتاعان.

– «DJI Matrice 350 RTK» مار­كالى ۇشقىشسىز ۇشۋ اپپا­راتىنىڭ كومەگىمەن ورال-اتىراۋ جانە پودستەپنوە-ەلەك تاسجولدارىنان مەملەكەتتىك تىركەۋ ءنومىرى جوق كولىكتەردى, ەرەجە بۇزعان جۇرگىزۋشىلەردى انىقتاپ, اكىمشىلىك جاۋاپقا تارتتىق, – دەيدى جەرگىلىكتى پوليتسيا قىزمەتىنىڭ باستىعى.

بۇگىندە وبلىس اۋماعىنداعى رەسپۋبليكالىق ماڭىزى بار جولداردا جول قاۋىپسىزدىگىن قامتاماسىز ەتۋ ءۇشىن 40-قا جۋىق اۆتوپاترۋل كەزەكشىلىكتە ءجۇر.

سوڭعى كەزدە موپەد سىندى جەڭىل تەحنيكانىڭ كوبەيگەنى دە جول قاۋىپسىزدىگىنە اسەر ەتىپ تۇر. موپەد مىنگەن جۇرگىزۋشىلەر بيىل 10 مارتە جول اپاتىنا ءتۇسىپتى. 9 ادام جاراقات العان. ماس كۇيىندە جولعا شىققان, شلەم كيمەگەن, جولدا كەلە جاتىپ تەلەفونعا الاڭداعان, جۇرگىزۋشى كۋالىگىنسىز جانە تىركەلمەگەن موپەدتى ايداعان 207 جۇرگىزۋشى اكىمشىلىك جاۋاپكەرشىلىككە تارتىلىپتى. سونىڭ 36-سى كامەلەتكە تولماعان ءجاسوسپىرىم ەكەن.

قازىر ورال قالاسىندا كوشە جولدارى جوندەلىپ, كولىك قاتى­ناسىنا ۋاقىتشا قيىندىق كوبەي­گەن. جايىق وزەنىندەگى ەكى كوپىردىڭ ءبىرى دە ەكى اپتالىق جوندەۋگە جابىلاتىنى حابارلاندى. وسىنىڭ ءبارى جول قوزعالىسى كەزىندە اسا اباي بولۋدى تالاپ ەتەدى.

باتىس قازاقستان وبلىسى