پەريزات قايرات پەن اناسىنا سوت ۇكىمى شىقتى

قىلمىستىق قۋدالاۋ ورگانى  پەريزات قايرات پەن ونىڭ اناسىن الدىن الا ءسوز بايلاسۋ ارقىلى توپ بولىپ, بىرنەشە رەت اسا ءىرى كولەمدە جاسالعان الاياقتىقتىڭ ءۇش ەپيزودى (قك 190-بابى 4-بولىگىنىڭ 2-تارماعى), سونداي-اق قىلمىستىق جولمەن الىنعان كىرىستەردى زاڭداستىرۋ (قك 218-بابى 2-بولىگىنىڭ 1-تارماعى جانە 3-بولىگىنىڭ 3-تارماعى) بويىنشا ايىپتاعان. سوت پروتسەسىندە ۇسىنىلعان بارلىق دالەلدەمەلەر جان-جاقتى زەرتتەلگەن. سوتتالۋشى پەريزات قايراتتىڭ ءوتىنىشى بويىنشا كەيبىر دالەلدەمەلەرى جانە ونىڭ ىشىندە جاۋاپتارى جابىق سوت وتىرىسىندا قارالدى. سوتتا 2021 جىلعى 4 قازاندا پەريزات قايرات جالعان قۇرىلتاي قۇجاتتارىن جاساپ, اتاۋى زاڭدى تۇردە جۇمىس ىستەيتىن «Biz Birgemiz Qazaqstan» قورىنا ۇقساس «Biz Birgemiz Qazaqstan 2030» قوعامدىق بىرلەستىگىن تىركەگەنى انىقتالدى. پەريزات قايرات اناسىمەن بىرگە الدىن الا ءسوز بايلاسۋ ارقىلى ارەكەت ەتىپ, ازاماتتاردى مۇقتاج جاندارعا, سونىڭ ىشىندە سۋ تاسقىنىنان زارداپ شەككەندەر مەن پالەستينا حالقىنا كومەك كورسەتۋ ماقساتىندا قاراجات جيناۋعا شاقىرعان. وسىلايشا, 2021 جىلعى قاراشادان 2023 جىلعى قازانعا دەيىن ايىپتالىشىلار وڭالتۋ ورتالىعىن سالۋ, مۇگەدەك بالالارعا كومەك كورسەتۋ جانە قوعامدىق ءىس-شارالاردى ۇيىمداستىرۋ سىلتاۋىمەن 126,7 ملن تەڭگەنى الاياقتىق جولمەن جيناپ, يەلەنگەن. 2023 جىلعى قاراشادان 2024 جىلعى ساۋىرگە دەيىن پالەستينا حالقىنا كومەك كورسەتۋ سىلتاۋىمەن 559,1 ملن تەڭگەنى زاڭسىز يەلەنگەن. 2024 جىلعى 1 ءساۋىرى مەن قاراشا ارالىعىندا قازاقستاندا توتەنشە جاعداي رەجيمى ەنگىزىلگەن كەزدە سۋ تاسقىنىنان زارداپ شەككەندەرگە كومەك كورسەتۋ سىلتاۋىمەن 2,8 ملرد تەڭگە كولەمىندە قاراجات جيناپ, يەمدەنگەن. جالپى كەلتىرىلگەن شىعىن كولەمى 3,5 ملرد تەڭگەنى قۇراعان. جينالعان قاراجاتتار «Biz Birgemiz Qazaqstan 2030» قوعامدىق بىرلەستىگىنىڭ شوتىنا تۇسكەن سوڭ, پەريزات قايرات ولاردى ءوزى مەن اناسىنىڭ جەكە شوتتارىنا اۋدارعان. ولار قىلمىستىق جولمەن الىنعان كىرىستەردى گۇل بيزنەسىن ساتىپ الۋ جانە جالعان مامىلەلەر جاساۋ ارقىلى زاڭداستىرعان. سونىمەن قاتار, ايىپتالۋشىلار ۇرلانعان اقشانى قىمبات جىلجىمايتىن م ۇلىك, اۆتوكولىكتەر, اشەكەيلەر, كيىم-كەشەك, جيھاز ساتىپ الۋعا, دەمالىستار مەن جوندەۋ جۇمىستارىنىڭ اقىسىن تولەۋگە جۇمساعان. سوت تەرگەۋىنىڭ ناتيجەسىندە پەريزات قايرات پەن عايني الاشباەۆا وزدەرىنە تاعىلعان ايىپتار بويىنشا كىنالى دەپ تانىلدى. استانا قالاسىنىڭ قىلمىستىق ىستەر جونىندەگى اۋدانارالىق سوتىنىڭ مالىمەتىنشە, ولاردىڭ كىنالارى جابىرلەنۋشىلەر مەن كۋالاردىڭ جاۋاپتارىمەن, ساراپتاما قورىتىندىلارىمەن, زاتتاي دالەلدەمەلەرمەن جانە قىلمىستىق ءىس ماتەريالدارىمەن تولىق دالەلدەنگەن. مەملەكەتتىك ايىپتاۋشى پەريزات قايراتقا 10 جىل باس بوستاندىعىنان ايىرۋ جازاسىن, اناسىنا 8 جىل باس بوستاندىعىنان ايىرۋ تۇرىندە جازانى تاعايىنداۋدى سۇراعان بولاتىن. سوتتالۋشىلار كىنالارىن مويىنداماي, وزدەرىن اقتاۋدى سۇراعان. سوت قك 190-بابىنىڭ 4-بولىگى مەن 218-بابىنىڭ 3-بولىگىنىڭ سانكتسياسى 5 جىلدان 10 جىلعا دەيىن باس بوستاندىعىنان ايىرۋ جازاسىن كوزدەيدى جانە اۋىر قىلمىستار ساناتىنا جاتادى. سوت بۇل قىلمىستاردىڭ ەرەكشە ارسىزدىقپەن جاسالعانىن اتاپ ءوتتى. ولار قازاقستاندىق قوعامنىڭ توزىمدىلىك پەن مۇقتاج جاندارعا جاناشىرلىق سياقتى ىرگەلى قۇندىلىقتارىنا نۇقسان كەلتىرىپ, ازاماتتاردا قايىرىمدى ىستەردىڭ قاجەتتىلىگىنە دەگەن كۇمان تۋدىرعان. جازا مەن جاۋاپتىلىقتى اۋىرلاتاتىن جاعداي رەتىندە قىلمىستىق قۇقىق بۇزۋشىلىقتاردىڭ توتەنشە جاعداي كەزىندە جاسالۋى ايتىلدى. ال جازانى جەڭىلدەتەتىن ءمان-جايلار انىقتالعان جوق. جابىرلەنۋشىلەرگە كەلتىرىلگەن ماتەريالدىق شىعىن وتەلمەگەن. وسىنى ەسكەرە وتىرىپ, سوت پەريزات قايراتقا 10 جىل باس بوستاندىعىنان ايىرۋ جازاسىن, عايني الاشباەۆاعا 7 جىل باس بوستاندىعىنان ايىرۋ (ونىڭ قارت جاسىن ەسكەرە وتىرىپ) جازاسىن تاعايىنداۋدى ادىلەتتى دەپ سانادى. سوت ۇكىمىمەن ايىپتالۋشىلار 10 جىل مەرزىمگە قايىرىمدىلىق قاراجاتتارىن جيناۋمەن بايلانىستى قىزمەتپەن اينالىسۋ قۇقىعىنان ايىرىلدى (زاڭدا كوزدەلگەن ەڭ ۇزاق مەرزىم). سوت «Vela Village» كوتتەدج قالاشىعىنداعى جەكە ءۇي, «Akbulak Riviera», «Sensata Plaza», «Highvill Ishim Gold», «كوك جايلاۋ» تۇرعىن ءۇي كەشەندەرىندەگى پاتەرلەر مەن تۇراق ورىندارى, «Mercedes-Benz S450» 2024 ج., «Lexus LX 600» 2024 ج. سىندى م ۇلىكتەرىن ۇرلانعان قاراجاتقا ساتىپ الىنعانىن اتادى.