الماتىدا «تۇنگى قالاداعى بالالار» رەسپۋبليكالىق جەدەل-الدىن الۋ ءىس-شاراسى ءوتىپ جاتىر, دەپ حابارلايدى Egemen.kz.
قالالىق پوليتسيا دەپارتامەنتىنىڭ جەرگىلىكتى پوليتسيا قىزمەتى باسقارماسى باستىعىنىڭ ورىنباسارى ايتان ەلەۋسىزوۆتىڭ ايتۋىنشا, ءىس-شارانىڭ باستى ماقساتى كامەلەتكە تولماعاندار اراسىنداعى قۇقىقبۇزۋشىلىقتىڭ الدىن الىپ, تۇنگى ۋاقىتتا باقىلاۋسىز جۇرگەن بالالاردى انىقتاۋ, سونداي-اق قازاقستان رەسپۋبليكاسىنىڭ «بالا قۇقىقتارى تۋرالى» زاڭىن بۇزعانداردى جاۋاپقا تارتۋ.
وڭىرلىك كوممۋنيكاتسيالار قىزمەتىندە وتكەن ءباسپاسوز ءماسليحاتى بارىسىندا الماتىدا يۋۆەنالدى پوليتسيا ينسپەكتورلارى مەن ۋچاسكەلىك پوليتسەيلەردەن تۇراتىن ارناۋلى توپتار قۇرىلىپ, العاشقى كۇننىڭ وزىندە بىرقاتار زاڭ بۇزۋشىلىقتىڭ ورىن العاندىعى ايتىلدى.
كامەلەتكە تولماعان 137 بالانىڭ ساعات 23:00-دەن كەيىن كوشەدە اتا-اناسىز جۇرگەنى انىقتالدى. اتا-انالارى قازاقستان رەسپۋبليكاسى اقبتك-ءنىڭ 442-بابىنىڭ 2-بولىگى بويىنشا اكىمشىلىك جاۋاپكەرشىلىككە تارتىلدى. 163 ءجاسوسپىرىم ءمان-جايدى انىقتاۋ ءۇشىن پوليتسيا باسقارماسىنا جەتكىزىلىپ, 10 ءجاسوسپىرىم پروفيلاكتيكالىق ەسەپكە قويىلعان. كامەلەتكە تولماعاندار اراسىندا ىشىمدىك ىشكەن 9 فاكت تىركەلىپ, 6 ويىن-ساۋىق مەكەمەسىنىڭ تۇندە بالالاردى كىرگىزىپ, زاڭ بۇزعانى انىقتالىپ وتىر.
قۇقىق بۇزۋشىلىق فاكتىلەرىنە سايكەس اتا-انالارى اكىمشىلىك جاۋاپكەرشىلىككە تارتىلىپ, جاسوسپىرىمدەرمەن اڭگىمەلەسكەن قۇقىق قورعاۋ ورگاندارىنىڭ ماماندارى زاڭ بۇزعان ويىن-ساۋىق ورىندارىنىڭ دا تىركەۋگە الىنعاندىعىن جەتكىزدى.
ءۇش كۇنگى شارا اياسىندا تۇنگى رەيدپەن قاتار, وقۋ ورىندارىندا, جاستار ورتالىقتارى مەن الەۋمەتتىك جەلىلەردە ءتۇسىندىرۋ جۇمىستارى جۇرگىزىلە باستادى. وندا بالالار مەن اتا-انالارعا ءىس-شارانىڭ ماقساتىن ايتىپ, زاڭ بۇزعان جاعدايدا جاۋاپقا تارتىلاتىنى تۋرالى اقپارات بەرىلەدى.
ايتان ەلەۋسىزوۆ اتاپ وتكەندەي, «تۇنگى قالاداعى بالالار» - بۇل ءبىر رەتتىك اكتسيا ەمەس, بالالاردىڭ قۇقىعىن قورعاپ, قاراۋسىز قالۋدىڭ الدىن الىپ, ءۇي-ىشىندەگى قولايسىزدىقتىڭ, جاسوسپىرىمدەر اراسىنداعى قىلمىستىڭ الدىن الۋ بويىنشا جاسالىپ جاتقان جۇيەلى جۇمىستىڭ ءبىر بولىگى. اسىرەسە جازعى دەمالىس كەزىندە مۇنداي رەيدتى ۇزبەي وتكىزگەن ماڭىزدى.
الماتى