جەتىسۋ وبلىسى قۇرىلعان ساتتەن باستاپ الاكول اۋدانىنىڭ تۋريزم سالاسىن دامىتۋعا 12,3 ملرد تەڭگە ءبولىندى. بۇل قوماقتى قارجى وڭىردەگى ينفراقۇرىلىمدى ايتارلىقتاي جاقسارتۋعا مۇمكىندىك بەردى. اتاپ ايتقاندا, جيىرما بەس جىل بويى شەشىمىن تاپپاي كەلگەن ەلەكتر جارىعى ماسەلەسى شەشىلدى, كارىز جۇيەسى سالىنا باستادى. بۇل تۋرالى وبلىس اكىمى بەيبىت يساباەۆ الاكول اۋدانى تۇرعىندارىمەن كەزدەسۋىندە مالىمدەدى.
ەلەكتر قۋاتىن ارتتىرۋ ماقساتىندا اقشي مەن بەسكول اۋىلدارى اراسىندا 56,8 شاقىرىمدىق جوعارى كەرنەۋلى جەلى مەن 2 قوسالقى ستانتسيا سالىندى. قازىر بۇل نىسانداردىڭ اباتتاندىرۋ جۇمىستارى اياقتالۋعا جاقىن. سونىمەن قاتار, اقشي اۋىلىندا 69,7 شاقىرىمدىق ماگيسترالدى كارىز جەلىسى تارتىلىپ, ەندى تازارتۋ قۇرىلعىسىنىڭ قۇرىلىسى باستالدى. كەلەسى كەزەڭدە كوكتۇما اۋىلىندا دا كارىز جۇيەسىن جۇرگىزۋ جوسپاردا.
كول جاعالاۋىن شايىپ كەتۋ قاۋپىن ازايتۋ ماقساتىندا رەسپۋبليكالىق بيۋدجەتتەن قارجى ءبولىنىپ, بوگەت سالۋ جوباسىنىڭ العاشقى كەزەڭى قولعا الىندى. بۇل باستاما ەكولوگيالىق قاۋىپسىزدىكپەن قاتار, ءتۋريزمنىڭ تۇراقتى دامۋىنا جول اشادى.
ايماقتا تازالىق پەن قىزمەت كورسەتۋ ساپاسى دا نازاردان تىس قالعان جوق. بيىل جاعالاۋعا 7 ارنايى تەحنيكا, 19 مودۋلدىك سانيتارلىق توراپ جانە 140 قوقىس جاشىگى ورناتىلدى. جالپى, بۇگىندە 220 تۇرمىستىق قالدىق كونتەينەرى مەن 22 سانيتارلىق-گيگيەنالىق توراپ قىزمەت كورسەتەدى.
سونىمەن قاتار, سۋ ايدىنىنداعى قاۋىپسىزدىك ماسەلەسى دە قاتاڭ باقىلاۋدا. ورتاق سۋ پايدالانۋ ەرەجەسىنە سايكەس, شومىلاتىن ايماقتار مەن شاعىن كەمەلەر جولى بۋيلارمەن بەلگىلەنىپ, ارنايى ينسپەكتورلار مەن پوليتسيا قىزمەتكەرلەرى جۇمىس جۇرگىزىپ وتىر.
2024 جىلى الاكول جاعاسىندا دەمالۋشىلار سانى 1,7 ملن ادامعا جەتىپ, كورسەتكىش 6,2%-عا ارتتى. قىزمەت كورسەتۋ كولەمى دە 1,8 ەسەگە وسكەن. جاعالاۋداعى تۋريستىك نىساندار سانى 270-كە جەتىپ, ءبىر جىل ىشىندە 35,6%-عا كوبەيدى.
— جىل سايىن وتباسىمىزبەن اقشي جاعالاۋىنا كەلەمىز. تازالىعى مەن قىزمەت كورسەتۋ ساپاسى جىلدان جىلعا جاقسارىپ كەلەدى. الاكولدىڭ شيپالى سۋى – ناعىز تابيعي بايلىق, — دەيدى دەمالۋشىلاردىڭ ءبىرى ءاليا عابيدوللاقىزى.
الاكول وڭىرىندەگى بۇل وڭ وزگەرىستەر – ءتۋريزمدى دامىتۋ جولىنداعى ناقتى ناتيجەلەردىڭ كورىنىسى.