قاسىم-جومارت توقاەۆتىڭ توراعالىق ەتۋىمەن بولعان پارلامەنت سەناتى بيۋروسىنىڭ وتىرىسىندا پالاتانىڭ 25 ماۋسىمدا بولاتىن كەزەكتى جالپى وتىرىسىنىڭ كۇن ءتارتىبى قارالدى, دەپ حابارلادى سەناتتىڭ ءباسپاسوز قىزمەتى.
سەناتورلار بىرقاتار حالىقارالىق قۇجاتتاردى راتيفيكاتسيالاۋدى جوسپارلادى. اتاپ ايتقاندا, ولار كاسپي تەڭىزىنىڭ ءتۇبىن قازاقستان مەن تۇرىكمەنستان اراسىندا ءبولۋ تۋرالى كەلىسىمدى, قازاقستان مەن تۇرىكمەنستان اراسىنداعى شەكارا وكىلدەرىنىڭ (شەكارا كوميسسارلارىنىڭ) قىزمەتى تۋرالى ۇكىمەتارالىق كەلىسىمدى, قازاقستان مەن اقش اراسىنداعى قىلمىستىق ىستەر بويىنشا ءوزارا قۇقىقتىق كومەك تۋرالى شارتتى, تمد-عا قاتىسۋشى مەملەكەتتەردىڭ قارۋلى كۇشتەرى ينجەنەرلىك اسكەرلەرىنىڭ گۋمانيتارلىق ميناسىزداندىرۋ سالاسىنداعى ىنتىماقتاستىعى تۋرالى كەلىسىمدى, كاسپي تەڭىزىنىڭ سۋ بيولوگيالىق رەسۋرستارىن ساقتاۋ جانە ۇتىمدى پايدالانۋ تۋرالى كەلىسىمدى راتيفيكاتسيالاۋ تۋرالى قۇجاتتار بولاتىن.
دەپۋتاتتار وتىرىستا ازاماتتىق پروتسەستىك كودەكسىنىڭ جوباسىن جانە زاڭناماعا ازاماتتىق پروتسەستىك زاڭنامانى جەتىلدىرۋ ماسەلەلەرى بويىنشا تۇزەتۋلەر ەنگىزۋ تۋرالى ىلەسپە زاڭ جوباسىن ءبىرىنشى وقىلىمدا قارايدى. سونداي-اق, بىرقاتار زاڭنامالىق اكتىلەرگە مەنشىك قۇقىعىن قورعاۋدى كۇشەيتۋ, شارتتىق مىندەتتەمەلەردى قورعاۋدى كەپىلدەندىرۋ جانە ولاردى بۇزعانى ءۇشىن جاۋاپكەرشىلىكتى قاتاڭداتۋ ماسەلەلەرى بويىنشا تۇزەتۋلەر ەنگىزۋ تۋرالى زاڭ جوباسىن ءبىرىنشى وقىلىمدا قاراۋدى جوسپارلادى.
ودان باسقا, زاڭناماعا ماقتا سالاسىن دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى ء(بىرىنشى وقىلىم) جانە «وسىمدىكتەر كارانتينى تۋرالى» زاڭعا وزگەرىستەر مەن تولىقتىرۋلار ەنگىزۋ تۋرالى زاڭ جوبالارى سەناتورلاردىڭ قاراۋىنا ۇسىنىلادى.
باس كوميتەتتەردىڭ توراعالارى زاڭ جوبالارىنىڭ سەنات وتىرىسىنا دايىندىعى تۋرالى باياندادى.
بيۋرو مۇشەلەرى سەناتتىڭ 2015 جىلعا ارنالعان نەگىزگى ءىس-شارالارىنىڭ جوسپارىنا وزگەرىستەردى دە بەكىتتى. اتاپ ايتقاندا, پالاتا قازاقستان رەسپۋبليكاسىنىڭ مەملەكەتتىك شەكاراسىنداعى «قورعاس» اۆتوموبيل وتكىزۋ بەكەتىندە ۆەتەرينارلىق-سانيتارلىق باقىلاۋ جانە قورعاس وزەنىندەگى «دوستىق» سۋ جۇيەسىن بىرلەسە پايدالانۋ ءجونىندەگى ماسەلەلەردى تالقىلاۋ ءۇشىن اگرارلىق ماسەلەلەر, تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ بيىلعى IV توقساندا الماتى وبلىسىنا كوشپەلى وتىرىسىن وتكىزۋدى جوسپارلاپ وتىر.
بيۋرو وتىرىسىندا سەنات ءتوراعاسى ق.توقاەۆ تمد پارلامەنتارالىق اسسامبلەياسى كەڭەسىنىڭ اتىنان دەپۋتات ەلەۋسىن ساعىندىقوۆقا «پارلامەنتتىك ىنتىماقتاستىقتى نىعايتقانى ءۇشىن» مەدالىن تابىس ەتتى.