ءال-فارابي اتىنداعى قازۇۋ عالىمدارى ازىرلەگەن فەرمەرلىك ونىمدەردى وڭدەۋگە ارنالعان «Dayar 20» ءموبيلدى ليوفيليزاتسيالىق قوندىرعىسى اۋىلشارۋاشىلىعى ونىمدەرىن تابيعي قالپىندا, ساپاسىن جوعالتپاي, ۇزاق ۋاقىتقا ساقتاۋعا مۇمكىندىك بەرەدى, دەپ حابارلايدى Egemen.kz.
قوندىرعى ەگىس دالاسىندا, باۋ-باقشا, فەرمالاردا قولدانۋعا, ءونىمدى وڭدەۋگە قولايلى.
تابيعي قوسىلىستار مەن پوليمەرلەردىڭ ورگانيكالىق زاتتار حيمياسى جانە تەحنولوگياسى كافەدراسىنىڭ اعا وقىتۋشىسى, دارىلىك زاتتاردىڭ ورگانيكالىق سينتەزى جانە حيمياسى زەرتحاناسىنىڭ مەڭگەرۋشىسى, PhD ەربول يحسانوۆتىڭ ايتۋىنشا, ليوفيليزاتسيا نەمەسە سۋبليماتسيالىق كەپتىرۋ – مۇزداتىلعان ونىمنەن سۋدى تومەن قىسىمدا بۋلاندىرىپ, ونىڭ تابيعي قۇرىلىمى مەن پايدالى قاسيەتتەرىن ساقتاپ قالاتىن وزىق تەحنولوگيا. «Dayar 20» قوندىرعىسى ارقىلى وڭدەلگەن كەپتىرىلگەن ونىمدەردىڭ ءدامى, ءتۇسى, ءيىسى, ءپىشىنى جانە قۇرامىنداعى دارۋمەندەرى ۇزاق ساقتالادى. سونىمەن قاتار جەمىس-جيدەكتەردى, كوكونىستەردى, ەت پەن ءسۇت ونىمدەرىن, ءتىپتى دايىن تاعامدار مەن بالىققا دەيىن جوعارى ساپادا كەپتىرۋگە بولادى. قۇرعاق ونىمدەردى ارنايى توڭازىتقىشسىز بولمە تەمپەراتۋراسىندا 1-3 جىلعا دەيىن, ال ارنايى قاپتامامەن 10-50 جىلعا دەيىن ساقتاۋعا بولادى.
«Dayar 20» – فەرمەرلەر ءۇشىن سەنىمدى كومەكشى. سونىمەن قاتار اگروونەركاسىپتىك كەشەن مەن وڭدەۋ سالاسىن جاڭعىرتۋعا جول اشاتىن تەحنولوگيا. قۇرىلعى, اسىرەسە, تاۋلى جانە شالعاي اۋداندارداعى شارۋاشىلىقتار ءۇشىن ءتيىمدى. يننوۆاتسيالىق جوبانى جۇزەگە اسىرعان قازۇۋ عالىمدارى اۋىلشارۋاشىلىعى ونىمدەرىنىڭ ەكسپورتتىق الەۋەتىن ارتتىرىپ, ازىق-ت ۇلىك قاۋىپسىزدىگىن قامتاماسىز ەتۋگە ۇلەس قوساتىن بولادى.
الماتى